ŞİMALİ KOREYA TƏKZİB EDİR
AZƏRTAC Koreya Xalq Demokratik Respublikası Mərkəzi Teleqraf Agentliyinə istinadla xəbər verir ki, Pxenyan KXDR-in İranla nüvə sahəsində əməkdaşlıq apardığı barədə iddiaları qəti şəkildə rədd edərək, Qərbin kütləvi informasiya vasitələrini qərəzli məlumat yaymaqda təqsirləndirmişdir. KXDR XİN-in rəsmi nümayəndəsi bildirmişdir: “Bu iddialar nüvə silahını yaymaqda təqsirləndirmək yolu ilə respublikaya qara yaxmağa yönəldilmiş ağ yalan və böhtanlardan başqa bir şey deyildir”.
Nazirlik bəyan etmişdir ki, 2006-cı il oktyabrın 9-da ilk nüvə sınağı keçirən KXDR məsul nüvə dövləti olaraq, nüvə silahının yayılmaması sahəsində beynəlxalq birlik qarşısında götürdüyü öhdəliyi yenə də səmimiyyətlə yerinə yetirəcəkdir.
Şimali Koreyanın həmin bəyanatına Britaniyanın “Deyli teleqraf” qəzetində bu günlərdə dərc edilmiş məlumat səbəb olmuşdur. Məqalədə deyilirdi ki, KXDR nüvə sınağı keçirməkdə İrana kömək etməyə razılıq vermişdir. Qəzet Avropadakı anonim hərbi mənbəyə istinadla yazmışdır ki, Pxenyan ölkədə oktyabrda keçirilən sınağın nəticələrini öyrənmək və İranda, çox güman, ilin sonunda keçiriləcək oxşar sınağa hazırlıq üçün İranın bir qrup nüvə mütəxəssisini dəvət etmişdir.
ABŞ-da və bəzi digər ölkələrdə tez-tez xəbərlər yayılır ki, KXDR İrana onun raket proqramının həyata keçirilməsində də kömək göstərir.
Bölmənin digər xəbərləri
