- Möhtərəm mətbuat nümayəndələri! 

Azərbaycanı ziyarət etməkdən və cənab Prezident Heydər Əliyevlə bir arada olmaqdan böyük bir səadət və şərəf duymaqdayam. Cənab Heydər Əliyevin rəhbərliyi altında Azərbaycanın əldə etdiyi inkişaf və nailiyyətlər həmişə bizim diqqət mərkəzimizdədir. Bu gün cənab Heydər Əliyevlə son dərəcə faydalı danışıqlar apardıq. Türkiyə ilə Azərbaycan arasında dərin qardaşlıq və dostluq münasibətləri mövcuddur. Kifayət qədər yüksək səviyyədə olan ikitərəfli münasibətlərimizin daha da inkişaf etdirilməsinin ölkələrimizin mənafeyi üçün mühüm nəticələr doğuracağına inanırıq. Ürəkdən inanırıq ki, bu ziyarətimiz də əlaqələrimizin daha da inkişafına mühüm töhfə verəcəkdir. Türkiyə Azərbaycanla əlaqələrini və əməkdaşlığını daha da inkişaf etdirmək əzmindədir. Cənab Əliyevin iş başına gəlməsindən bəri Azərbaycanın da eyni əzm və qərarlılıq içində olduğuna şahidik.

Cənab Prezidentə də dediyim kimi, biz qardaş və dost olmaqla yanaşı, ölkələrimiz arasında bütün sahələrdə strateji bir həmrəylik və ortaqlıq mövcuddur. Bu cərcivədə bəzi məsələləri aşkarlıq şəraitində müzakirə etməyimizin lazımlı və faydalı olduğunu düşünürəm.

Bu səfərə gələndə özümlə təxminən 150 türk iş adamını, ictimai təşkilatların rəhbərlərini, o cümlədən Türkiyə Ticarət Palatasının rəhbərlərini də buraya gətirdim. Onlarla bərabər, 50-yə yaxın mətbuat işçisi də bu səfəri işıqlandırmaq üçün buraya gəlmişdir. Dörd nazirimiz, Ədalət və İnkişaf Partiyası sədrinin bəzi müavinləri, müşavirlərimiz mənimlə bərabərdirlər. Bu da Azərbaycana səfərimizə verdiyimiz böyük əhəmiyyətə bir sübutdur.

Hörmətli mətbuat nümayəndələri!

Bakı-Tbilisi-Ceyhan layihəsinin həyata keçirilməsində ölkələrimizin gərgin səyləri artıq öz bəhrəsini vermişdir. Marşrutun haradan keçməsi barədə Gürcüstanda yaşanan problemin aradan qaldırılması sevindirici bir hadisədir. Türkiyə bundan sonra belə problemlərin ortaya çıxmaması üçün məsələni ciddi şəkildə izləyəcəkdir.

Bir az əvvəl bu barədə möhtərəm Prezidentmizə də fikrimi bildirdim. Bizim zənnimizcə, 2005-ci il çox uzaqdır. Biz zamana qarşı yarışmağa məcburuq. Bu işi nə qədər qısa müddət ərzində həll edə bilsək, o qədər çox uğur qazanacağıq.

Bundan sonrakı əsas işimiz isə Bakı-Ərzurum qaz kəmərinin tikintisini gercəkləşdirməkdir. Bu layihənin həyata keçirilməsi nəticəsində Azərbaycan qazı Türkiyə üzərindən Avropaya nəql ediləcəkdir. Sabah terminala gedərək, bu işlərə nə qədər böyük əhəmiyyət verdiyimizi əyani şəkildə göstərəcəyik.

2000-ci ildə ölkələrimiz arasında olan 326 milyon dollarlıq ticarətin həcmi 2001-ci ildə 295 milyon dollara düşmüşdür. Bu da 11 faizlik bir azalma deməkdir. Təəssüf ki, bu meyl 2002-ci ildə də davam etmişdir. Digər tərəfdən, Azərbaycana qoyulan sərmayəmiz 2001-ci ildə 723 milyon dollar təşkil etmişdir. Biz Azərbaycanda aparılan iqtisadi islahatları dəstəkləyir və imkanımız daxilində ona kömək etməyə çalışırıq. Bununla bərabər, inanırıq ki, vergi, gömrük, maliyyə və nəqliyyat bölmələrində mövcud olan problemlər Azərbaycanın möhtərəm baş nazirinin göstərişləri ilə aradan qaldırılacaqdır.

