QƏTƏRDƏ DİSNEYLƏND TİKİLƏCƏK
35 kvadrat kilometr sahəsi olan Lusail əyləncə şəhəri Dohə yaxınlığında salınacaqdır. Burada ən müasir attraksionlarla yanaşı, restoranlar, mehmanxanalar və teatrlar tikiləcək, bağlar və parklar yaradılacaqdır.
“Əd-Diyar” şirkəti hələ dekabr ayında bildirmişdi ki, təxminən 5 milyard dollar dəyərində 200 min nəfərlik Lusail şəhəri tikmək niyyətindədir. 750 min nəfər əhalisi olan (onların yalnız 150 mini ölkə vətəndaşıdır) Qətərdə infrastruktur layihələrinə 50 milyard dollar ayrılmışdır.
Son illər enerji daşıyıcılarının qiymətinin rekord səviyyəyə qalxması Fars körfəzindəki bir çox dövlətlərin varlanmasına səbəb olmuşdur. Məsələn, dünyanın ən iri neft hasilatçısı olan Səudiyyə Ərəbistanı ölkənin şərq sahillərində “Kral Abdullah” şəhərinin salınacağını elan etmişdir. Layihənin dəyəri 26 milyard dollardır.
Bölmənin digər xəbərləri
