QİÇS PLANETDƏ SÜRƏTLƏ YAYILIR
AZƏRTAC xarici informasiya agentliklərinə istinadla xəbər verir ki, Birləşmiş Millətlər Təşkilatı Yer kürəsində QİÇS-in (qazanılmış immun çatışmazlığı sindromu) yayılmasının vəziyyəti haqqında illik hesabat dərc etmişdir. Hesabatda deyilir ki, 2005-ci ilin sonuna olan məlumata görə, dünyada İÇV-yə (immun çatışmazlığı virusuna) yoluxmuş təxminən 40,3 milyon xəstə var. Onların 4,9 milyonu bu virusa cari ildə yoluxmuşdur. 2005-ci ildə epidemiya dünyada 3,1 milyon adamın ölümünə səbəb olmuşdur. Virus daşıyıcılarının üçdə ikisi, o cümlədən qadınların ümumi sayının 77 faizi Afrikada, Böyük Səhra rayonunda yaşayır. İÇV daşıyıcılarının hər 10 nəfərindən yalnız biri müayinədən keçmiş və bu xəstəliyə yoluxduğundan xəbərdardır.
2004-cü ildə 15 milyona yaxın uşaq QİÇS üzündən ya bir, ya da hər iki valideynini itirmişdir. Onların əksəriyyəti Afrikada yaşayır. 2010-cu ilədək yetim qalan uşaqların sayını azaltmağın mümkün olmayacağı gözlənilir.
Bölmənin digər xəbərləri
