Qoruqda ov edənlər cərimələndilər
Bakı, 3 mart, AZƏRTAC
Ekologiya və Təbii Sərvətlər Nazirliyinin aidiyyəti qurumlarının əməkdaşları tərəfindən fevralın 25-dən martın 2-dək ölkə ərazisində növbəti reydlər keçirilib.
Nazirliyin mətbuat xidmətindən AZƏRTAC-a verilən məlumata görə, reyd zamanı Qəbələ rayonu ərazisində qanunsuz ov edən Olik Seyranovdan 1 ov tüfəngi götürülüb. Təqsirkar şəxs barəsində akt və protokol tərtib edilərək 1000 manat məbləğində cərimə olunub.
Qızılağac Dövlət Təbiət Qoruğunun ərazisində keçirilmiş reyd zamanı Masallı rayon sakinləri Zamin Abbasov və Yaşar Qafarov saxlanılıblar. Onlardan 2 ov tüfəngi, 51 patron və 2 ədəd ovlanmış qaşqaldaq quşu götürülüb. Qanun pozucuları barəsində müvafiq qaydada akt, protokol tərtib olunub və təqsirkar şəxslər ümumilikdə 2000 manat məbləğində cərimə edilib.
Qəbələ rayonunun Kürd kəndi ərazisində isə qanunsuz ovla məşğul olan şəxsdən 1 ov tüfəngi götürülüb. İnzibati xətaya yol vermiş şəxs barəsində akt və protokol tərtib edilərək 1000 manat məbləğində cərimə olunub.
Qanunsuz ov hallarının qarşısını almaq məqsədilə reydlər davam etdirilir.
Bölmənin digər xəbərləri
