SİYASƏT
SƏRHƏDYANI ƏMƏKDAŞLIQ MƏSƏLƏLƏRİ MÜZAKİRƏ EDİLMİŞDİR
Bakı, 21 oktyabr (AZƏRTAC). Oktyabrın 20-də Xaçmaz şəhərində Azərbaycan Respublikası və Rusiya Federasiyası Daxili İşlər nazirliklərinin nümayəndə heyətlərinin ictimai təhlükəsizliyin təmini, beynəlxalq terrorçuluğa və transmilli mütəşəkkil cinayətkarlığa qarşı mübarizə sahələrində sərhədyanı əməkdaşlığın genişləndirilməsi məsələlərinə həsr olunmuş işgüzar görüşü keçirilmişdir.
Tərəflər Azərbaycan Respublikası və Rusiya Federasiyası Daxili İşlər nazirlikləri arasında əməkdaşlığın hazırkı vəziyyəti və perspektivlərinə, sərhədyanı ərazilərdə ictimai təhlükəsizliyin təmini və cinayətkarlıqla mübarizənin prioritet məsələlərinə, sərhədyanı ərazilərdə polis və daxili işlər orqanlarının birgə səylərinin razılaşdırılması və əlaqələndirilməsi üzrə ixtisaslaşdırılmış işçi qrupun fəaliyyətinə, onun 2010-cu il üçün iş planının təsdiq edilməsinə dair məsələləri müzakirə etmişlər.
Görüşdə çıxış edən Azərbaycan Respublikasının daxili işlər naziri, general-polkovnik Ramil Usubov bildirmişdir ki, ölkələrimiz arasında səmərəli, qarşılıqlı faydalı əməkdaşlığın təməlini Azərbaycan Respublikası və Rusiya Federasiyası Prezidentlərinin yürütdükləri mehriban qonşuluq və dostluq siyasəti təşkil edir.
Qeyd olunmuşdur ki, hər iki ölkənin Daxili İşlər Nazirlikləri arasında əməkdaşlıq dövlətlərarası münasibətlərin yüksək səviyyəsinə uyğundur. İş birliyinin istintaq-əməliyyat tədbirlərinin razılaşdırılaraq həyata keçirilməsi, informasiya mübadiləsi, krminalistik uçot-qeydiyyatın müvafiq növlərinin məlumat banklarından birgə istifadə olunması, sorğuların, istintaq tapşırıqlarlarının icrası və başqa formalarından geniş istifadə olunur. Hər il xeyli cinayətkar qrup birgə səylərlə ifşa olunur, ağır cinayətlərin üstü açılır, məhkəmə və istintaq orqanlarından yayınan şəxslərin yerləri müəyyənləşdirilərək tutulurlar.
Görüşdə beynəlxalq terrorçuluğun və transmilli mütəşəkkil cinayətkarlığın təhdid və çağırışlarına qarşı sərhədyanı ərazilərdə də adekvat cavab verilməsinə daim hazır olmağın vacibliyi vurğulanmışdır. Rusiya Federasiyası daxili işlər nazirinin müavini, milis general-polkovniki Arkadi Yedelev ikitərəfli əməkdaşlığa yüksək qiymət verərək onun daim yeni əməli məzmunla zənginləşdiyini qeyd etmişdir. Ekstremizm, terrorçuluq, narkotiklərin qeyri-qanuni dövriyyəsi, insan alveri, qanunsuz miqrasiya ilə mübarizə sahələrində birgə səylərin daha da fəallaşdırılmasına dair konkret təkliflər səsləndirilmişdir.
Rusiya Federasiyası Dağıstan Respublikasının daxili işlər naziri, milis polkovniki Əli Maqomedov mütəşəkkil cinayətkarlığa, terrorçuluğa, ekstremizmə qarşı mübarizədə səylərin artırılmasının vacibliyini vurğulamış, işgüzar əlaqələrin daha da möhkəmləndirilməsində maraqlı olduqlarını ifadə etmişdir.
Görüşün yekunlarına dair tərəflər müvafiq protokol imzalamışlar. Həmin sənəddə əməkdaşlığın səmərəliliyinin artırılmasına və sərhədyanı ərazilərdə ictimai təhlükəsizliyin möhkəmləndirilməsinə yönəlmiş konkret təşkilati-praktik tədbirlərin həyata keçirilməsi müəyyənləşdirilmişdir.
Konsruktivlik və qarşılıqlı inam şəraitində keçən görüşdə əməkdaşlığın daha da genişləndirilməsi niyyəti ifadə olunmuşdur. Rusiya Federasiyası DİN-in nümayəndə heyətinin üzvləri onlara göstərilən qonaqpərvərliyə və tədbirin yüksək səviyyədə təşkilinə görə azərbaycanlı həmkarlarına minnətdarlıqlarını bildirmişlər.