Tehran, 30 oktyabr AZƏRTAC

Bakıda keçirilən VI Beynəlxalq Humanitar Forumda müzakirə olunan məsələlər müasir dünya üçün aktuallığı və vacibliyi ilə seçilir. Bu problemlər demək olar ki, bütün ölkələri narahat edir.

Bu sözləri AZƏRTAC-a müsahibəsində İranın İRNA Dövlət İnformasiya Agentliyinin baş direktoru Seyid Ziya Haşemi deyib. O bildirib ki, Forum çərçivəsində dünyanın nüfuzlu media qurumlarının rəhbərləri “Yanlış məlumatlandırma siyasəti - müasir dünyada sabitliyə təhdid” mövzusu ətrafında geniş fikir mübadiləsi aparıblar. Bu gün dünya mətbuatında yer tapan yalan məlumatlar dövlətləri qarşı-qarşıya qoyur və xalqlar arasında nifaq salır. Bu kimi təhlükəli halların aradan qaldırılması istiqamətində atılan addımlar arasında VI Beynəlxalq Humanitar Forumun rolu böyükdür.

Qeyd olunub ki, bu gün həm İran, həm də Azərbaycan düşmən qüvvələrin yaydığı yalan xəbərlərdən əziyyət çəkir. Ona görə də belə xəbərlərin təsirinin minimuma endirilməsi üçün birgə səylər göstərilməlidir. Forum bu səylərin birləşməsi və vahid hədəfin vurulmasında əhəmiyyətli rol oynayır.

S.Z.Haşimi diqqətə çatdırıb ki, İran ilə Azərbaycan yaxın dost və qonşu ölkələrdir, hər iki xalq ortaq tarixə, mədəniyyətə, dinə və milli-mənəvi dəyərlərə malikdirlər. Ona görə də dünya mətbuatında İslam dini və adətləri haqqında yanlış materialların dərc edilməsi və terrorla İslamın adlarının yanaşı çəkilməsi hər iki dövlətin maraqlarına zərbə vurur. İslam dini insanları qardaşlığa, mehribanlığa, sülh və əmin-amanlığa səslədiyi halda bu müqəddəs dini terrorla eyniləşdirmək, doğrudan da dünyadakı sabitliyə təhdiddir. İran ilə Azərbaycanın media qurumları arasında yaranmış əməkdaşlıq əlaqələri bu kimi neqativ halların qarşısının alınmasına yönəlib. Məsələyə bu baxımdan yanaşdıqda görərik ki, VI Bakı Beynəlxalq Humanitar Forumu yalnız İran ilə Azərbaycanın deyil, digər dövlətlərdə də fəaliyyət göstərən media qurumlarının bir-biriləri ilə əlaqələr qurmalarına şərait yaratdı. Bu əlaqələr və perspektivdəki qarşılıqlı əməkdaşlıq yalan xəbərlərin mediada yer tapmasının qarşısını səmərəli şəkildə almağa yönələcək.

Rabil Kətanov

AZƏRTAC-ın xüsusi müxbiri

Tehran