Bakı, 19 mart (AZƏRTAC). Azərbaycan Respublikası Sənaye və Energetika Nazirliyi ilə Dövlət Neft Akademiyası ümummilli lider Heydər Əliyevin 90 illik yubileyi ilə əlaqədar tədbir keçirmişlər.

Nazirliyin mətbuat xidmətindən AZƏRTAC-a bildirilmişdir ki, toplantıda çıxış edən Dövlət Neft Akademiyasının rektoru, akademik Siyavuş Qarayev ümummilli liderin 90 illik yubileyi ilə əlaqədar Sənaye və Energetika Nazirliyi ilə bu ali təhsil ocağının birgə keçirəcəyi nəzərdə tutulan tədbirlər barədə geniş məlumat vermişdir.

Sonra Azərbaycanın Sənaye və energetika naziri Natiq Əliyev Akademiyanın müəllim-tələbə heyəti qarşısında geniş məruzə ilə çıxış etmişdir.

Nazir müstəqil Azərbaycan dövlətinin banisi Heydər Əliyevin tarixi xidmətlərindən bəhs edərək, yeni neft strategiyası ilə bağlı öz fikirlərini çatdırmışdır.

Bildirilmişdir ki, müstəqillik tariximizin ilk illərində neft və qaz hasilatının artımına ölkənin qarşıdakı iqtisadi və sosial çətinliklərin aradan qaldırılmasının əsas vasitələrdən biri kimi baxılırdı. Belə bir şəraitdə maliyyə vəsaitinin məhdudluğu xarici şirkətlərin və investorların cəlb olunmasını strateji zərurətə çevirmişdir. Lakin Ermənistanın Azərbaycana qarşı təcavüzü, ölkəni bürümüş daxili ziddiyyətlər, özbaşınalıq Qərbin neft şirkətlərini Azərbaycandan çəkindirdi. Eyni zamanda, aparılan danışıqlarda isə ölkəmizin iqtisadi maraqları tam təmin olunmurdu. Azərbaycan neftinə maraq göstərən xarici neft şirkətləri ilə hələ 80-ci illərin axırlarından aparılan danışıqlar artıq 1993-cü ilin yazında başa çatmaq üzrə idi. Həmin dövrdə Azərbaycan elə bir müqavilənin imzalanmasına yaxınlaşmışdır ki, o nəinki xalqın mənafelərini nəzərə almır, həmçinin ölkənin qiymətli təbii sərvətini talan edərək iqtisadiyyata böyük ziyan vururdu.

Vurğulanmışdır ki, yalnız xalqın iradəsi, çağırışı və təkidi ilə 1993-cü ildə Heydər Əliyevin hakimiyyətə qayıdışı Azərbaycanın siyasi və iqtisadi həyatında taleyüklü dəyişikliklərin başlanğıcını qoymuşdur. Neft müqaviləsi üzrə müzakirələrə, danışıqlara faktiki olaraq yenidən başlanmış və nəhayət, çətin danışıqlar prosesindən sonra Azərbaycanın maraqlarına tamamilə cavab verən müqavilə şərtləri əldə edilmişdir. 1994-cü il sentyabrın 20-də Bakıda Qərbin neft şirkətləri ilə bağlanmış neft sazişi müstəqil Azərbaycan Respublikasının yeni tarixinin şanlı səhifəsini açdı. “Əsrin müqaviləsi” adlandırılan bu saziş həqiqətən müstəqil Azərbaycanın neft salnaməsinə əbədi həkk olunmuşdur.

Sonda Heydər Əliyevin 90 illik yubileyi ilə əlaqədar Sənaye və Energetika Nazirliyi tərəfindən Dövlət Neft Akademiyası və Dövlət Diplomatiya Akademiyasının tələbələri arasında keçiriləcək yazı müsabiqəsi barədə geniş məlumat verilmiş və tələbələri bu müsabiqədə fəal iştiraka dəvət olunmuşlar.