Saatlıda tir atıcılığı yarışı başa çatıb
Saatlı, 3 mart, Aydın Yavərzadə, AZƏRTAC
Saatlıda “İdman həftəsi” ilə bağlı silsilə tədbirlərin davamı olaraq tir atıcıları arasında yarış keçirilib. Hər atıcı 3 dəfə atış şansı ilə hədəfə atəş açıb.
Saatlı Rayon Gənclər və İdman İdarəsindən AZƏRTAC-ın bölgə müxbirinə bildirilib ki, idarənin, Saatlı “Gənclər evi” sosial xidmət müəssisəsinin və rayon Heydər Əliyev Mərkəzinin birgə təşkilatçılığı ilə reallaşan yarışda yeniyetmə və gənclərdən ibarət 30-a yaxın atıcı iştirak edib. Qalib mümkün olan 30 xaldan 21 xal toplayan Mirzəzadə Sənan Vüsal oğlu diplomla təltif olunub.
Qeyd edək ki, Gənclər və İdman Nazirliyi tərəfindən fevralın 27-dən martın 5-dək ölkə ərazisində “İdman həftəsi” keçirilir.