SİYASƏT
SIĞORTA ŞİRKƏTLƏRİ İLƏ MÜQAVİLƏ BAĞLAMAYAN SƏRNİŞİN DAŞIYAN ŞİRKƏTLƏR CƏRİMƏ OLUNACAQLAR
AZƏRTAC xəbər verir ki, iclasda “Sərnişinlərin icbari sığortası haqqında” Azərbaycan Respublikası Qanununun tətbiqi ilə əlaqədar olaraq bəzi qanunvericilik aktlarına əlavələr və dəyişikliklər edilməsi haqqında”, eləcə də “Müdafiə haqqında” və “Hərbi xidmət haqqında” qanunlara dəyişiklik edilməsi məsələləri müzakirə olunmuşdur.
İqtisadi siyasət daimi komissiyasının sədri Səttar Səfərov demişdir ki, “Sərnişinlərin icbari sığortası haqqında” Qanunun tətbiqi ilə əlaqədar İnzibati Xətalar Məcəlləsinə dəyişikliklər edilməsi təklif olunur. Əlavədə, sərnişin daşınması ilə məşğul olan hüquqi və fiziki şəxslərin müvafiq təşkilatlarla sığorta müqaviləsi bağlamadan fəaliyyət göstərməsi qadağan olunur. Qanuna zidd fəaliyyət göstərənlər şərti maliyyə vahidinin 10 mislindən 20 mislinədək cərimə olunacaqlar. Vəzifəli şəxslərin isə cərimə məbləği daha böyükdür. Qeyd edilmişdir ki, bu dəyişiklik sərnişinlərin bədbəxt hadisələr zamanı sığortalanmalarına, onların təhlükəsizliyinə təminat yaradacaqdır.
Müzakirələrin sonunda qanun layihələri səs çoxluğu ilə qəbul olunmuşdur.
İclasda “Ovçuluq haqqında” qanun layihəsi də üçüncü oxunuşda müzakirə olunaraq qəbul edilmişdir.
Qanun layihəsi ilə bağlı parlamentin aqrar siyasət daimi komissiyasının sədri Eldar İbrahimov məlumat vermişdir. O demişdir ki, sənədin ikinci oxunuş müzakirəsi zamanı deputatlar tərəfindən irəli sürülmüş irad və təkliflərin böyük əksəriyyəti nəzərə alınmışdır.
Layihədə deyilir ki, bu qanun Azərbaycan Respublikası ərazisində ovçuluğun və ovçuluq təsərrüfatlarının təşkilinin, onların fəaliyyətinin həyata keçirilməsinin, habelə ov heyvanlarının mühafizəsinin, artırılmasının hüquqi əsaslarını müəyyən edir. Qanun layihəsində ov siyahısına aid edilmiş vəhşi heyvanların yetişdirilməsi ilə məşğul olan ovçuluq təsərrüfatlarının fəaliyyətinin dövlət tərəfindən stimullaşdırılması nəzərdə tutulur. Qeyd olunur ki, respublika və yerli əhəmiyyətli ovçuluq təsərrüfatlarının mühafizəsi və bərpası, onların inkişafı və yerləşdirilməsi dövlət büdcəsinin, xarici sərmayələrin, qrantlar və ianələr hesabına maliyyələşdiriləcəkdir.
Sənəddə ovçuluq haqqında qanunvericiliyin pozulmasına görə məsuliyyət, beynəlxalq əməkdaşlıq, ov obyektləri üzərində mülkiyyət və ov fondu, ovçuların hüquq və vəzifələri, ov etmək hüququnun dayandırılması və digər müddəalar öz əksini tapmışdır. Layihə müzakirə edildikdən sonra səsə qoyularaq üçüncü oxunuşda qəbul olunmuşdur.
Bunun ardınca deputatlar “Azərbaycan Respublikasının bəzi qanunvericilik aktlarına dəyişiliklər və əlavələr edilməsi haqqında” qanun layihəsini müzakirə etmiş, “Notariat haqqında”, “Lizinq xidməti haqqında”, “Məhkəmələr və hakimlər haqqında” qanunlara əlavələr və dəyişikliklər olunması barədə qərarların lehinə səs vermişlər.
X X X
Fasilədən sonra iclasda “Azərbaycan Respublikasının xarici ölkələrdə və beynəlxalq təşkilatlarda fəaliyyət göstərən diplomatik nümayəndəliklərində qulluq edən diplomatik xidmət əməkdaşlarının və diplomatik xidmət orqanlarının inzibati-texniki xidmətini həyata keçirən şəxslərin icbari sığortası haqqında” qanunun layihəsi ikinci oxunuşda müzakirə edilmişdir.
Qanun layihəsini Milli Məclisə iqtisadi siyasət daimi komissiyasının sədri Səttar Səfərov təqdim edərək bildirmişdir ki, Prezident İlham Əliyev Azərbaycanın dünya ölkələri ilə əlaqələrini daha da genişləndirmək məqsədi ilə 8 ölkədə səfirlik açılması barədə qərar qəbul etmişdir. Həmin qərar bu gün müzakirə etdiyimiz qanun layihəsinin aktuallığını bir daha sübut edir. Qanun layihəsində nəzərdə tutulan sığortanın müddəaları Azərbaycanın xarici ölkələrdə açılacaq yeni səfirliklərinin əməkdaşlarına da şamil ediləcəkdir.
S.Səfərov qeyd etmişdir ki, Azərbaycanın iqtisadi qüdrəti, imkanları artdıqca digər ölkələrdə də səfirliklər açılacaq və qanun layihəsinin təsir dairəsi genişlənəcəkdir. O, həmçinin bildirmişdir ki, bu sənədin birinci oxunuşunda irəli sürülmüş təklif, irad və qeydlər komissiyaya, işçi qrupuna qanun layihəsi üzərində iş prosesində kömək etmişdir.
Deputatlar qanun layihəsi ilə bağlı təkliflərini bildirdilər. Onlar qanunda 6-cı maddəyə lüzum olmadığını və bu sənədin adını Prezidentin Fərmanında olduğu kimi saxlamağı təklif etdilər.
Müzakirələr başa çatdıqdan sonra 13 maddədən ibarət qanun layihəsi səsə qoyularaq qəbul olundu. Bununla da Milli Məclisin iclası öz işini başa çatdırdı.