RUSİYA XİN TƏKZİB EDİR

31.03.2006 [19:40]
Çap et
A⁺ A^-

Rusiyanın Xarici İşlər Nazirliyi Moskvanın kəşfiyyat məlumatlarını Səddam Hüseyn hökumətinə verdiyi barədə xəbərləri yoxlamış və təkzib etmişdir. AZƏRTAC “Novosti” agentliyinə istinadla xəbər verir ki, bunu XİN-in rəsmi nümayəndəsi Mixail Kamınin açıqlamışdır.

Onun sözlərinə görə, diplomatlar ABŞ tərəfinin verdiyi materialları diqqətlə yoxlamış və təqdim olunan faktların təsdiqini tapmamışlar.

Kamınin bildirmişdir ki, amerikalıların verdikləri materiallar İraqın vəzifəli şəxslərinin Rusiya səfiri ilə iki söhbəti əsasında hazırlanmışdır. O demişdir: “Halbuki Rusiya səfiri guya İraq rəhbərliyinə həmin məruzələri hazırlamış olan ölkə məmurları ilə görüşməmişdir”.

Rusiyanın İraq üçün casusluq etdiyi barədə məlumat ABŞ Birləşmiş Komandanlığının məruzəsində göstərilir. Məruzənin müəllifləri iddia edirlər ki, Rusiya ABŞ-ın Dohədəki Mərkəzi Komandanlığından amerikalıların İraqa müdaxiləsinə dair strateji planları barədə məxfi məlumatlar alır və onları Rusiyanın Bağdaddakı səfiri vasitəsilə İraq hökumətinə verirmiş.

ABŞ-ın dövlət katibi Kondoliza Rays rusiyalı həmkarı Sergey Lavrovdan bu məlumatlarla əlaqədar ciddi araşdırma aparılmasını xahiş etmişdir. Eyni zamanda, Pentaqonda vurğulamışlar ki, ABŞ bu cür araşdırmalar aparmır.

Rusiya nümayəndələri məruzədə irəli sürülən iddiaları qəti şəkildə təkzib etmişlər. Sergey Lavrov isə demişdir ki, qalmaqalın siyasi mənası var.