Biz ortaq bir mədəniyyətə mənsubuq. Bu mənada mədəniyyət sahəsində də atacağımız ciddi addımlar var. Ona görə də mədəniyyət nazirimizi də özümlə gətirdim. Mədəni əlaqələr sahəsində aramızdakı münasibətləri daha da möhkəmləndirəcəyimizə inanıram.

Daxili işlər sahəsində də bəzi müştərək addımlar atmalıyıq. Daxili işlər nazirimiz də mənimlə birlikdədir. Daxili işlər nazirliklərimiz arasında əməkdaşlıq daha da qüvvətləndiriləcəkdir. Xarici işlər nazirimiz də nümayəndə heyətimin tərkibindədir. Nazirimiz Azərbaycanda həmkarları ilə lazım olan məsələləri müzakirə edəcəkdir. Mən inanıram ki, sabah bütün bu sahələrdə geniş danışıqlar gedəcəkdir.

Öz dəyərli vaxtını bizimlə görüşə ayırdığı üçün sizin hüzurunuzda cənab Prezident Heydər Əliyevə nümayəndə heyətimiz adından öz dərin minnətdarlığımı bildirirəm. Sağ olun.

X X X

Daha sonra Azərbaycan Prezidenti Heydər Əliyev və Rəcəb Tayyib Ərdoğan jurnalistlərin suallarına cavab verdilər.

SUAL: Cənab Ərdoğan, bu sualı buradakı bütün türk jurnalistləri adından verirəm. Biz Türkiyədən yola düşdükdən dərhal sonra hakim Kanatoğlunun bir açıqlaması oldu. Onun sözlərindən belə çıxır ki, 3 noyabr seçkilərindən sonra Siirt vilayətində keçiriləcək təkrar seçkilərdə də siz namizəd ola bilməyəcəksiniz. Bunun üçün seçicilərin siyahılarının yenidən tərtib edilməsi kimi maneələr var. Bu barədə sizin fikriniz necədir?

RƏCƏB TAYYİB ƏRDOĞAN: Mən bu suala Türkiyəyə qayıtdıqdan sonra cavab vermək istərdim.

SUAL: Cənab Ərdoğan, Azərbaycan-Türkiyə əlaqələrinin indiki səviyyəsini necə qiymətləndirirsiniz? Rəhbərlik etdiyiniz partiya hakimiyyətə gəldikdən sonra bu əlaqələri necə inkişaf etdirəcək? Azərbaycanın hazırkı inkişafı və perspektivləri Türkiyədən necə görünür?

RƏCƏB TAYYİB ƏRDOĞAN: Bir az əvvəl də dediyim kimi, bu günə qədər olan münasibətləri kifayət qədər parlaq hesab etmirik. Həm siyasi, həm iqtisadi, həm də mədəni sahələrdə münasibətləri qüvvətləndirməliyik. Bir az əvvəl möhtərəm Prezidentimiz Heydər Əliyevə də söylədim. Biz üzərimizə düşən hər şeyi etməyə hazırıq. Mən bu məsələ ilə bağlı hörmətli baş nazirimiz Abdullah Gülün salamlarını və düşüncələrini də çatdırmaq istəyirəm. Mənimlə eyni təyyarədə gələn iş adamları və burada çalışan türk iş adamları Azərbaycana daha çox sərmayə qoymağı arzulayırlar. Onlar möhtərəm Prezident Heydər Əliyevə ümidvardırlar. Bundan başqa, ölkələrimiz arasında ticarətin həcmini də sürətlə artırmalıyıq.

SUAL: Cənab Prezident, cənab sədr, mən hər ikinizə eyni sualla müraciət etmək istəyirəm. Azərbaycan-Türkiyə münasibətlərində bir sıxıntı və ya problem olubmu, əgər olubsa, bu, aradan qaldırıldımı? Möhtərəm Heydər Əliyev Türkiyə ilə əlaqələrində hər hansı problem ilə üzləşdimi, cənab Ərdoğan Azərbaycan-Türkiyə əlaqələrini kifayət qədər möhkəm hesab edirmi?

