“Aqrar Tədarük və Təchizat” ASC ilə AZƏRTAC-ın birgə layihəsi: “Aqroturizm”

Bakı, 27 noyabr, AZƏRTAC

“Şəhərdən Kəndə” aqroekoturizm layihəsi çərçivəsində Lənkəran rayonuna tur təşkil olunub. Tur iştirakçıları bu rayonda yerləşən fermer təsərrüfatına, rayon icra hakimiyyəti tərəfindən təşkil olunan III Çay, çəltik və sitrus festivalına, eləcə də müxtəlif çay plantasiyalarına səfər etmək imkanı qazanıblar.

AZƏRTAC xəbər verir ki, yerli və xarici turistlərdən ibarət olan tur iştirakçıları əvvəlcə İstisu qəsəbəsində yerləşən fermer Rəftarə Şükürovaya məxsus “Citrus Valley” təsərrüfatına baş çəkib, müxtəlif sitrus meyvələrinin yetişdirilməsi prosesi ilə yaxından tanış olublar. Burada onlar sitrus meyvələrindən hazırlanan fərqli təamları (kivi turşusu, xurma turşusu, boranı turşusu və s.) dadıblar. Təbii kənd məhsulları və yerli yeməklərlə nahar edən turistlər, daha sonra sitrus bağını gəzərək meyvə toplayıblar. Həmçinin sitrus bağında yerləşən gölə səyahət də təşkil olunub.

Həmsöhbət olduğumuz tur iştirakçılarından Nərmin Məmmədova “Şəhərdən Kəndə” turunun istirahət üçün imkanlarının geniş olduğunu vurğuladı: “Daha əvvəl “Şəhərdən Kəndə”nin İsmayıllı turunda iştirak etmişdim. Bu dəfə isə Lənkəran turuna qoşuldum. Bu turlar həm təbiət əhatəsində istirahət etmək üçün, həm də kənd həyatını birgünlük də olsa, yaşamaq üçün çox əlverişlidir. Müxtəlif regionları gəzmək, orada yaşayan insanların həyat tərzlərini öyrənmək, fərqli yeməklər yemək mənə zövq verir. Burada qonaq olduğumuz təsərrüfatda ilk dəfə kivi turşusu yedim, çox xoşuma gəldi”.

Nahardan sonra isə qonaqlar rayonun Heydər Əliyev adına mədəniyyət parkında təşkil olunan III Çay, çəltik və sitrus festivalına yollanıblar. Burada onlar festival çərçivəsində təşkil olunan mədəni tədbirlərdə iştirak edib, müxtəlif sitrus meyvələrindən hazırlanan məhsullarla (şirniyyatlar, içkilər və s.), eləcə də regional mətbəxə məxsus yemək və yerli incəsənət nümunələri ilə tanış olublar. Turistlər regionda yaşayan insanların həyat tərzlərini əks etdirən müxtəlif kompozisiyaların nümayiş etdirildiyi stendlərə, o cümlədən “Şəhərdən Kəndə” stendinə baş çəkiblər. Burada onlara Kənd Təsərrüfatı Nazirliyi tabeliyində olan “Aqrar Tədarük və Təchizat” ASC tərəfindən həyata keçirilən “Şəhərdən Kəndə”, “Kənddən Şəhərə” və AFAQ layihələri barədə ətraflı məlumat verilib.

İlk dəfə Lənkərana gəldiyini qeyd edən tur iştirakçısı Zöhrab Quliyev isə turun festivalla eyni günə təsadüf etməsindən məmnunluğunu bildirdi: “Turumuzun festivalla eyni günə düşməsi məni sevindirdi. Festivalda çoxlu şəkil çəkdirdim və müxtəlif yeməklərdən daddım. Birinci dəfədir ki, Lənkərana gəlirəm. Hər zaman televiziyadan və dostlarımdan burada olan çay plantasiyaları və sitrus bağları haqqında eşidirdim. İndi isə özüm onları görməyə gəlmişəm”.

Tur çərçivəsində qonaqların festivaldan sonra baş çəkdikləri növbəti məkan isə “Yaşıl çay” MMC-yə məxsus çay plantasiyası olub. Burada turistlər çay bitkisinin əkilməsi və becərilməsi prosesləri barədə ətraflı məlumat alıblar.

“Gilan Tea” MMC-yə də gələn iştirakçılar çay emalı prosesi ilə yaxından tanış olub, müxtəlif çayları dequstasiya ediblər.

Qeyd edək ki, sosial layihə olaraq həyata keçirilən “Şəhərdən Kəndə” layihəsinin əsas məqsədi yerli kiçik və orta fermer təsərrüfatlarına dəstək göstərmək və turistlər üçün alternativ istirahət imkanı yaratmaqdır. Layihə çərçivəsində mütəmadi olaraq müxtəlif regionlarda yerləşən fermer təsərrüfatlarına turlar təşkil olunur. Aşağıdakı linklər vasitəsilə isə bu həftəsonu həyata keçiriləcək turlar barədə ətraflı məlumat ala bilərsiniz:

https://www.facebook.com/events/2430025367264579/

https://www.facebook.com/events/416860382316028/

https://www.facebook.com/events/442235576482989/

https://www.facebook.com/events/517414519114768/