Bakı, 27 noyabr (AZƏRTAC). Cari ilin 3 rübündə Əmlak Məsələləri Dövlət Komitəsi (ƏMDK) tərəfindən daşınmaz əmlak üzərində hüquqların qeydiyyatı sahəsində əhaliyə göstərdiyi xidmətlərin həcmi artmışdır. Belə ki, cari ilin yanvar-sentyabr aylarında Azərbaycanın regionlarında daşınmaz əmlakın qeydiyyatının artım tempi Bakı şəhərinin müvafiq göstəricisini iki dəfə üstələmişdir.

ƏMDK-dən AZƏRTAC-a bildirmişlər ki, sentyabrda ölkədə 14 min 309 əmlak üzərində mülkiyyət hüququ qeydə alınmışdır ki, bu da ötən ilin sentyabrına nisbətən 79,7 faiz çoxdur. Sentyabrda aparılan qeydiyyatın 5 min 138-i ilkin (35,9 faiz), 9 min 171-i (64,1 faiz) təkrar qeydiyyata aiddir. Ötən ilin sentyabrına nisbətən ilkin qeydiyyat 2,2 dəfə, təkrar qeydiyyat isə 63,2 faiz artmışdır. Sentyabrda qeydiyyata alınan əmlakdan 3 min 314-ü  fərdi yaşayış və bağ evi, 5 min 286-sı mənzil, 5 min 59-u torpaq sahəsi, 298-i qeyri-yaşayış binası, 213-ü qeyri-yaşayış sahəsi, 61-i əmlak kompleksi, 74-ü çoxillik əkmə, 3-ü isə çoxmərtəbəli yaşayış binası olmuşdur. Sentyabrda fərdi yaşayış evlərinin qeydiyyatı 88 faizdən çox artmışdır. Torpaq sahələrinin qeydiyyatı 87,6 faiz, özəlləşdirilməsi 72 faiz, qeyri-yaşayış sahələrinin qeydiyyatı 66,4 faiz artmışdır. Sentyabrda qeydiyyatdan keçən 3 çoxmərtəbəli binanın 2-si Bakı şəhərinin payına düşür. Ümumilikdə, bu ilin 9 ayında ölkədə 110 minə yaxın əmlaka aid hüquqlar dövlət qeydiyyatına alınmışdır. Bu, ötən ilin eyni dövrünə nisbətən 55,7 faiz çoxdur.

Qeydiyyatdan keçən əmlakın 40 min 271-i (36,7 faiz) ilkin, 69 min 536-sı (63,3 faiz) təkrar qeydiyyatdan keçmişdir. Ötən ilə nisbətən ilkin qeydiyyat 84,3 faiz, təkrar qeydiyyat 42,8 faiz artmışdır. Mülkiyyət hüquqlarının qeydiyyatı aparılan əmlakdan 24 min 538-i  fərdi yaşayış və bağ evi, 40 min 31-i mənzil, 38 min 279-u torpaq sahəsi, 3 min 339-u qeyri-yaşayış binası, 2 min 324-ü  qeyri-yaşayış sahəsi, 663-ü əmlak kompleksi, 603-ü çoxillik əkmə, 30-u isə çoxmərtəbəli yaşayış binalarıdır. İlin 9 ayında əmlakın qeydiyyatında regionların payı 63 faizə çatmışdır. Ötən aylarda olduğu kimi, bu dövrdə də fərdi yaşayış evi, torpaq sahələri, qeyri-yaşayış binaları və əmlak kompleksləri üzrə əməliyyatların böyük hissəsi regionlarda aparılır. 9 ayda regionlar qeydiyyatdan keçən çoxmərtəbəli binaların sayına görə də Bakını üstələmişdir. Azərbaycanda qeydiyyata alınan 30 belə binanın 17-si regionlardadır. Əvəzində mənzillərin özəlləşdirilməsi və qeyri-yaşayış sahələrinin qeydiyyatının əsas hissəsi paytaxtın payına düşür. Ümumilikdə, 9 ayda regionlarda daşınmaz əmlakın qeydiyyatının artım sürəti Bakını iki dəfəyədək üstələmişdir. Belə ki, ötən ilin eyni dövrünə nisbətən yanvar-sentyabr aylarında Bakı şəhəri üzrə daşınmaz əmlakın qeydiyyatı 36,2 faiz artdığı halda, regionlarda artım sürəti 70 faizi keçmişdir. Bu dövrdə komitənin ərazi qeydiyyat idarələrinin hamısında daşınmaz əmlakın qeydiyyatının artımı müşahidə edilmişdir. Ən çox artım Beyləqan (2,3 dəfə), Qəbələ (2,2 dəfə), Şamaxı (2,1 dəfə) və Abşeron ərazi idarələrində qeydə alınmışdır.