Qürur və şərəf dolu möhtəşəm 5 il...
Qazax, 8 noyabr, AZƏRTAC
“Bölgələrdən AZƏRTAC üçün yazırlar”: Qazax Rayon Heydər Əliyev Mərkəzinin direktoru Ceyhunə Hüseynovanın Zəfərin 5 illiyinə həsr olunan məqaləsini təqdim edirik.
Qürur və şərəf dolu möhtəşəm 5 il...
Cəsarət və ləyaqət dolu möhtəşəm 5 il...
Tarix baxımından qısa zaman kəsiyi olsa da xalqımızın, dövlətimizin və dövlətçilik tariximizin əsrlər boyu baş ucalığı və fəxarətlə xatırlayacağı qəhrəmanlıq salnaməsi...
44 günlük Vətən müharibəsində, ədalət savaşımızda qazanılan Qələbəmizin 5 ili tamam olur. Böyük qürur və sevinclə Qələbəmizin 5-ci ildönümünü bayramlarla qeyd edirik. Daha fərqli, daha şəstlə. Bayram tədbirlərimizi möhtəşəm edən isə təbii ki, işğaldan azad edilmiş ərazilərimizdə qurulan toy-büsatlar, qaynar həyatın canlanması, tarixi el-obalarımızın yenidən abadlaşdırılmasıdır.
2020-ci il sentyabrın 27-də Ermənistanın cəbhə xəttində törətdiyi növbəti hərbi təxribatlar artıq müharibəni qaçılmaz etdi. Azərbaycan Silahlı Qüvvələri “Dəmir yumruq” əməliyyatı ilə 30 illik işğala son qoydu. 2020-ci il noyabrın 10-da üçtərəfli Bəyanatla Ermənistanın siyasi-hüquqi məğlubiyyəti təsdiqləndi və kapitulyasiyaya imza atdı. Şuşa şəhərinin işğaldan azad edilməsi tarixi isə Zəfər Günü elan edildi. 30 ilə yaxın bir zaman ərzində xalqımız öz torpaqlarının işğal altında olması ilə heç zaman barışmadı. Əmin idik ki, Qələbə bizimlə olacaq. Bu əminliyi bizə verən, inamımızı gücləndirən, bizi qələbələrə ruhlandıran, Ulu Öndər Heydər Əliyevlə başlanan, Prezident İlham Əliyevlə davam edən siyasət idi - uğurlu diplomatik, praqmatik siyasət. Məhz Ulu Öndər Heydər Əliyev siyasi kursunun davamçısı Prezident İlham Əliyevin rəhbərliyi ilə Azərbaycan dinamik inkişaf yoluna çıxdı, möhtəşəm Zəfər üçün tarixi şəraitin formalaşmasına imkan yarandı. Bu inkişafdan irəli gələrək ordumuz tamamilə yenidən quruldu, döyüş imkanları ən yüksək səviyyəyə çatdırıldı, hərbi arsenalımız ən müasir silah və texnika ilə zənginləşdirildi. Səbir, mətinlik, əzm, birlik, həmrəylik və ədalətə olan inam bir yumruqda birləşərək “dəmir yumruğ”a çevrildi və bu gün alnıaçıq qeyd etdiyimiz Zəfərimizi bizə yaşatdı.
Azərbaycan həqiqətlərinin dünyaya çatdırılması üçün çırpındığımız günlər artıq dünyanın hər bir yanından eşidilən mətin ayaq səslərimizlə əvəzlənib. Bu gün çoxmillətli və çoxkonfessiyalı dövlətçilik siyasətimiz, ölkəmizin milli maraqlarından irəli gələn müstəqil siyasətimiz və bu siyasətin müəllifi İlham Heydər oğlu Əliyev kimi liderimiz var. Bu siyasətin təntənəsi isə Azərbaycanın siyasi sabitliyində, iqtisadi gücündə, sosial rifahında, uğurlu xarici siyasətində, xüsusilə də tarix yazan güclü ordusunda öz təsdiqini tapır.
Bu möhtəşəm bayram günlərinin əsas qəhrəmanları Vətənin imdadına zamanında yetişən qorxmaz, cəsur oğullarımızdır. Onlar xalqımızın adını ucalara yüksəldən, başımızı uca, alnımızı açıq edən, qəlbimizdə ölümsüzləşən şəhidlərimizdir. Onlar şəhidliyə yüksələrək bizə Qələbə əzmi yaşatdılar, böyük Zəfər bəxş etdilər. Bu gün azad edilmiş torpaqlarımız onların adı ilə əbədiləşir, hər Zəfər nəğməsi onların əzmi ilə yazılır. Minlərlə oğulun, minlərlə yurd həsrətli insanın dirənişi ilə zənginləşən, tarixləşən 44 gün artıq bütöv bir tarixdir. Bir xalqın, bir millətin Zəfər tarixi. Azad edilmiş o torpaqlara qayıdışımızda şəhidlərin ruhları da bizimlə birgə səssiz yürüyürlər. Onların ayaq izləri ilə çəkilən döyüş yollarında birgə addımlayırıq - şəhidlər və biz... İndi o torpaqların hər daşında onların ruhunun toxunuşu, hər bulağında onların əllərinin istisi, hər udum havasında səssiz nəfəsləri var. O torpaqların hər çiçəyi, hər ağacı onların ruhuna səcdə edir. Bundan sonra əsrlər boyu sizə baş əyib, sizin ruhunuza minnətdar olacağıq - bu Zəfəri bizə yaşadan oğullar.
Milli qüdrətimizin və tarixi ədalətin təntənəsi, suverenliyimizin bərpası, qürur dolu beş ilimiz mübarək olsun! Yalnız hərbi qələbənin deyil, həm də dövlətçilik ideyasının möhkəmlənməsi, suverenliyimizin tam bərpası kimi əzəmətli məqamları özündə birləşdirən 5 ilimiz mübarək olsun!
Bu Zəfər Azərbaycanın müasir tarixində dövlətin gücünü, xalqın birliyini və liderin əzminin vəhdətini nümayiş etdirdi. Qarabağda, Xankəndidə, Şuşada, Laçında, Kəlbəcərdə dalğalanan üçrəngli Bayraq bu həqiqətin simvoludur.
Bərpa və dirçəlişimizin başlanğıcının 5 ili mübarək olsun! Biz xalq kimi sübut etdik ki, sülh yaratmaq da müharibə aparmaq qədər böyük hünər tələb edir. Hünərimizin 5 ili mübarək olsun!
Bölmənin digər xəbərləri
