İQTİSADİYYAT
Sahibkarlara 402 min manat məbləğində güzəştli kredit verilmişdir
Tovuz, 18 aprel (AZƏRTAC). İqtisadi İnkişaf Nazirliyinin Sahibkarlığa Kömək Milli Fondu (SKMF) “Regionlarda sahibkarlığın inkişafına dövlət dəstəyi” mövzusunda növbəti tədbirini Tovuz rayonunda keçirmişdir. Tədbirdə Gəncə-Qazax iqtisadi rayonunda fəaliyyət göstərən 300-dək sahibkar iştirak etmişdir.
Nazirliyin mətbuat xidmətindən AZƏRTAC-a bildirmişlər ki, əvvəlcə əsas hissəsi SKMF-nun güzəştli kreditləri hesabına maliyyələşdirilmiş "Premyer" MMC-nin Tovuz rayonundakı tutumu 1,5 min ton olan müasir soyuducu anbar kompleksində aparılan tikinti işlərinə baxış keçirilmişdir.
Sonra öz işinə başlayan tədbirdə sahibkarlar üçün güzəştli kreditlərdən istifadə mexanizmi, investisiya layihələrinin hazırlanmasına dair treninq keçirilmiş, SKMF-nun internet saytı barədə ətraflı məlumat verilmişdir.
Tədbirdə Tovuz rayonunun iqtisadi potensialına uyğun olaraq, güzəştli kreditlər hesabına maliyyələşdirilməsi nəzərdə tutulan intensiv üzüm bağlarının salınması tingçilik təsərrüfatlarının, məhsuldar toxumluq kartof istehsalı təsərrüfatının yaradılması, məhsuldar toxumlardan istifadə etməklə kartof istehsalının təşkili və müasir texnologiyaya əsaslanan həcmli istixana komplekslərinin yaradılması üzrə nümunəvi investisiya layihələrinin təqdimatı keçirilmişdir.
Tovuz Rayon İcra Hakimiyyətinin başçısı Tofiq Zeynalov regionların sürətlə inkişaf etdiyini, dövlət başçısının sərhəd rayonlarının inkişafına göstərdiyi xüsusi diqqət və qayğı nəticəsində məşğulluq səviyyəsinin artdığını, sahibkarlıq fəaliyyətinin genişləndiyini, həmçinin kənd təsərrüfatının daha da inkişaf etdiyini qeyd etmişdir.
İqtisadi İnkişaf Nazirliyinin Sahibkarlığın inkişafı siyasəti şöbəsinin müdir müavini Elçin İbrahimov ölkədə həyata keçirilən məqsədli dövlət proqramlarının regionların inkişafında xüsusi əhəmiyyətini qeyd etmişdir.
Nazirliyin Gəncə-Qazax regional bölməsinin müdiri Arzu Hacıyev isə məqsədli dövlət proqramlarında nəzərdə tutulmuş tədbirlərin həyata keçirilməsi istiqamətində iqtisadi regionda görülmüş işlər, həyata keçirilməsi nəzərdə tutulmuş tədbirlər barədə məlumat vermişdir.
Sahibkarlığa Kömək Milli Fondunun icraçı direktoru Şirzad Abdullayev Fondun fəaliyyəti, güzəştli kreditlər hesabına bölgələrdə, o cümlədən Gəncə-Qazax iqtisadi rayonunda həyata keçirilən layihələr barədə məlumat vermişdir.
Sonra müvəkkil kredit təşkilatları vasitəsilə Tovuz və ətraf rayonlarda fəaliyyət göstərən 31 sahibkarlıq subyektinə 402 min manat güzəştli kredit verilmişdir. Bu kreditlər hesabına 62 yeni iş yerinin yaradılması nəzərdə tutulur.
Tədbirdə çıxış edən sahibkarlar ölkədə özəl bölmənin inkişafına yaradılmış şəraitə, göstərilən diqqət və qayğıya görə dövlət başçısına minnətdarlıqlarını bildirmişlər.