SƏFƏR BAŞA ÇATDI
Baş nazir İlham Əliyev və Türkiyənin energetika və təbii ehtiyatlar naziri Hilmi Gülər Ankaranın Esenboğa hava limanında jurnalistlərin suallarına cavab verdilər.
SUAL: Cənab Baş nazir, səfərin nəticələrini necə qiymətləndirirsiniz?
İLHAM ƏLİYEV: Mən işgüzar səfərin nəticələrindən çox razıyam. Azərbaycanla Türkiyə arasında ikitərəfli münasibətlər çərçivəsində bir sıra məsələlər müzakirə olundu, geniş fikir mübadiləsi aparıldı. Həm hörmətli Prezident cənab Əhməd Necdət Sezərlə, hörmətli Baş nazir cənab Rəcəb Tayyib Ərdoğanla, həm də hörmətli xarici işlər naziri cənab Abdullah Güllə və energetika və təbii ehtiyatlar naziri Hilmi Gülərlə görüşlər keçirdik. Bütün bu görüşlərdən və mənə göstərilən hörmət və diqqətdən çox razıyam. Hesab edirəm ki, bu səfər iki ölkə arasında mövcud olan münasibətlərdə yeni bir mərhələ, addım olacaqdır.
Bir daha əmin olduq ki, Türkiyə və Azərbaycan bütün məsələlərdə vahid mövqedən çıxış edir və bu siyasət bundan sonra da davam etdiriləcəkdir.
SUAL: İlham müəllim, müxalifət mətbuatının Sizin bu səfərinizi Türkiyədə dəstək axtarmaq kimi şərh etməsi nə dərəcədə doğrudur?
İLHAM ƏLİYEV: Mən müxalifət yazılarına fikir vermirəm və məsləhət görürəm ki, siz də onlara fikir verməyəsiniz. Onların dediklərinə şərh vermək istəmirəm. O ki qaldı mənim buraya səfərimə, bildiyiniz kimi, mən Milli Məclis tərəfindən bu vəzifəyə təsdiq olunduqdan sonra məni ilk təbrik edən Türkiyənin Baş naziri cənab Ərdoğan oldu. O, təbrik etdikdən sonra məni Türkiyəyə dəvət etdi. Bu səfəri onun dəvəti əsasında həyata keçirirəm. Burada hansısa başqa məqam axtarmaq lazım deyildir. Türkiyə ilə Azərbaycan arasında ikitərəfli münasibətlər elə səviyyədədir ki, bu səfərlər sıx-sıx keçirilə bilər və əminəm ki, gələcəkdə də keçiriləcəkdir. Biz bir millət, iki dövlətik, aramızda yalnız dostluq, qardaşlıq və qarşılıqlı anlaşma hökm sürür.
SUAL: Hilmi bəy, Bakı-Tbilisi-Ceyhanla əlaqədar müzakirələr oldumu?
HİLMİ GÜLƏR: Bəli, Bakı-Tbilisi-Ceyhan bizim çox böyük əhəmiyyət verdiyimiz layihədir. Bunu həm Prezidentimiz, həm Baş nazirimiz, həm də biz çox yaxından izləyirik. Layihə tam vaxtında başa çatacaqdır. Eyni zamanda, biz “Şahdəniz” layihəsinə də çox böyük əhəmiyyət veririk. Bu layihələr paralel olaraq həyata keçiriləcəkdir.
SUAL: Hazırda Rusiya ilə Türkiyə arasında təbii qazın nəqli sahəsində bir əməkdaşlıq vardır. Azərbaycan qazının Türkiyəyə nəqli üçün problemlər yaratmayacaqmı?
HİLMİ GÜLƏR: Xeyr, bu layihələr bir-birindən fərqlənir. “Sahdəniz” yatağından çıxarılan təbii qaz həm Türkiyədə istifadə olunacaq, həm də Avropaya nəql ediləcəkdir. Avropa Birliyi bu qazın tez bir zamanda qitə ölkələrinə nəql olunmasını istəyir. Yəni “Şahdəniz” layihəsinin iki əhəmiyyəti var: birincisi, Türkiyənin ehtiyaclarını təmin etmək, ikincisi, Azərbaycanın təbii qazını Avropaya çatdırmaqdır.
X X X
Esenboğa hava limanında Baş nazir İlham Əliyevi Türkiyənin energetika və təbii ehtiyatlar naziri Hilmi Gülər, Ankara valisi Yəhya Gur, Azərbaycanın Türkiyədəki səfiri Məmməd Əliyev yola saldılar.
Baş nazir İlham Əliyev sentyabrın 8-də gecə Bakıya gəldi.
Bölmənin digər xəbərləri
