SİYASƏT
Səudiyyə Ərəbistanı Azərbaycan ilə bütün sahələrdə əlaqələrin inkişafında maraqlıdır
Bakı, 11 mart (AZƏRTAC). Azərbaycanın Səudiyyə Ərəbistanındakı səfiri Rasim Rzayev bu ölkənin Baş nazirinin ikinci müavini Şahzadə Muqrin bin Əbdüləziz Al Səud ilə görüşmüşdür.
Səfirlikdən AZƏRTAC-a bildirmişlər ki, R.Rzayev Azərbaycanın tarixən dini və mədəni köklərlə bağlı olduğu Ərəb ölkələri, xüsusilə də regionda və İslam ölkələri arasında lider mövqeyə malik Səudiyyə Ərəbistanı ilə əlaqələrin hərtərəfli inkişafına və müxtəlif sahələrdə əməkdaşlığın genişləndirilməsinə xüsusi əhəmiyyət verdiyini bildirmişdir.
Səfir Azərbaycan ilə Səudiyyə Ərəbistanı arasında siyasi, ticari-iqtisadi, müdafiə və müdafiə sənayesi, investisiya qoyuluşu, mədəniyyət və turizm, həmçinin bir sıra digər sahələrdə ikitərəfli əlaqələrin inkişaf etdirilməsinin, strateji əməkdaşlığın qurulmasının vacibliyini diqqətə çatdırmışdır. O, gələcək illərdə əlaqələrin inkişafı istiqamətində daha intensiv fəaliyyətin aparılmasının zəruriliyini vurğulamışdır. Diplomat əməkdaşlıq əlaqələrinin bütün sahələrdə genişlənəcəyinə və inkişaf edəcəyinə, ticarət dövriyyəsi və səfər mübadilələrinin artacağına ümidvar olduğunu bildirmişdir. Söhbət zamanı Azərbaycanda xarici investisiyaların qorunması və təşviqi üçün qanunverici bazanın mövcudluğu diqqətə çatdırılmış, Səudiyyə Ərəbistanı tərəfindən ölkəmizə investisiya yatırılması üçün geniş imkanların olduğu bildirilmişdir.
Görüşdə, həmçinin Azərbaycanın bir çox sahələrdə əldə etdiyi nailiyyətlər, ölkədə son illər həyata keçirilmiş iqtisadi islahatlar, neft-qaz sahəsinin inkişafı istiqamətində görülən işlər, regional və qlobal əhəmiyyətli layihələr barədə məlumat verilmişdir.
R.Rzayev Azərbaycanda kənd təsərrüfatı sahəsinin yüksələn templə inkişaf etdiyini vurğulamış, ölkəmizin kənd təsərrüfatı məhsullarının Səudiyyə Ərəbistanına ixrac edilməsi məsələsinin araşdırılmasının zəruriliyini bildirmişdir. O, Azərbaycanın turizm və səhiyyə sahələrində əldə edilmiş nailiyyətlər haqqında da ətraflı məlumat vermişdir.
Hazırda Səudiyyə Ərəbistanının bir çox səhiyyə ocaqlarında azərbaycanlı həkimlərin və tibb bacılarının fəaliyyət göstərdikləri bildirilən görüşdə tibb sahəsində çalışan əlavə azərbaycanlıların bu ölkədə işlə təmin edilmələri məqsədilə yeni müqavilələrin bağlanması haqqında fikir mübadiləsi aparılmışdır. İki ölkə arasında siyasi, ticari- iqtisadi, turizm, mədəniyyət, kənd təsərrüfatı və bir çox digər sahələrdə əlaqələrin dərinləşməsi üçün birbaşa hava xəttinin açılmasının vacibliyi diqqətə çatdırılmışdır. Həmçinin Azərbaycan və Səudiyyə Ərəbistanı hökumətləri arasında əlaqələrin genişləndirilməsinin, qarşılıqlı səfər mübadilələrinin intensivləşdirilməsinin zəruriliyi qeyd edilmişdir.
