SAĞLAMLIĞINIZI UNUTMAYIN
VAŞİNQTON. Yaponiyanın “Nihon” universitetinin alimləri belə bir qənaətə gəlmişlər ki, asta qaçışla müntəzəm məşğul olmaq nəinki insana ümumisağlamlığına müsbət təsir göstərir, həm də onun intellektual qabiliyyətini yüksəldir. Onlar apardıqları tədqiqatların nəticələri barədə Beynəlxalq Nevroloqlar Cəmiyyətinin San-Diyeqo şəhərində (ABŞ) keçirilmiş konfransında məlumat vermişlər.
İTAR-TASS-ın verdiyi xəbərə görə, Yaponiya həkimləri bir qrup sağlam gənci müayinədən keçirmiş və onlara üç ay ərzində həftədə iki-üç dəfə yarım saat asta qaçışla məşğul olmağı təklif etmişlər. Bütün eksperiment ərzində gənclər yaddaş və fəhm baxımından müntəzəm olaraq kompüter testlərindən keçmişlər. Nəticədə məlum olmuşdur ki, gənclərin, demək olar, hamısı üçaylıq sınağın sonunda testləri daha tez və xeyli yaxşı göstəricilərlə həll etmişlər.
Doğrudur, Yaponiya alimləri xəbərdarlıq edirlər ki, eksperimentin məşğələləri yarımçıq dayandırmış iştirakçıları tədricən öz əvvəlki intellektual səviyyəsinə qayıtmışlar.
Amerikanın Dyuk universitetinin tibb alimləri də fiziki hərəkətlərin insanın intellektual qabiliyyətinə müsbət təsir göstərdiyi barədə eyni qənaətə gəlmişlər. Onlar bir qrup yaşlı adamı müayinə etmişlər. Bu adamlar dörd ay müntəzəm və çox gərgin fiziki məşğələlərdən sonra hafizənin imkanları üzrə testlərdən böyük uğurla keçmişlər.
x x x
LONDON. Piylənmə hazırda Böyük Britaniyanın milli probleminə çevrilmişdir. Bütün Avropada həddindən artıq kök adamların ən yüksək faizi bu ölkədə qeydə alınmışdır. Onların sayı daim artmaqdadır. Hər beş ingilisdən biri piylənmədən əziyyət çəkir və Britaniya adaları sakinlərinin yarısından çoxunun çəkisi normadan artıqdır. Köklükdən əziyyət çəkən gənclərin sayı son on ildə iki dəfə çoxalmışdır. Lakin bü meylin kütləvi hal almasına baxmayaraq, cəmiyyət kök adamların problemlərinə, bir qayda olaraq, məhəl qoymur, bunu onların öz şəxsi problemləri hesab edir. Halbuki piylənmə diabet, ürək xəstəlikləri kimi ciddi azarlara səbəb olur.
Böyük Britaniyanın Səhiyyə Nazirliyi diqqəti bu kateqoriyadan olan adamlara yönəltmək, kök insanların müdafiəsinə qalxmaq üçün yeni xeyriyyə cəmiyyəti təsis etmişdir. Bu qurumun fonduna 400 min funt sterlinq ayrılmışdır. Onu yaradanlardan biri, professor Ceyn Uodlun dediyinə görə, həddən artıq kök adamlar Britaniya cəmiyyətində onların barəsində formalaşmış səhv təsəvvürlərlə mübarizə aparmalıdırlar. Bu məsələnin tədqiqinə bir neçə il vaxt sərf edən xanım Uodl kədərlə deyir: “Kök adamlar daim günahkarlıq hissi keçirirlər, çünki düşünürlər ki, tənbəlliklərindən, az hərəkət etdiklərinindən və çox yediklərindən kökəldiklərinə görə şəxsi məsuliyyət daşıyırlar. Günahkarlıq hissi artaraq, ayrı-seçkiliyə çevrilmiş və işdə, məktəbdə və hətta sağlamlıq mərkəzlərində bu insanlara qlnayıcı münasibət yaranmasına gətirib çıxarmışdır. Bu problem Britaniyada xüsusilə kəskin şəkildə durur, belə ki, ölkənin sakinlərini Avropanın ən şişman milləti adlandırmaq olar”.
x x x
BERLİN. AFR-də rekord qeydə alınmışdır: ötən il adambaşına alkoqolsuz içkilər istehlakı 256 litr olmuşdur ki, bu da 2000-ci ildəkindən 4 litr və ya 10 il əvvəlkindən 53 litr çoxdur.
