QUŞ QRİPİ HAÇALANMIŞDIR
AZƏRTAC xarici KİV-lərə istinadla xəbər verir ki, ABŞ-ın Atlanta şəhərində keçirilən yoluxucu xəstəliklər üzrə beynəlxalq konfransda Amerika alimləri bildirmişlər ki, quş qripi virusu iki müxtəlif virusa parçalanmışdır. Buna görə də pandemiya başlanarsa, onun öhdəsindən gəlmək nəzərdə tutulduğundan da çətin olacaqdır. Həm quşlar, həm də insanlar üçün iki müxtəlif vaksin hazırlamaq lazım gələcəkdir. Çünki virusun bir növünün vaksini digər növündən müdafiəni təmin etməyəcəkdir. Amerika virusoloqları 2003-2005-ci illərdə bu virusa yoluxan quşlar və insanlardan götürülən 300 nümunəni analiz edərək, onların arasında ciddi fərqlər tapmışlar. Birinci ştamm 2003-2004-cü illərdə Vyetnam, Kamboca və Tailandda insanların yoluxmasına səbəb olmuşdur. 2005-ci ildə İndoneziyada tüğyan edən ikinci ştammı birincinin “qardaşı” adlandırmışlar. Ümumi əcdada malik bu viruslar genetik cəhətdən fərqlənir. Bu, vaksin yaradılmasını xeyli çətinləşdirir. Lakin bir virusun vaksini ikincinin təsirini azaltmağa qadirdir.
Avropada tələf olan quşlarda da genetik baxımdan iki müxtəlif virus aşkar edilmişdir. Deməli, quşların eyni vaksinlə peyvənd olunması da qripin yayılmasının qarşısını səmərəli surətdə ala bilməz.
Bölmənin digər xəbərləri
