“ŞİMAL” DRES-DƏ YENİ OBYEKTİN AÇILIŞI
Avqustun 24-də “Şimal” DRES-də kompressor stansiyasının istifadəyə verilməsi münasibətilə mərasim keçirilmişdir.
Baş nazirin müavini Abid Şərifov mərasimdə çıxış edərək xatırlatdı ki, “Şimal” DRES-də buxar-qaz qurğusunun inşası üçün 2000-ci ilin iyununda Yaponiyanın Mitsui/Mitsubishi alyansı ilə müqavilə imzalanmışdır. Bu layihə və podrat işləri Yaponiya Beynəlxalq Əməkdaşlıq Bankı tərəfindən ayrılmış kredit hesabına həyata keçirilir. Kredit 10 illik güzəşt müddətindən sonra 30 il ərzində ödənilmək şərti ilə illik 0,75 faizlə ayrılmışdır.
Abid Şərifov vurğuladı ki, Azərbaycan ilə Yaponiya arasında dostcasına, işgüzar münasibətlə yaranmışdır və bu münasibətlər Prezident Heydər Əliyevin bu ölkəyə rəsmi səfərindən sonra xüsusi əhəmiyyət kəsb etmişdir. Yaponiya hökumətinin Azərbaycana ayırdığı güzəştli kreditlərin ümumi məbləği 600 milyon ABŞ dollarından artıqdır. Bundan əlavə, səhiyyə, mədəniyyət, idman və kənd təsərrüfatı sahəsində müxtəlif layihələr üzrə qrantlar şəklində 40 milyon dollar ayrılmışdır.
Baş nazirin müavini bildirdi ki, kompressor stansiyası Frunze adına Ukrayna Elm İstehsalat Birliyində hazırlanmış və onun mütəxəssisləri tərəfindən quraşdırılmışdır. “Şimal” DRES-də tikilməkdə olan 400 MVt gücündə buxar-qaz qurğusunu,- bu, Bakıda işlədilən bütün elektrik enerjisinin 30 faizini verəcəkdir,- qazla təmin edəcək bu mühüm obyekt qısa müddətdə istifadəyə verilmişdir.
Sonra Yaponiya və Ukraynanın Bakıdakı səfirləri Toşiyuki Fucivara və Boris Aleksenko çıxış edərək, obyektin tikintisinin uğurla başa çatdırılması münasibətilə mərasim iştirakçılarını təbrik etdilər, bu qurğunun inşası zamanı üç ölkənin şirkətləri arasında yaranmış işgüzar münasibətlərin yüksək səviyyəsindən razı qaldıqlarını bildirdilər.
Bölmənin digər xəbərləri
