SİYASƏT
Rusiya ilə Azərbaycan arasında ticari-iqtisadi əməkdaşlığın vəziyyəti və perspektivləri müzakirə edilmişdir
Bakı, 21 noyabr (AZƏRTAC). AZƏRTAC xəbər verir ki, noyabrın 21-də “İnterfaks-Azərbaycan” agentliyinin mətbuat mərkəzində Rusiya Federasiyasının Azərbaycan Respublikasındakı ticarət nümayəndəsi Yuri Şedrinin mətbuat konfransı keçirilmişdir. Mətbuat konfransında “Baltika-Baku” MMC-nin baş direktoru Aleksey Skatin və Rusiyanın “Soqlasiye” sığorta şirkətinin ölkəmizdəki nümayəndəliyinin rəhbəri Emin Aslanov da iştirak etmişdir.
“Rusiya ilə Azərbaycan arasında ticari-iqtisadi əməkdaşlığın vəziyyəti və perspektivləri” mövzusuna həsr olunmuş tədbirdə çıxış edən Yuri Şedrin bildirmişdir ki, bu əməkdaşlıq davamlı inkişaf meylləri ilə fərqlənir. Son beş ildə təqribən iki dəfə genişlənmiş ikitərəfli əmtəə dövriyyəsi keçən il rekord səviyyəyə çataraq üç milyard dollardan çox olmuşdur. Hazırda Rusiyanın 500-dən çox müəssisə və təşkilatı Azərbaycanla xarici ticarət fəaliyyətinə cəlb edilmişdir. Onlardan təxminən 200-ü yüz faiz Rusiya kapitalı əsasında, 300-dən çoxu müştərək müəssisə formatında fəaliyyət göstərir.
Rusiya Dövlət Statistika Komitəsinin məlumatına görə 2012-ci ilin yanvar-sentyabr aylarında Rusiya ilə Azərbaycan arasında qarşılıqlı əmtəə dövriyyəsinin həcmi 2 milyard 315,4 milyon dollar və ya keçən ilin analoji dövrünün göstəricisi ilə müqayisədə 13,1 faiz çox olmuşdur. Bu müddətdə Rusiyadan Azərbaycana ixracın həcmi 17,7 faiz artaraq 1 milyard 975,4 milyon dollara, Azərbaycandan Rusiyaya idxal isə 7,9 faiz azalaraq 340 milyon dollara bərabər olmuşdur. Rusiya üçün ticarət saldosu müsbət - 1 milyard 635,4 milyon dollar təşkil etmişdir.
Y.Şedrin qeyd etmişdir ki, Rusiyadan ixrac edilən malların təqribən 90 faizi dərin emal məhsullarıdır. Rusiyadan ixracın strukturunda maşınlar, avadanlıq və nəqliyyat vasitələri, ərzaq, qara və əlvan metallar, metal prokatı, oduncaq və sellüloz-kağız məmulatı, kimya məhsulları, elektrik enerjisi üstünlük təşkil edir.
2012-ci ilin yanvar-sentyabr aylarında Rusiyadan metal və metal məmulatlar ixracı 2011-ci ilin yanvar-sentyabr ayları üçün müvafiq göstərici ilə müqayisədə 4,7 faiz artaraq 267,6 milyon dollara bərabər olmuşdur. Rusiyadan Azərbaycana ixracın ümumi həcmində bu əmtəə qrupunun payı 2011-ci ilin müvafiq dövrü üçün 31,1 faizə qarşı 28,8 faiz təşkil etmişdir. Kimya məhsulları ixracı 17,6 faiz, yanacaq-energetika malları ixracı 19,4 faiz artmışdır. Eyni zamanda ərzaq malları və kənd təsərrüfatı məhsullarının ixracı 3,4 faiz azalaraq 386,9 milyon dollara düşmüşdür. Bu, Rusiyanın ixrac bazarında yerli buğdanın Qazaxıstan buğdası ilə əvəz edilməsinin nəticəsidir.
Y.Şedrin demişdir ki, Azərbaycandan Rusiyaya ixracın ümumi həcmində ərzaq malları və kənd təsərrüfatı məhsulları üstünlük təşkil etmişdir - 55,4 faiz. Azərbaycandan Rusiyaya ixracın ümumi həcmində bu malların payı 18,3 faiz artaraq 188,4 milyon dollara çatmış, mineral məhsulların xüsusi çəkisi isə 11,8 faiz azalaraq 17,1 faizə bərabər olmuşdur. Bu onunla əlaqədardır ki, həmin müddətdə Rusiya bazarına əvvəl planlaşdırılan həcmdə Azərbaycan qazı göndərilməmişdir. Cari ilin 9 ayı ərzində Azərbaycandan Rusiyaya 944,9 milyon kub metr qaz göndərilmişdir.
Aleksey Skatin tədbir iştirakçılarına “Baltika-Baku” MMC-nin fəaliyyəti barədə məlumat verərək bildirmişdir ki, 4 il ərzində bu şirkət Azərbaycanın pivə bazarının 70 faizini əhatə etmişdir. Şirkət yerli “Xırdalan” pivə brendi xəttinin inkişaf etdirilməsini və bu məhsulu Gürcüstana, sonra isə Qara dəniz regionuna ixrac etməyi planlaşdırır.
Emin Aslanov bildirmişdir ki, 20 ildən bəri Rusiya bazarının liderlərindən biri olan “Soqlasiye” sığorta şirkəti son il yarımda Azərbaycanda fəaliyyət göstərir. Şirkətin nizamnamə kapitalı 160 milyon dollara, illik sığorta ödəmələrinin həcmi isə təqribən 500 milyon dollara bərabərdir. Şirkətin Azərbaycandakı fəaliyyətinin əsas istiqaməti təkrar sığortadır.