Şirvanda “Zəfər yürüşü” təşkil olunub
Şirvan, 7 noyabr, Aydın Yavərzadə, AZƏRTAC
Şirvan Şəhər İcra Hakimiyyəti və Şirvan-Salyan Regional Təhsil İdarəsinin birgə təşkilatçılığı ilə Şirvan şəhərində 8 Noyabr - Zəfər Gününə həsr olunmuş “Zəfər yürüşü” təşkil olunub.
AZƏRTAC-ın bölgə müxbiri xəbər verir ki, tədbirdə Şirvan Şəhər İcra Hakimiyyətinin, YAP Şirvan şəhər təşkilatının rəhbərliyi, hüquq-mühafizə orqanlarının, regional təşkilatların, idarə və müəssisələrin rəhbərləri, şəhid ailələri, müharibə iştirakçıları, şəhər sakinləri və ictimaiyyət nümayəndələri iştirak ediblər.
Əvvəlcə Ulu Öndər Heydər Əliyevin abidəsi ziyarət olunub.
Ümummilli Liderin abidəsi qarşısından başlayan yürüş şəhərin M.Füzuli adına Mədəniyyət və İstirahət Parkında yerləşən “Zəfər” abidəsinədək davam edib.
Tədbirdə şəhərin yeniyetmə və gənc idmançılarının idmanın müxtəlif növləri üzrə nümunəvi çıxışlarına, məktəblilərinin rəsm və əl işlərindən ibarət sərgiyə baxış keçirildikdən sonra onların hazırladığı 8 Noyabr - Zəfər Gününə həsr olunmuş “Zəfərin mübarək!” adlı fləşmob təşkil edillib. Fləşmob tədbir iştirakçıları tərəfindən alqışlarla qarşılanıb.
Zəfər abidəsinin önündə davam edən tədbirdə Azərbaycan Respublikasının Dövlət Himni səsləndirildikdən sonra Ümummilli Lider Heydər Əliyevin və şəhidlərin əziz xatirəsi bir dəqiqəlik sükutla yad edilib.
Tədbirdə çıxış edənlər vurğulayıblar ki, Prezident, Ali Baş Komandan İlham Əliyevin rəhbərliyi ilə Silahlı Qüvvələrimizin qazandığı Zəfər Azərbaycanın müstəqillik tarixinin müstəsna əhəmiyyətli hadisələrindəndir. Bildirilib ki, Azərbaycan xalqı ən məğrur, yenilməz xalq kimi, Ordumuz isə dünyanın ən güclü, peşəkar ordusu kimi tarixə yazılıb. Müzəffər Ali Baş Komandan İlham Əliyevin müdrik siyasəti və şanlı Ordumuzun rəşadəti sayəsində qazanılmış böyük Zəfər, eyni zamanda, dinindən, milli mənsubiyyətindən asılı olmayaraq xalqımızın “dəmir yumruq” ətrafında sıx birləşməsi, gənclərimizin Vətən sevgisi, xalq və ordu birliyi sayəsində əldə olunub. Həmçinin Azərbaycan Respublikasının konstitusiya quruluşunun bərpa edilməsi məqsədilə keçirilən lokal xarakterli antiterror tədbirləri barədə söhbət açılaraq, qəhrəman hərbçilərimizin şücaəti, rəşadəti hesabına Vətənimizin ərazi bütövlüyünün tam bərpa olunduğu, üçrəngli Bayrağımızın işğaldan azad edilən torpaqlarımızda dalğalandığı diqqətə çatdırılıb.
Daha sonra tədbir konsert proqramı ilə davam edib.
Bölmənin digər xəbərləri
