Rumıniyada məşğulluq problemi dərinləşir
Buxarest, 22 aprel, AZƏRTAC
Rumıniya 2025-ci ildə Avropa İttifaqında (Aİ) məşğulluq səviyyəsi ən aşağı olan ölkələr sırasında yer alıb.
AZƏRTAC bu ölkə mətbuatında dərc olunan məlumatlara istinadla xəbər verir ki, Rumıniyada məşğulluq göstəriciləri həm ümumi, həm də gender bölgüsündə Aİ-nin orta göstəricilərindən geri qalır.
Rəsmi statistikaya əsasən, 2025-ci ildə Rumıniyada məşğulluq səviyyəsi təxminən 69 faiz təşkil edib ki, bu da İtaliya və Yunanıstanla birlikdə Aİ-də ən aşağı göstəricilər sırasındadır. Qadınlar arasında məşğulluq səviyyəsi isə daha aşağı olub və təxminən 59,5 faiz səviyyəsində qeydə alınıb.
Eyni zamanda, ölkədə boş iş yerlərinin sayı azalma tendensiyası göstərir. 2025-ci ildə orta illik vakansiya sayı təxminən 31 min olub ki, bu da əvvəlki illə müqayisədə azalma deməkdir.
Bununla belə, statistik göstəricilər real əmək bazarı vəziyyətini tam əks etdirmir. Rumıniyada əsas problem iş yerlərinin çatışmazlığı deyil, işçi qüvvəsinin uyğunluğu və mövcudluğu ilə bağlıdır. Şirkətlərin çoxu tikinti, logistika, istehsal və xidmət sektorlarında uzun müddət kadr tapa bilmədiklərini bildirir.
Mövcud vəziyyət əmək bazarında struktur uyğunsuzluqları ilə izah olunur. Bir tərəfdən işəgötürənlər vakansiyaları doldurmaqda çətinlik çəkir, digər tərəfdən isə iş qabiliyyətli əhalinin bir hissəsi ya əmək bazarından kənarda qalır, ya da təklif olunan iş şəraiti və əməkhaqqı ilə razılaşmır.
Əlavə olaraq, demoqrafik amillər də mühüm rol oynayır. Son illərdə Rumıniyada əmək qabiliyyətli əhalinin azalması, miqrasiya və qeyri-formal məşğulluğun geniş yayılması rəsmi göstəricilərin reallığı tam əks etdirməməsinə səbəb olur.
Beləliklə, Rumıniyanın əmək bazarında paradoksal vəziyyət formalaşıb. Rəsmi statistikada aşağı məşğulluq göstəriciləri qeydə alınsa da, real sektorda işçi çatışmazlığı müşahidə olunur. Bu isə əmək bazarının struktur problemlərinin və iqtisadi transformasiya proseslərinin davam etdiyini göstərir.
Bölmənin digər xəbərləri
