RƏFİQ ZƏKA XƏNDANIN XATİRƏ GECƏSİ
Azərbaycan Dövlət MuğamTeatrında Beynəlxalq Atatürk Mükafatı laureatı, Azərbaycan Respublikasının əməkdar incəsənət xadimi və Dövlət Mükafatı laureatı, şair Rəfiq Zəka Xəndanın xatirə gecəsi keçirilmişdir.
AZƏRTAC xəbər verir ki, mərasimin əvvəlində Rəfiq Zəkanın səsi olan lent yazısı səsləndirilmişdir. Muğam Teatrının direktoru və gecənin aparıcısı Arif Qazıyev, Azərbaycan Yazıçılar Birliyinin sədri Anar, xalq yazıçısı Vaqif Səmədoğlu, akademik Bəkir Nəbiyev, Bülbül adına Orta İxtisas Musiqi Məktəbinin direktoru Nigar Cərullaqızı, şair Sabir Rüstəmxanlı və başqaları görkəmli şairin həyat və yaradıcılığı, elmi əsərləri haqqında söz açmışlar. Onlar Türkiyə-Azərbaycan ədəbi əlaqələrinin inkişafına töhfələr vermiş, Türkiyənin milli şairi, Fəxri akademiki, İstanbulun Fəxri vətəndaşı kimi yüksək adlara layiq görülmüş, həyatdan vaxtsız getmiş Rəfiq Zəka Xəndan ilə bağlı xatirələrini danışmışlar.
Xalq artistləri İlhamə Quliyeva, Elmira Rəhimova, Teymur Mustafayev, Əminə Yusifqızı və başqaları Rəfiq Zəkanın şeirlərini və sözlərinə bəstələnmiş mahnıları ifa etmişlər.
Gecənin sonunda Rəfiq Zəkanın ailəsi adından həyat yoldaşı Nailə xanım mərasimi təşkil edənlərə, incəsənət ustalarına, bütün iştirakçılara dərin təşəkkür və minnətdarlığını bildirmişdir.
Bölmənin digər xəbərləri
