RİQADA İĞTİŞAŞLAR DAVAM EDİR
Riqa, 14 yanvar (AZƏRTAC). LETA Agentliyi xəbər verir ki, Latviya polisi Riqada baş vermiş iğtişaşlarla əlaqədar həyəcan elan etmiş və gücləndirilmiş iş rejiminə keçmişdir.
Riqanın qədim hissəsində Seymin buraxılması tələbi ilə izdihamlı mitinq keçirilmişdir. Əsasən gənclərdən ibarət olan mitinq iştirakçılarının əksəriyyəti sərxoş vəziyyətdə olmuşlar.
İğtişaş iştirakçıları binaların pəncərələrini sındırmış, avtomobillərin şinlərini deşmişlər. Latviya televiziyası xəbər verir ki, bir dəstə adam “Larviyas balzams” müəssisəsinin mağazasını qarət etmişdir.
İğtişaşlar minədək adamın Seymin binasına daxil olmaq cəhdindən sonra başlanmışdır. Polis onların parlamentin binasına girməsinin qarşısını almış və kütləni sıxışdırıb binadan uzaqlaşdıra bilmişdir.
Mitinqdən sonra polislə qarşıdurma bir neçə saat davam etmişdir. İğtişaş iştirakçıları polislərə daş, zibil konteynerləri və digər əşyalar atmışlar. Polis və xüsusi xidmət orqanları iğtişaş iştirakçılarını şəhərin mərkəzindən sıxışdırıb çıxara bilmişdir.
Zərərçəkənlər barədə dəqiq informasiya yoxdur. Riqa təcili yardım stansiyasının məlumatına görə, toqquşma nəticəsində 8 nəfər, o cümlədən polis işçiləri xəsarət almışdır.
Bölmənin digər xəbərləri
