SƏNGƏÇAL TERMİNALI İLƏ TANIŞLIQ
Dövlət Neft Şirkətinin prezidenti Rövnəq Abdullayev və bp şirkətinin vitse-prezidenti Mayk Tauzent ali qonağa və nümayəndə heyətinin üzvlərinə terminalın tikintisi, genişləndirilməsi proqramı barədə ətraflı məlumat vermişlər. Bildirilmişdir ki, ölkəmizdə həyata keçirilən bu layihənin tikintisinə 2001-ci ilin noyabrından başlanmış, indiyədək burada 25 milyon adam-saatdan çox iş görülmüşdür. Bu, dünya rekordu sayıla biləcək bir hadisədir. Terminalda hər birinin tutumu 880 barrel olan 3 xam neft çəninin, baş nasos stansiyasının, separatorların, idarəetmə məntəqəsinin tikintisi, sahildən 187 kilometr aralıda yerləşən “Mərkəzi Azəri” yatağından terminala qədər sualtı neft və qaz kəmərlərinin, fiber-optik rabitə kabellərinin çəkilişi, birləşdirmə və sınaq işləri tamam başa çatdırılaraq hazır vəziyyətə gətirilmişdir.
Terminalın ərazisini gəzən ali qonaq nəzarət-idarəetmə məntəqəsinin iş sistemi ilə də tanış edilmişdir. Məlumat verilmişdir ki, buradan Bakı-Novorossiysk, Bakı-Supsa və Bakı-Tbilisi-Ceyhan neft boru kəmərlərinin ölkə ərazisindəki hissələrində bütün prosesləri izləmək, hər hansı qəza, nasazlıq barədə dərhal xəbər tutmaq və müvafiq tədbir görmək mümkündür. BTC kəmərinin də tezliklə tam hazır olacağı vurğulanmışdır. Bildirilmişdir ki, kəmərin “qara qızıl”la doldurulmasına ötən ilin 25 mayında başlanmış, bunun üçün tələb olunan 10 milyon barrel xam neftin 8 milyon barreli kəmərə vurulmuşdur. Kəmər vasitəsilə dünya bazarlarına ildə 50 milyon tondan artıq neft ixrac ediləcəkdir.
Qonaqları maraqlandıran suallara da cavab verilmişdir.
Ali qonağa hədiyyə təqdim edilmiş, xatirə şəkli çəkdirilmişdir.
Koreya Respublikasının Prezidenti Ro Mu Hyun dünya səviyyəli terminalla tanışlıqdan və burada görülmüş işlərin səviyyəsindən məmnunluğunu bildirmişdir.
Bölmənin digər xəbərləri
