Rusiya nüvə doktrinasını yeniləyib
Moskva, 19 noyabr, AZƏRTAC
Rusiya hərbi kosmik hücum silahlarının, o cümlədən PUA-ların kütləvi şəkildə havaya qalxması və onların Rusiya sərhədini keçməsi barədə etibarlı məlumat əldə edərsə, nüvə silahından istifadə edə bilər.
AZƏRTAC xəbər verir ki, Rusiya Prezidenti Vladimir Putin yenilənmiş nüvə doktrinasının – “Nüvə silahının tətbiqinin qarşısının alınması sahəsində dövlət siyasətinin əsaslarının təsdiq edilməsi haqqında” Fərman imzalayıb. Doktrinanın əsas prinsipi nüvə silahının ölkənin suverenliyini qorumaq üçün son vasitə olmasından ibarətdir.
Fərmanda qeyd olunur ki, potensial düşmənin Rusiya və ya müttəfiqlərinə qarşı təcavüzündən qorunmanın təmin edilməsi ölkənin ən yüksək dövlət prioritetlərindən biridir. Sənəddə vurğulanır ki, nüvə silahının qarşısının alınması sahəsində dövlət siyasəti müdafiə xarakteri daşıyır.
Sənədə əsasən, hərbi koalisiyaya daxil olan hər hansı bir dövlətin Rusiyaya və ya onun müttəfiqlərinə qarşı təcavüzü bütövlükdə koalisiyanın təcavüzü hesab olunacaq. Bundan əlavə, qeyri-nüvə dövlətinin nüvə dövlətinin iştirakı, yaxud dəstəyi ilə Rusiyaya və ya onun müttəfiqlərinə qarşı təcavüzü onların birgə hücumu sayılacaq. Hərbi infrastrukturunu Rusiya ərazisinə yaxınlaşdıran hərbi koalisiyaların yaradılması və ya genişləndirilməsi ölkəyə qarşı təhlükə hesab olunacaq və bu təqdirdə də nüvə silahının qarşısının alınması strategiyası tətbiq edilə bilər.
Bu cür təhdidlərə potensial düşmən tərəfindən Rusiya sərhədləri yaxınlığında genişmiqyaslı hərbi təlimlərin planlaşdırılması və keçirilməsi də daxildir. Rusiya hərbi kosmik hücum silahlarının, o cümlədən PUA-ların kütləvi şəkildə havaya qalxması və onların Rusiya sərhədini keçməsi barədə etibarlı məlumat əldə edərsə, nüvə silahından istifadə edə bilər.
Rusiya Prezidentinin mətbuat katibi Dmitri Peskov nüvə silahının qarşısının alınması sahəsində dövlət siyasətinin əsaslarını təsdiq edən Fərmanı şərh edərək jurnalistlərlə bildirib ki, Rusiya dövlətinin nüvə silahının qarşısının alınması sahəsində siyasətinin əsasları həm də potensial düşmənlərin Rusiyaya və onun müttəfiqlərinə qarşı təcavüzü halında cavab tədbirlərinin qaçılmazlığını nümayiş etdirir. Onun sözlərinə görə, yeni sənəd bu sahədə dövlət siyasətini mövcud vəziyyətə uyğunlaşdırmaq ehtiyacından irəli gəlib. O, nüvə doktrinasının yenilənmiş variantının dərc olunmasının Vaşinqtonun Kiyevə Amerika raketləri ilə Rusiya ərazisinin dərinliklərinə hücum etməyə icazə verməsi ilə əlaqəsi barədə suala cavabında deyib ki, sənəd “vaxtında dərc edilib”.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
