SƏFƏR BAŞA ÇATDI
“Qırmızı körpü” nəzarət-buraxılış məntəqəsində Qazax rayonu ictimaiyyətinin nümayəndələri dövlətimizin başçısını böyük səmimiyyətlə və mehribanlıqla qarşıladılar.
Azərbaycan Dövlət Sərhəd Xidmətinin rəisi, Sərhəd Qoşunlarının komandanı general-leytenant Elçin Quliyev Azərbaycan Prezidenti, Ali baş komandan İlham Əliyevə nəzarət-buraxılış məntəqəsinin fəaliyyəti, onun işinin təkmilləşdirilməsi üçün görülən tədbirlər, Azərbaycanın və Gürcüstanın sərhəd xidmətləri arasında əlaqələr barədə məruzə etdi.
X X X
Prezident İlham Əliyev burada Gürcüstana dövlət səfərinin yekunlarına dair brifinq keçirdi.
SUAL: Cənab Prezident, Gürcüstana səfəriniz barədə təəssüratınız necədir?
CAVAB: Gözəldir, mən artıq bu gün bu barədə danışdım. Mən səfərdən və imzalanan bütün sazişlərdən çox razıyam. Onlar bizim yaxınlığımızı, strateji tərəfdaşlığımızı, habelə əlaqələrimizi bundan sonra da birgə inkişaf etdirmək istəyimizi bir daha sübut etdi.
SUAL: Siz cənab Saakaşvili ilə hansı strateji məsələləri həll etdiniz?
CAVAB: Gürcüstan ilə Azərbaycan arasında təcili həll edilməli olan məsələlər yoxdur. Bizim bütün istiqamətlərdə qarşılıqlı anlaşmamız var, nəqliyyat strukturları, energetika layihələri çox fəal inkişaf etdirilir. Biz Gürcüstanda yaşayan azərbaycanlıların həyat və fəaliyyəti ilə bağlı məsələləri də müzakirə etdik. Biz onların yığcam yaşadıqları rayona getdik. Təhsillə, sərhədlə bağlı məsələlər var. Odur ki, indi biz onları həll edirik.
SUAL: Nə üçün Siz Gürcüstandan Qırmızı körpü vasitəsilə getməyi qərara aldınız?
CAVAB: Mən Gürcüstanda daha çox qalmaq istəyirdim.
SUAL: Prezidentin Sizə bağışladığı at xoşunuza gəldimi?
CAVAB: Çox gözəl atdır. Düşünürəm ki, bu atın artıq adı var. Adının nə olduğunu bilmirəm.
SUAL: Prezident Sizə sərhədi at belində keçməyi təklif etdimi?
CAVAB: Xeyr. Bu, yəqin gələn dəfə olacaqdır.
SUAL: Siz sabiq Prezident Şevardnadze ilə görüşdünüzmü?
CAVAB: Bəli, dünən görüşdük. Oturub söhbət etdik, olub-keçənləri xatırladıq. Mən ona özünü yaxşı hiss etməsi üçün cansağlığı arzuladım.
SUAL: Cənab Prezident, Gürcüstanda yaşayan azərbaycanlıların Sizə xahişləri olmuşdu. Onların hansılarını yerinə yetirmək mümkündür?
CAVAB: Bu məsələ geniş müzakirə olunubdur, o cümlədən Gürcüstan Prezidenti cənab Saakaşvili ilə. Bundan əvvəl bizim müştərək komissiya bu məsələlərə baxıbdır. Müxtəlif məsələlər var. Mən deyə bilməzdim ki, çox ciddi məsələlər var. Amma, əlbəttə, biz istərdik ki, azərbaycanlıların Gürcüstanda yaşamaları daha yüksək səviyyədə olsun, onlar işlə təmin edilsinlər, təhsil problemləri öz həllini tapsın. Hesab edirəm, biz bu barədə də çox vacib razılaşmalar əldə etdik.
Məsələn, tarix dərslikləri birgə hazırlanacaq, bu, çox vacibdir. Coğrafiya dərslikləri də. Burada, Gürcüstanda yaşayan azərbaycanlılar gərək Gürcüstan cəmiyyətinə daha sürətlə inteqrasiya olsunlar, bütün səviyyələrdə təmsil olunsunlar. Cənab Saakaşvili ilə bu barədə çox söhbət etdik. Onun da fikri belədir ki, gərək azərbaycanlılar icra orqanlarında, hüquq mühafizə orqanlarında, yerli özünüidarəetmə orqanlarında daha geniş tərkibdə təmsil olunsunlar. Bu istiqamətlərdə mühüm, önəmli addımlar atılacaqdır.
SUAL: Cənab Prezident, Sizcə, Mixail Saakaşvilinin siyasi iradəsi olacaqmı? Çünki əvvəllər hətta qubernator müavini vəzifəsində azərbaycanlılar olubdur. İndi isə təyin edilmirlər.
CAVAB: Bilirsiniz, bu, keçmişdə də olubdur, əgər siz o tarixə nəzər salsanız görərsiniz. Yəni bu, indiki zəmanənin hansısa əlaməti deyildir. Əksinə, mən hesab edirəm ki, indiki dövrdə bu məsələlərə daha ciddi münasibət var, daha ciddi diqqət var. Artıq azərbaycanlılar vəzifələrə irəli çəkilirlər. Nazir müavini vəzifəsinə, digər vəzifələrə. Gürcüstan Prezidentinin bu məsələ ilə bağlı fikirləri çox müsbətdir.
SUAL: Cənab Prezident, Azərbaycan iş adamlarının bu bölgələrə sərmayə qoyması məsələsi qaldırılmışdı. Siz bu barədə nə tövsiyə edirsiniz?
CAVAB: Mən bunu dəstəkləyirəm. Bu barədə Prezident Saakaşvili ilə söhbətimiz olubdur. Gürcüstanda da, Azərbaycanda da iqtisadiyyat bazar iqtisadiyyatı əsasında qurulur və liberal iqtisadiyyatdır. Ona görə bütün imkanlar var. Əlbəttə, mən istərdim ki, bizim iş adamlarımız buraya sərmayə qoysunlar, burada yaşayan azərbaycanlıları da bu işlərə cəlb etsinlər. Burada da yeni iş yerlərinin açılması istiqamətində addımlar atılsın. Yəni mən bunu dəstəkləyirəm. Amma, əlbəttə, bunu yəqin ki, iş adamları müəyyən etməlidirlər.
X X X
Azərbaycan Prezidenti İlham Əliyev iyunun 15-də respublikamızın Qazax, Ağstafa, Tovuz və Şəmkir rayonlarında oldu, axşam Gəncə şəhərinə gəldi.
(Dövlətimizin başçısının həmin rayonlarda və iyunun 16-da Gəncədə keçirdiyi görüşlər barədə ətraflı hesabat qəzetin növbəti nömrəsində dərc olunacaqdır).
X X X
Azərbaycan Prezidenti İlham Əliyev iyunun 16-da Bakıya qayıtdı.
Dövlətimizin başçısını Heydər Əliyev adına beynəlxalq hava limanında Prezident Administrasiyasının rəhbəri Ramiz Mehdiyev, Bakı Şəhəri İcra Hakimiyyətinin başçısı Hacıbala Abutalıbov qarşıladılar.
Bölmənin digər xəbərləri
