ELM VƏ TƏHSİL
“Sabahın alimləri” müsabiqəsi gənclərin elmi potensialını üzə çıxarır
Bakı,13 fevral, G.Məlikova, AZƏRTAC
Akademik Zərifə Əliyeva adına Liseyin şagirdlərinin iştirakı ilə “Sabahın alimləri” müsabiqəsinə təqdim etdiyimiz layihənin uğur qazanacağına əvvəldən inanırdıq. Qaliblər sırasında olduğumuz üçün cox böyük sevinc, fərəh hissi duyuruq. “Sabahın alimləri” müsabiqəsi gənclərin elmi potensialını üzə çıxarır, onlarda elmə marağı artırır. Uşaqlarla fəxr edirəm və ölkəmizi xaricdə layiqincə təmsil edəcəklərinə inanıram.
Bu sözləri “Sabahın alimləri” beşinci respublika müsabiqəsində fizika-astronomiya elmləri nominasiyası üzrə ikinci yeri qazanmış layihənin rəhbəri, Azərbaycan Milli Elmlər Akademiyası Radiasiya Problemləri İnstitutunun baş elmi işçisi Adil Abdullayev AZƏRTAC-a müsahibəsində deyib.
Bildirilib ki, liseyin şagirdləri Nigar və Mədət Sərdarlıların təqdim etdikləri “CoaSe və İnse əsasında Terahers tezlikli generator” adlı layihə münsiflər heyətinin birgə rəyi ilə, ABŞ-da keçirilən ənənəvi Intel ISEF-Intel Beynəlxalq Elm və Mühəndislik Sərgisində iştirak edəcək üç layihədən biridir.