CƏMİYYƏT
Səbailli yeniyetmələr yay düşərgəsinə yola salınıblar VİDEO
Bakı, 3 avqust, AZƏRTAC
Yeniyetmə və gənclərin yay istirahətinin səmərəli və yaddaqalan təşkilini hər zaman diqqət mərkəzində saxlayan Səbail Rayon İcra Hakimiyyəti hər il olduğu kimi, bu il də bir sıra tədbirlər hazırlayıb.
Rayon icra hakimiyyəti və Daxili İşlər Nazirliyinin Daxili Qoşunlar Komandanlığının artıq 10-cu dəfədir həyata keçirilən birgə layihəsi əsasında və “İstək” liseyinin iştirakı ilə şəhərin mərkəzindəki “Sahil bağı”nda yeniyetmələrin “Şahinlər” yay istirahət düşərgəsinə yola salınması ilə əlaqədar tədbir keçirilib. Quba şəhərinin mənzərəli yerində yaradılan hərbi-vətənpərvərlik təmayüllü yay istirahət düşərgəsinə rayonun Qarabağ müharibəsi əlilləri və veteranlarının, aztəminatlı və imkansız ailələrin uşaqları, təhsildə və idmanda fərqlənən şagirdlər, həmçinin “SOS-Azərbaycan” uşaq kəndində tərbiyə alan uşaqlar daxil olmaqla, ümumilikdə 200 yeniyetmə yola salınıb.
Səbail Rayon İcra Hakimiyyətinin başçısı Asif Əsgərov tədbirdə çıxış edərək Prezident İlham Əliyevin yeniyetmə və gənclərimizin sağlam böyüməsi, gənc nəslin vətənə məhəbbət, Azərbaycan dövlətçiliyinə sədaqət ruhunda tərbiyə olunması istiqamətində gördüyü işlərdən, Azərbaycanın birinci xanımı, Heydər Əliyev Fondunun prezidenti Mehriban Əliyevanın uşaq və yeniyetmələrə diqqət və qayğısından, bu istiqamətdə həyata keçirdiyi layihələrdən danışıb. O, həmçinin Səbail rayonunda görülən işlər və həyata keçirilən layihələr barədə məlumat verib.
İstirahət günlərində şagirdlərin Qubanın görməli yerlərinə, meşələrə, rayonun tarixi guşələrinə gəzintiləri təşkil ediləcək. Onlar həm də Daxili Qoşunların Qubadakı hərbi hissəsi ilə tanış olacaqlar.
Bu il də düşərgədə uşaqların təlim-tərbiyə işləri ilə rayonun orta məktəblərində çalışan idman və ibtidai-hərbi hazırlıq müəllimləri məşğul olacaqlar. Onlarla yanaşı, Daxili Qoşunların zabitləri, çavuş və əsgərlərindən ibarət qrup düşərgəyə təhkim olunub. Onlar burada aparılacaq hərbi-hazırlıq, təlim-tərbiyə işlərində yaxından iştirak edəcəklər.
Qeyd edilib ki, səbailli yeniyetmələrin yay istirahəti və hərbi-vətənpərvərlik tərbiyəsinin möhkəmləndirilməsi istiqamətində növbəti belə tədbir avqustun 17-də Müdafiə Nazirliyi ilə birgə Qusar rayonunda da təşkil olunacaq.
Daxili Qoşunlar Baş İdarəsinin mənəvi-psixoloji hazırlıq şöbəsinin rəisi, polkovnik Mətləb Qənbərov çıxış edərək uşaqların mənalı və yaddaqalan istirahəti üçün görülən işlərdən danışıb və onlara xoş istirahət arzulayıb.
Yola düşməzdən əvvəl yeniyetmələr ulu öndər Heydər Əliyevin abidəsini ziyarət edib, önünə gül dəstələri düzüblər.