HEYDƏR ƏLİYEV: Mən dedim ki, Türkiyə-Azərbaycan əlaqələri çox yüksək səviyyədədir. Bunu bir daha təkrar edirəm. Amma problem deyəndə, problemsiz həyat olmur. Problem olur və biz onu həll edirik. Türkiyə ilə Azərbaycan arasında həll edilə bilməyəcək problem yoxdur, olmayıbdır. Keçmişdə bir-iki xətalar baş vermişdir. Onlar da məlumdur. Onları yada salmaq istəmirəm. Ancaq bizim dövlətlər arasında, hökumətlər arasında həllini tapa bilməyən problem yoxdur. Problemləri biz birlikdə həll edirik.

RƏCƏB TAYYİB ƏRDOĞAN: Mən də cənab Prezidentin sözləri ilə razıyam. Onu da əlavə etmək istəyirəm ki, keçmişdə olmuş xətaları gələcəyə aparmaq siyasətin xarakterinə ziddir. Siyasət əsla kin qəbul etməz. Xüsusilə, qardaşlar arasında bu, əsla mümkün deyildir. Biz bunların hamısının üstündən keçib gedirik, tariximizdə yeni səhifələr açaraq, aramızdakı münasibətləri, ticarətin həcmini artıraraq, həmrəylik içində gələcəyə addımlayırıq və addımlayacağıq.

SUAL: Cənab Ərdoğan, 15 ilə yaxın davam edən Dağlıq Qarabağ münaqişəsində Türkiyə hər zaman Azərbaycanın ədalətli mövqeyini dəstəkləyibdir. Amma Avropa və Amerika Birləşmiş Ştatlarının bəzi siyasi və iqtisadi dairələri, bir sıra maliyyə qurumları Türkiyəyə Ermənistanla diplomatik əlaqələri qurmaq, iqtisadi münasibətlər yaratmaq üçün təzyiqlər göstərirlər. Dağlıq Qarabağ problemi həll edilmədiyi təqdirdə, Ermənistanın Türkiyəyə ərazi iddiaları irəli sürdüyü bir halda Türkiyə bu addımı atacaqmı? Dağlıq Qarabağ münaqişəsində Azərbaycana dəstəyini davam etdirəcəkmi?

RƏCƏB TAYYİB ƏRDOĞAN: Bu məsələ ilə əlaqədar Türkiyənin bugünə qədər yürütdüyü siyasət məlumdur. Biz heç vaxt azəri qardaşlarımızı incidəcək bir addım atmadıq. Bu, mümkün də deyildir. Biz cənab Heydər Əliyev ilə Robert Koçaryan arasında davam edən danışıqların Azərbaycan üçün xeyirli bir nəticə ilə başa çatmasını diləyirik. Minsk posesini müsbət bir mexanizm olaraq qəbul edirik, ancaq bir nəticə verməməsini də təəccüblə qarşılayırıq. Bu baxımdan Türkiyə bugünə qədər yürütdüyü siyasəti bundan sonra da davam etdircəkdir. Biz hər zaman azəri qardaşlarımızın yanında olacağıq.

X X X

Prezidentin İcra Aparatının rəhbəri Ramiz Mehdiyev, baş nazirin müavini Abid Şərifov, xarici işlər naziri Vilayət Quliyev, daxili işlər naziri Ramil Usubov, iqtisadi inkişaf naziri Fərhad Əliyev, yanacaq və energetika naziri Məcid Kərimov, mədəniyyət naziri Polad Bülbüloğlu, Dövlət Neft Şirkətinin prezidenti Natiq Əliyev və birinci vitse-prezidenti İlham Əliyev, Prezidentin Katibliyinin rəisi Dilarə Seyidzadə, Prezidentin İcra Aparatının şöbə müdiri Novruz Məmmədov, Türkiyənin ölkəmizdəki səfiri Əhməd Ünal Çeviköz, Azərbaycanın Ankaradakı səfiri Məmməd Əliyev, Türkiyə nümayəndə heyətinin üzvləri mətbuat konfransında iştirak edirdilər.

X X X

Azərbaycan Respublikasının Prezidenti Heydər Əliyevin adından yanvarın 7-də “Ulduz” sarayında Türkiyənin Ədalət və İnkişaf Partiyasının sədri Rəcəb Tayyib Ərdoğanın şərəfinə ziyafət verilmişdir.

AZƏRTAC

Foto Oqtay Aydınoğlunun və

Rafiq Bağırovundur