Ermənistan-Azərbaycan, Dağlıq Qarabağ münaqişəsi barədə məlumat verən səfir ermənilərin Azərbaycana qarşı hərbi təcavüzü nəticəsində torpaqlarımızın 20 faizinin işğal olunduğunu, 1 milyondan çox azərbaycanlının qaçqın və məcburi köçkünə çevrildiyini bildirmişdir. Diplomat işğal altında olan torpaqlarımızda ermənilər tərəfindən etnik təmizlənmənin aparıldığını, beynəlxalq ictimaiyyətin münaqişənin həlli ilə bağlı rəyinin Azərbaycan üçün böyük əhəmiyyət kəsb etdiyini söyləmişdir. O, Azərbaycanın problemlə bağlı regionda və dünyada böyük nüfuza malik olan Səudiyyə Ərəbistanının daim dəstəyinə ehtiyac duyduğunu vurğulamışdır. Səfir Dağlıq Qarabağ məsələsində Azərbaycanın mövqeyini daim dəstəkləndiyinə görə Səudiyyə Ərəbistanı hökumətinə minnətdarlığını ifadə etmişdir. O, tarix boyu ermənilər tərəfindən Azərbaycan xalqına qarşı qanlı cinayətlər, terror və soyqırımı aktlarının törədildiyini diqqətə çatdırmışdır.
Son zamanlar erməni diasporunun bir sıra Körfəz ölkələrində fəallaşmasının qeyd edildiyi görüşdə ermənilərin Azərbaycan ilə Ərəb ölkələri arasında dostluq və qardaşlıq əlaqələrinə xələl gətirməyə cəhd göstərdiyi bildirilmişdir.
R.Rzayev Səudiyyə Ərəbistanının bu günədək işğalçı Ermənistan ilə diplomatik münasibətlər qurmadığını təqdirəlayiq hal kimi xüsusi vurğulamışdır. O, 1994-cü ildə ümummilli lider Heydər Əliyevin Səudiyyə Ərəbistanına səfəri zamanı Kral Fəhd ilə görüşündə Kralın Ulu Öndərə “ermənilər Azərbaycanın işğal etdikləri torpaqlarından silahlı qüvvələrini çıxardıqdan sonra Səudiyyə Ərəbistanı Ermənistan ilə diplomatik münasibətlərin qurulması məsələsinə baxa bilər” sözlərini xatırlatmışdır.
Şahzadə Muqrin bin Əbdüləziz Al Səud Səudiyyə Ərəbistanının bütün İslam ölkələri ilə əməkdaşlıq əlaqələrinin gücləndirilməsinə böyük əhəmiyyət verdiyini, onlara öz dəstəyini əsirgəmədiyini bildirmişdir. O, Səudiyyə Ərəbistanının BMT, İƏT və digər beynəlxalq təşkilatlarda ölkəmizin Ermənistan-Azərbaycan, Dağlıq Qarabağ münaqişəsi ilə bağlı ədalətli mövqeyini daim dəstəklədiyini, ərazi bütövlüyünü tanıdığını və hörmətlə yanaşdığını vurğulamışdır.
Azərbaycan ilə bütün sahələrdə ikitərəfli əməkdaşlıq əlaqələrinin inkişafında maraqlı olduqlarını bildirən Şahzadə xüsusən də ticari-iqtisadi, investisiya qoyuluşu, kənd təsərrüfatı, turizm və mədəniyyət sahələrində əlaqələrin genişləndirilməsi və gücləndirilməsi məqsədilə hər iki ölkənin müvafiq qurumlarının nümayəndə heyətləri və iş adamlarının qarşılıqlı səfər mübadilələrinin həyata keçirilməsinin zəruriliyini diqqətə çatdırmışdır. Hər iki tərəfdən ekspertlər və yüksək rütbəli məmurlar, habelə nazirlər səviyyəsində görüşlərin təşkilinin də vacibliyi bildirilmişdir. Muqrin bin Əbdüləziz Al Səud öz növbəsində Azərbaycan-Səudiyyə Ərəbistanı əlaqələrinin inkişafı üçün iki ölkə arasında birbaşa hava xəttinin açılmasının zəruri olduğunu vurğulamışdır. Buna nail olmaq məqsədilə hər iki ölkənin müvafiq aviaşirkətləri arasında müzakirələrin aparılmasının vacibliyi qeyd edilmişdir. Muqrin bin Əbdüləziz Al Səud hər iki ölkənin təbliğ edilməsi baxımından KİV-lər arasında da əməkdaşlığın gücləndirilməsinin önəmini bildirmişdir. Azərbaycanda mədəniyyət və turizm sahələrinin inkişafının şahidi olduğunu qeyd edən Şahzadə bu istiqamətdə əməkdaşlığın genişləndirilməsi üçün hər iki ölkənin aidiyyəti qurumları arasında səfər mübadilələrinin həyata keçirilməsinin zəruriliyini bildirmişdir.
Səudiyyə Ərəbistanının “Əl-Cəzirə”, “Ər-Riyad”, “Okaz”, “Əl-Mədinə”, “Əl-Həyat”, “Əl-Şərq” qəzetləri və Səudiyyə Xəbər Agentliyi görüşlə bağlı məlumat yaymışdır.