Şəkidə III tələbə yay məktəbi başlamışdır
Şəki, 6 iyul (AZƏRTAC). “Təmiz Şəhər” Açıq Səhmdar Cəmiyyəti (ASC) “Vətəndaş Cəmiyyətində Debat” İctimai Birliyinin təşkilati dəstəyi ilə Şəkidə “Gənclər təmizlik naminə” devizi altında III tələbə yay məktəbi təşkil etmişdir.
Yay məktəbi Heydər Əliyev Fondunun vitse-prezidenti Leyla xanım Əliyeva tərəfindən elan edilmiş IDEA (İnternational Dialogue for Environmental Action) Ətraf Mühit üçün Beynəlxalq Dialoq Kampaniyası çərçivəsində keçirilir.
Yay məktəbində Bakı şəhərinin ali məktəblərində təhsil alan 50 tələbə iştirak edir.
AZƏRTAC xəbər verir ki, iyulun 6-da Şəki şəhərindəki “Yuxarı Karvansaray” mehmanxana kompleksində yay məktəbinin açılışına həsr olunmuş mərasim keçirilmişdir.
Mərasimdə IDEA Kampaniyasının layihə meneceri Ramiz Babayev, “Təmiz Şəhər” ASC-nin layihələrin idarəedilməsi və ictimaiyyətlə əlaqələr şöbəsinin müdiri Oqtay Məmmədov, Şəki Şəhər Gənclər və İdman İdarəsinin rəisi Vüqar İskəndərov, “Vətəndaş Cəmiyyətində Debat” İctimai Birliyinin icraçı direktoru Seymur Hüseynov layihənin məqsədi və qarşıya qoyulan vəzifələr barədə danışmışlar.
Bildirilmişdir ki, bu layihə 2010-cu ildə Azərbaycan Prezidenti İlham Əliyevin elan etdiyi “Ekologiya ili” çərçivəsində təşkil olunmuş “Təmiz şəhər naminə” yeniyetmələr üçün yay məktəbinin və 2011-ci ildə reallaşdırılmış “Gənclər təmizlik naminə” tələbələr üçün yay məktəbinin məntiqi davamıdır.
Yay məktəbinin təşkilinin əsas məqsədi ölkəmizin gələcək vətəndaşları olaraq gənclərin tullantıların düzgün idarəedilməsi və “Yaşıl düşüncə” sahəsində biliklərin əldə edilməsinə, dünyagörüşlərinin genişləndirilməsinə, debat vasitəsilə mövzu ilə bağlı ictimai müzakirələrin keçirilməsinə nail olmaqdır. Məktəb, həmçinin ekoloji mədəniyyətin və tərbiyənin inkişafı, gənc mütəxəssislərin layihəyə cəlb edilməsi məqsədi daşıyır.
Sonra təlimlərin startı verilmişdir.
Məktəbin təlim-tədris tədbirləri iki hissədən- təlim kursu və debat yarışlarından ibarətdir. Təlim kursunda tullantıların idarəedilməsi və “Yaşıl düşüncə” mövzularında məlumat sessiyaları keçiriləcəkdir. Karl Popper Debat Formatı üzrə təkmilləşdirilmiş kurs gənclər arasında “Yaşıl düşüncə” mövzusunda ictimai müzakirələr formasında keçiriləcək debat yarışlarına hazırlıq məqsədi daşıyır. Hazırlıq mərhələsində tələbələr fikri düzgün formalaşdırmağı, arqumentləşdirməni, kreativ düşüncə qabiliyyətini və tənqidi təfəkkürü inkişaf etdirməyi, öz fikirlərini mimika və jestlərlə gücləndirməyi, habelə natiqlik qabiliyyətini artırmağı öyrənəcəklər.
Yay məktəbi iştirakçılarının asudə vaxtlarının mənalı keçməsi üçün mədəni-idman tədbirləri də reallaşdırılacaqdır, Şəkinin tarixi abidələrinə, təbiət qoynuna ekskursiyalar təşkil olunacaqdır.
Bölmənin digər xəbərləri
