İQTİSADİYYAT
Qubadlıdan olan məcburi köçkünlərin həyat şəraitinin yaxşılaşdırılması və sosial problemlərinin həlli diqqət mərkəzindədir
Sumqayıt, 22 oktyabr (AZƏRTAC). Oktyabrın 22-də Qubadlı Rayon İcra Hakimiyyətinin Sumqayıtda yerləşən inzibatı binasının akt zalında başçı yanında Şuranın geniş iclası keçirilmişdir. İctimaiyyət nümayəndələrinin də iştirak etdiyi iclasda 2013-cü ilin 9 ayında görülmüş işlər və qarşıda duran vəzifələr müzakirə olunmuşdur.
AZƏRTAC xəbər verir ki, iclasda hesabat məruzəsi ilə çıxış edən rayon icra hakimiyyətinin başçısı Malik İsaqov Prezident İlham Əliyevin Nazirlər Kabinetinin 2013-cü ilin 9 ayının sosial-iqtisadi inkişafının yekunlarına və qarşıda duran vəzifələrə həsr olunmuş iclasındakı proqram xarakterli nitqində irəli sürülmüş vəzifələri bir daha diqqətə çatdırmışdır. Bildirilmişdir ki, ölkədə davamlı sosial-iqtisadi inkişafa nail olunması, son 10 ildə qazanılmış möhtəşəm uğurlar Prezident İlham Əliyevin növbəti seçkilərdə inamlı qələbəsini təmin etmişdir. Bütün Azərbaycan xalqı kimi, Qubadlı sakinləri də bu qələbəni dövlətimizin başçısının həyata keçirdiyi məqsədyönlü xarici və daxili siyasətin qanunauyğun nəticəsi kimi dəyərləndirirlər.
Məruzəçi daha sonra hesabat dövründə rayonda görülmüş işlərdən danışaraq qeyd etmişdir ki, rayon icra hakimiyyəti və yerli icra strukturları əhali ilə sıx təmasda işləmiş, onların sosial problemlərin öyrənilməsi, üzləşdikləri çətinliklərin aradan qaldırılması istiqamətində zəruri iş aparmışlar. Rayon icra hakimiyyətinin fəaliyyətində yenə də başlıca yeri məcburi köçkünlərin yığcam məskunlaşdığı yerlərdə - yataqxana, pansionat, sanatoriya və digər binalarda kommunal şəraitin yaxşılaşdırılması tutmuşdur. Belə ki, payız-qış mövsümü ilə əlaqədar binaların dam örtükləri təmir olunmuş və digər işlər görülmüşdür. “Sarıqaya”, “Yaşıldərə”, Ceyranbatan yaşayış və bağ massivlərində, “Sumqayıt” mehmanxanasında məskunlaşmış sakinlərin sosial problemlərinin həlli istiqamətində bir sıra tədbirlər həyata keçirilmiş, yollara asfalt örtük çəkilmişdir.
Məktəblərin maddi-texniki bazasının möhkəmləndirilməsi də diqqətdə saxlanılmış, Çaytumas məktəb-liseyində əlavə korpus inşa edilmiş, burada 6 əlavə sinif otağı və akt zalı istifadəyə verilmişdir. Çardaqlı kənd tam orta məktəbində də şagird sıxlığı nəzərə alınaraq əlavə 4 sinif otağı tikilmiş, Aşağı Mollu, Xanlıq və Dəmirçilər kənd tam orta məktəblərində təmir işləri aparılmışdır.
Hesabat dövründə fəaliyyətin təkcə bunlarla məhdudlaşmadığını qeyd edən məruzəçi idarə, müəssisə və təşkilatların iş şəraitinin yaxşılaşdırılması ilə əlaqədar tədbirlər görüldüyünü də vurğulamışdır. Qeyd olunmuşdur ki, rayon icra hakimiyyəti üçün alınmış yeni binada əsaslı təmir və yenidənqurma işləri aparılmış, əməkdaşların normal fəaliyyət göstərmələrinə şərait yaradılmışdır. Sumqayıtın müvafiq idarələri ilə gündəlik qarşılıqlı fəaliyyət nəticəsində məcburi köçkünlərin yığcam məskunlaşdıqları ərazilər qaz, su və elektrik enerjisi ilə fasiləsiz təmin edilir.
Dövlət Sosial Müdafiə Fondunda və Əhalinin Sosial Müdafiə Mərkəzində Qubadlıdan olan 7 min 749 nəfər pensiyaçı qeydiyyatdadır. Onların pensiyalarının orta aylıq məbləği 158 manat təşkil edir. Rayon Əhalinin Sosial Müdafiə Mərkəzi tərəfindən cari ilin 9 ayı ərzində 255 ailəyə ünvanlı sosial yardım təyin olunmuşdur. Həmçinin 372 nəfər yaşlı tənha və əlil məcburi köçkünə sosial xidmət göstərilir.
M.İsaqov xüsusilə vurğulamışdır ki, sosial problemlərin həlli ilə bağlı nə qədər tədbirlər görülsə də, məcburi köçkünlər mənəvi dəstəyə daha çox ehtiyac duyurlar. Vətən, yurd həsrəti ilə yaşayan Qubadlı camaatı öz doğma ocaqlarına dönəcəkləri günü səbirsizliklə gözləyir.
Yığıncaqda çıxış edənlər digər sahələrdə görülmüş işlər barəsində məlumat vermiş, əldə olunmuş uğurlardan, mövcud problemlərin aradan qaldırılması yollarından danışmışlar. Ağsaqqallar, gənc nəsli nümayəndələri söz alaraq Azərbaycanın əldə etdiyi nailiyyətlərdən qürur duyduqlarını dilə gətirmiş, məcburi köçkünlərə göstərdiyi diqqət və qayğıya görə Prezident İlham Əliyeva dərin minnətdarlıqlarını bildirmişlər. Qeyd olunmuşdur ki, qubadlılar Azərbaycanı dinamik inkişaf və tərəqqi yoluna çıxaran, perspektivli ölkəyə çevirən, dövlətimizin beynəlxalq nüfuzunu, iqtisadi və hərbi qüdrətini getdikcə möhkəmləndirən Prezidenti İlham Əliyevin xarici və daxili siyasətini birmənalı şəkildə dəstəkləyir və müdafiə edirlər.
Sonda iclasın qətnaməsi qəbul edilmişdir.