ŞƏHİDLƏR YAD EDİLMİŞDİR
Azərbaycanın Özbəkistandakı səfirliyi Daşkənddəki Azərbaycan məscidində 20 Yanvar faciəsinin 12-ci ildönümü ilə bağlı mərasim keçirmişdir. Mərasimdə Özbəkistanda və Cənubi Qazaxıstanda yaşayan Azərbaycan diasporunun üzvləri, Azərbaycan mədəniyyət mərkəzinin və Ağsaqqallar Şurasının rəhbərləri, özbək xalqının nümayəndələri iştirak etmişlər.
Mərasimin əvvəlində Azərbaycan məscidinin mollası Mirtahir Talışxanov şəhidlərin ruhuna dua oxudu.
Azərbaycanın Özbəkistandakı səfiri Aydın Əzimbəyov sovet imperiyasının Azərbaycan xalqına qarşı törətdiyi faciədən danışdı. O dedi:
- Azadlıq və müstəqillik uğrunda mübarizə aparan xalqımızın ilk şəhidləri 20 yanvarda canlarını fəda etdilər. Bu gün xalqımızın tarixinə mübarizlik rəmzi kimi düşdü. O müdhiş gecə xalqımızın başına nə müsibətlər gəlmədi? Uşaqlar, qocalar, qadınlar, igid oğlanlarımız həlak oldu. 77 yaşlı Sürəyya Babayeva evdə xörək hazırlayarkən gülləyə tuş gəldi. Nə idi onun günahı? İmperiya əsgərləri qarşılarına keçəni güllələyirdilər. O gecə Azərbaycan xalqı ağır itkiyə məruz qaldı, amma ruhdan düşmədi, mətinləşdi, müstəqil dövlətini qurdu. Şəhidlərimiz də məhz Azərbaycanın müstəqilliyi, suverenliyi uğrunda mübarizə aparırdılar. Allah cəmi şəhidlərimizə rəhmət eləsin.
Sonra Ağsaqqallar Şurasının sədri Rəşid Hacıyev, jurnalist Şövkət Əliyeva və başqaları çıxış edərək imperiya ordusunun bu əməlini pislədilər.
Mərasimə toplaşanlar 20 Yanvar faciəsi ilə bağlı filmə baxdıqdan sonra səfirliyimiz adından ehsan verildi.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
