Şəhidlərin fədakarlığı bugünkü gənclərimizə örnəkdir
Bakı, 17 yanvar (AZƏRTAC). Azərbaycan xalqının azadlıq uğrunda mübarizəsinin qəhrəmanlıq səhifəsi olan 20 Yanvar faciəsinin 24-cü ildönümü ilə əlaqədar bütün şəhər və rayonlarda, idarə və müəssisələrdə silsilə tədbirlər keçirilir, hadisənin əsl mahiyyəti, başvermə səbəbləri geniş təhlil olunur.
ARDNŞ-in «Neftqazelmitədqiqatlayihə» İnstitutunda keçirilən tədbir 20 Yanvar hadisələrini əks etdirən videofilmin nümayişi ilə başlamışdır. Daha sonra institutun direktoru Fəxrəddin İsmayılov tədbir iştirakçılarına ulu öndər Heydər Əliyevin bu fikirlərini xatırlatmışdır: “1990-cı il 20 Yanvarı Azərbaycan xalqının həyatında dönüş mərhələsi, dönüş nöqtəsi olmuşdur. Biz 20 yanvar hadisələrinə indiyə qədər bir faciə kimi qiymət veririk. Həmin gün tariximizə qara gün kimi daxil olmuşdur. Şübhəsiz ki, bunda həqiqət var... Amma cəmiyyətdə baş verən hadisənin şübhəsiz ki, səbəbi olur. Ona görə də bu hadisələrə geniş mənada yanaşmaq lazımdır. Getdikcə bu hadisələrin daha geniş mənasını dərk edirik”.
F.İsmayılov bildirmişdir ki, 20 Yanvar faciəsini nə qədər böyük ağrı hissi ilə xatırlasaq da, xalqımızın azadlıq uğrunda mübarizə əzmini sındırmağın mümkün olmadığını dərk edəndə böyük qürur hissi keçiririk. Həmin gün uzun illər imperiya əsarəti altında yaşayan xalqımız azadlıq naminə canından belə keçməyə hazır olduğunu bir daha dünyaya nümayiş etdirmişdir.
“İki sahil” qəzetinin baş redaktoru, YAP Siyasi Şurasının üzvü Vüqar Rəhimzadə qeyd etmişdir ki, 20 Yanvar faciəsinin Azərbaycan xalqının milli təfəkkürünün formalaşmasındakı rolu danılmazdır. Xalq azadlıq yolunda imperiyanın tankları və zirehli maşınlarına qarşı əliyalın çıxdı. İmperiya nə qədər təzyiq göstərsə də Vətənini, xalqını sevən insanların qürurunu sındıra bilmədi. Ermənipərəst Qorbaçov-Vəzirov hakimiyyəti nə qədər aqressivlik göstərsə də bu, insanların mübarizə əzmini qıra bilmədi. İlk olaraq ulu öndər Heydər Əliyev yanvarın 21-də Azərbaycanın Moskvadakı daimi nümayəndəliyinə gələrək etiraz bəyanatını dünyaya çatdırdı və beləliklə, Azərbaycan ətrafında yaranmış informasiya blokadasını yara bildi. Xalqın təkidli tələbi ilə hakimiyyətə qayıdan ulu öndər Heydər Əliyev daha sonra bu faciəyə hüquqi-siyasi qiymət verdi. Cinayətkarlar adbaad xalqa və dünyaya çatdırıldı.
Bu gün Azərbaycan dünya birliyində siyasi, iqtisadi uğurları, qlobal enerji layihələri ilə tanınan qüdrətli ölkədir. Azərbaycanın beynəlxalq aləmdə möhkəmlənən mövqeyi ölkəmizə marağı daha da artırır. Bu nailiyyətlər müstəqilliyimiz uğrunda canlarından keçmiş şəhidlərimizin arzusu olmaqla, ulu öndər Heydər Əliyevin və onun siyasətini uğurla davam etdirən Prezident İlham Əliyevin qətiyyəti, siyasi iradəsi nəticəsində qazanılmışdır.
V.Rəhimzadə vurğulamışdır ki, təkcə iqtisadi nailiyyətləri ilə deyil, xarici siyasətdə qazandığı uğurları ilə də diqqət çəkən Azərbaycanın bölgədə sabitliyin qorunması istiqamətində yeritdiyi siyasət hamılıqla dəstəklənir. Xalqımız əmindir ki, bu siyasət nəticəsində torpaqlarımız erməni silahlılarının işğalından azad ediləcək, şəhidlərimizin uğrunda qurban getdikləri Azərbaycanın ərazi bütövlüyü təmin olunacaqdır. Natiq qeyd etmişdir ki, 20 Yanvar şəhidləri vətənin azadlığı, suverenliyi uğrunda göstərdikləri şücaətlə bugünkü gənclərimizə örnəkdirlər.
İctimai-Siyasi Universitetin rektoru Rasim Nəbiyev çıxışında bildirmişdir ki, müstəqillik, azadlıq yolu qədər çətin yol yoxdur və 1990-cı ilin qanlı hadisələri bir daha bu gerçəkliyi ortaya qoydu. Azərbaycan xalqı göstərdiyi qətiyyətlə nümayiş etdirdi ki, heç bir qüvvə onun milli azadlıq uğrunda mübarizə əzmini qıra bilməz.
İnstitutun baş mühəndisinin müavinləri Gülnarə Mirheydərova, Səyyad İbrahimov, şöbə rəisi Yusif Ələkbərov 20 Yanvar hadisələrinin başvermə səbəblərindən geniş bəhs edərək vurğulamışlar ki, 20 Yanvar şəhidləri xalqımızın yaddaşında əbədi yaşayacaqlar.
Bölmənin digər xəbərləri
