QIRMIZI QƏSƏBƏDƏ GÖRÜŞ
Burada dövlətimizin başçısının qəsəbə sakinləri ilə görüşü oldu. Görüşü qəsəbə bələdiyyəsinin sədri Yevda Abramov açdı.
QƏSƏBƏ BƏLƏDİYYƏSİNİN SƏDRİ YEVDA ABRAMOVUN
ÇIXIŞI
-Möhtərəm cənab Prezident!
Hörmətli qonaqlar, xanımlar və cənablar!
Qubaya, o cümlədən Qubanın sakinləri olan dağ yəhudilərinin yaşayış məskəni Qırmızı qəsəbəyə xoş gəlmisiniz!
Bu şərəfli anları, bu xoş dəqiqələri bizə bəxş etdiyiniz üçün Sizə dərin minnətdarlığımızı bildiririk. Biz bu meydanda ulu öndərimiz, türk dünyasının böyük oğlu, ümummilli liderimiz, müasir dünyanın ən güclü dövlət başçısı, siyasət və diplomatiyanın qrossmeysteri cənab Heydər Əliyevi qarşılamışıq. SSRİ Nazirlər Soveti sədrinin birinci müavini kimi, Mərkəzi Komitənin birinci katibi kimi, Prezident kimi bu yerdə bizimlə görüşmüş, dağ yəhudiləri ilə ünsiyyətdə olmuş, onların qayğıları ilə maraqlanmışdır.
Cənab Prezident!
Dağ yəhudiləri 2500 ildir Azərbaycanda məskunlaşıblar. 700 ildir Quba rayonunda, 271 ildir ki, bizim olduğumuz bu qəsəbədə məskunlaşıblar. Azərbaycan yeganə dövlətdir ki, dağ yəhudiləri nə milli, nə irqi zəmində heç bir təqibə məruz qalmamışlar. Biz bunun üçün bu yeri, məkanı seçmiş ulu babalarımıza minnətdarlığımızı bildiririk.
Cənab Prezident!
Siz oktyabr ayında Qubada Olimpiya İdman Kompleksinin açılışında iştirak etmisiniz. Xalqımıza nə vəd etmisinizsə, hamısını yerinə yetirmisiniz. Bu gün də Sizin buraya gəlişiniz həmin platformanızın həyata keçirilməsinin bariz nümunəsidir. Mən Sizin doqquz aylıq fəaliyyətinizdə gördüyünüz işləri sadalasam, saatlar bəs etməz. Lakin bir şeyi demək istəyirəm ki, biz Sizin BMT-nin ali kürsüsündən, NATO-nun yüksək tribunasından, Avropa Şurasında etdiyiniz çıxışlardan fəxr duyuruq və Sizin kimi bir Prezidentlə fəxr edirik.
Cənab Prezident!
Quba rayonunda məskunlaşmış, o cümlədən dünyanın bütün qitələrində yaşayan dağ yəhudiləri Sizin fəaliyyətinizi izləyirlər. Onlar Azərbaycana həsrətlə baxırlar, geriyə dönmək istəyirlər. Çünki bu gün Azərbaycanda ümidli sabaha, böyük gələcəyə inam var. Bu inama görə, bu dincliyə görə biz böyük Heydər Əliyevə minnətdarıq. Biz hamımız fəxr edirik ki, Heydər Əliyevdən sonra hakimiyyətə onun siyasətini həyata keçirə bilən, Azərbaycana layiq olan bir Prezident, yüksək səviyyəli ailədən çıxmış, bizim sevimlimiz əziz İlham Əliyev Azərbaycana başçılıq edir.
Cənab Prezident, biz Sizin gəlişinizə çox sevinirik. Bu gün Qırmızı qəsəbədə və rayonda çox böyük abadlıq işləri gedir. Birinci növbədə, rayonda etdiyiniz kadr dəyişikliyinə görə Sizə minnətdarıq. Bir neçə ayda Siz beş ilin işini görmüsünüz. Qırmızı qəsəbə kapital qoyuluşuna görə Azərbaycanın ən kiçik rayonu səviyyəsindədir. Burada kommunikasiyaya, elektrikləşməyə, abadlaşmaya 300 milyon vəsait xərcləyəcəyik. Asfalt döşənməsinə başlamışıq. Bu iş 15 günə başa çatdırılacaqdır. 20 gündən sonra qəsəbənin bütün görünüşü dəyişəcəkdir. Camaatımız dolanışığından razıdır.
Əlbəttə, problemlər hər yerdə var. Burada da vardır. Bir milyon qaçqını olan, 20 faiz ərazisi işğal altında olan və 14 ilə yaxın müharibə vəziyyətində yaşayan bir respublikadan daha nə istəmək olar? Bizim hər birimiz qaçqınlardan qat-qat yaxşı yaşayırıq. Siz Qusar rayonuna gedəndə yamacdan qəsəbəmizə baxarkən əyani görərsiniz ki, camaatımız necə yaşayır. Bu yaşayışa, şəraitə görə Sizə bir daha dərin minnətdarlığımızı bildiririk.
Yaşasın Heydər Əliyev siyasətinin layiqli davamçısı, qüdrətli Azərbaycanın qurucusu olan Prezident İlham Əliyev!
Bazar iqtisadiyyatı, demokratiya yolu ilə gedən, suverenliyi uğrunda mübarizə aparan böyük Azərbaycan xalqına eşq olsun!
X X X
Prezident İlham Əliyev görüşdə nitq söylədi.
Bölmənin digər xəbərləri