Bunu ekspertlər də təsdiqləyirlər. Onlar bu müsbət meyldə vətəndaşların sağlam həyat tərzinə meylinin real təcəssümünü görürlər. Alkoqolsuz içkilər arasında mineral sular üstünlük təşkil edir - adambaşına təxminən 110 litr. “Koka-kola”nın və ya limonadın da müxtəlif növləri çox içilən içkilərdəndir. Meyvə şirələrinə isə meyl azdır.
x x x
Tərkibində əczaçılıqda geniş yayılmış kava bitkisi olan dərman preparatları Fransada qadağan edilmişdir. Buna səbəb qonşu Almaniya və İsveçrədə bu bitkinin təsiri nəticəsində qaraciyərin ciddi şəkildə zədələnməsi hallarının qeydə alınmasıdır. Belə hallardan biri hətta ölümlə nəticələnmişdir. Dörd xəstəyə isə təcili surətdə qaraciyər köçürmək lazım gəlmişdir.
Mütəxəssislərin fikrincə, preparatların təhlükəli təsiri müalicə kursundan hətta bir neçə ay sonra da təzahür edə bilər. Özü də qaraciyərin xəstəliyi bəzən çox sürətlə gedir. Kavadan hazırlanmış dava-dərmanları hətta qeyri-müntəzəm qəbul etdikdə də qaraciyərə pis təsir göstərə bilər.
Adətən, kava süzənək və sidik kisəsinin iltihabı zamanı qəbul edilən dərmanların tərkibində olur. İstiot fəsiləsindən olan kava, yaxud kava-kava Polineziya və Yeni Qvineya adalarında bitən koldur. Bəzən onu mayaotu bibərinin kökü adlandırırlar, çünki yerli sakinlər kavadan güclü kefləndirici içki hazırlayırlar.
İndi Fransanın səhiyyə orqanları, bəzi homeopatik dərmanlarda çox cüzi doza ilə işlədilməsi istisna olmaqla, qalan preparatlarda kavadan hər hansı şəkildə istifadəni qadağan etmişlər. Kavadan qida məhsullarına əlavə kimi istifadə edilməsinə də qəti qadağa qoyulmuşdur.
Kavadan hazırlanan dərmanlar Qərbdə çoxdan və geniş yayılmışdır. Onlar hətta supermarketlərdə, pəhriz yeməkləri mağazalarında da satılır, bu dərmanları indiyədək İnternet vasitəsilə sifariş vermək olar.
x x x
PEKİN. Şimali Çinin şəhərlərində qrip tüğyan edir. Lakin mütəxəssislərin fikrincə, epidemiya ümummilli problemə çevrilməyəcəkdir.
Həkimlər əhalini öz orqanizmini virusa qarşı daha dözümlü etmək üçün qalın geyinməyə, daha çox su içməyə, otağın havasını daim soyuq hava ilə dəyişməyə və fiziki hərəkətlərlə məşğul olmağa çağırırlar.
Hazırda Çinin 20 əyalətində, muxtar rayonunda və mərkəzi hakimiyyətin tabeliyində olan şəhərlərində qriplə xəstələnmə hallarını müşahidə etmək üçün xüsusi tibb stansiyaları yaradılmışdır. Onlar bu virusun bir neçə növünü aşkara çıxarmışlar. Lakin tədbirlər görülməsinə baxmayaraq, qripə tutulanların sayı xeyli dərəcədə artır.
Bölmənin digər xəbərləri
