CƏMİYYƏT
Siyavuş Novruzov: Bələdiyyələrin fəaliyyətinin təkmilləşdirilməsi diqqət mərkəzindədir
Bakı, 19 fevral, AZƏRTAC
Ümummilli lider Heydər Əliyevin qurub yaratdığı müasir Azərbaycan dövləti 2021-ci ildə də Prezident İlham Əliyevin rəhbərliyi ilə uğurla inkişaf edib, xalqımız Müzəffər Ali Baş Komandanın yenilməz sərkərdəliyi ilə Vətən müharibəsində qazanılan böyük Qələbənin birinci ildönümünü sevinclə və qürurla qeyd edib.
2021-ci ildə Prezident İlham Əliyevin rəhbərliyi ilə müxtəlif sahələri əhatə edən kompleks islahatlar davam etdirilib, iqtisadiyyatın dayanıqlı və davamlı inkişafı istiqamətində mühüm addımlar atılıb, sosial-iqtisadi tərəqqiyə hədəflənən layihələr gerçəkləşdirilib. Xüsusilə də işğaldan azad edilmiş ərazilərdə - Qarabağ və Şərqi Zəngəzurda Prezident İlham Əliyevin rəhbərliyi və Birinci vitse-prezident Mehriban xanım Əliyevanın təşəbbüsləri ilə nəhəng quruculuq işlərinin aparılması, yol-nəqliyyat, mədəniyyət abidələrinin bərpası və enerji sosial infrastrukturunun yaradılması ölkəmizin qarşısında yeni perspektivlər açır, iqtisadi inkişafın sürətlənməsinə zəmin yaradır.
Bu fikirləri AZƏRTAC-a açıqlamasında Milli Məclisin Regional məsələlər komitəsinin sədri Siyavuş Novruzov deyib.
Komitə sədri qeyd edib ki, bunlarla yanaşı, ötən dövr ərzində regional idarəetmə sahəsində də mühüm tədbirlərin həyata keçirilməsi, yeni modelin yaradılması, yeni mexanizmlərin müəyyənləşdirilməsi baxımından mühüm əhəmiyyətə malik olub, idarəetmənin optimallaşdırılması və təkmilləşdirilməsi üçün böyük önəm daşıyıb.
“Aparılmış islahatlar, görülmüş tədbirlər bələdiyyələrin fəaliyyətindən də yan keçməyib. Belə ki, ötən dövr ərzində qanunvericilik sahəsində kifayət qədər irəliləyişin olması bələdiyyə idarəçiliyi sahəsində müəyyən uğurların qazanılmasına gətirib çıxarıb. Digər tərəfdən, bələdiyyələr və ya onların bilavasitə fəaliyyəti ilə bağlı xeyli sayda qanun, əsasnamə, qanunvericilik aktının qəbul olunması bu sahənin inkişafına dövlətin diqqətinin və qayğısının bariz nümunəsidir.
Ötən il ərzində xeyli sosial məsələlərin həllində iştirak edən bələdiyyələr tərəfindən şəhidlərimizin xatirəsinin əbədiləşdirilməsi məqsədilə xatirə guşələri yaradılıb. Həmçinin şəhidlərin adlarına bulaqlar istifadəyə verilib, şəhid ailələrinin və müharibə iştirakçılarının maddi vəziyyətinin yaxşılaşdırılması məqsədilə müxtəlif yardımlar edilmiş, onların yaşadıqları məhəllələr, küçələr abadlaşdırılıb, evləri təmir olunub”, - deyə Siyavuş Novruzov bildirib.
Komitə sədrinin sözlərinə görə, bələdiyyələrdə aşkarlıq və hesabatlılığın təmini, yerli özünüidarəetmədə rəqəmsal infrastrukturun təkmilləşdirilməsi məsələləri də diqqətdən kənarda qalmayıb. Milli Məclisin Regional məsələlər komitəsi tərəfindən ərazi bütövlüyümüz uğrunda döyüşlərdə iştirakla əlaqədar əlilliyi müəyyən edilmiş şəxslərə və həlak olanların ailəsinə fərdi yaşayış evinin tikintisi üçün torpaqayırma sənədlərinin hazırlanması zamanı zəruri xərclərin yerli büdcələrin imkanları daxilində bələdiyyələr tərəfindən qarşılanması tövsiyə edilib.
S.Novruzov diqqətə çatdırıb ki, bələdiyyələr tərəfindən pandemiyaya qarşı mübarizə sahəsində yaxından iştirak edərək əhalinin sağlamlığının qorunmasında vaksinasiyanın əhəmiyyəti ilə bağlı geniş maarifləndirmə işi aparılıb. Bələdiyyələrin fəaliyyətinə inzibati nəzarətin səmərəliliyinin artırılması, o cümlədən yerli özünüidarəetmədə korrupsiya risklərinin qiymətləndirilməsi məqsədilə inzibati nəzarət icraatının nəticələri ümumiləşdirilmiş, korrupsiya hüquqpozmalarına şərait yaradan hallar müəyyən edilərək aradan qaldırılması üzrə tədbirlər görülüb.
Səmərəli yerli özünüidarəetmənin əsas şərtlərindən birinin də yerli sakinlərlə qarşılıqlı və səmərəli münasibətlərin qurulması olduğunu bildirən komitə sədri qeyd edib ki, bu baxımdan, bələdiyyələrdə aşkarlıq və hesabatlılığın təmini, ictimai nəzarətin və yerli özünüidarəetmə orqanlarına etimadın gücləndirilməsi zəruridir. 2021-ci il ərzində bu məsələlər diqqətdə saxlanılıb, “Açıq hökumətin təşviqinə dair 2020-2022-ci illər üçün Milli Fəaliyyət Planı”nda müəyyənləşdirilən aidiyyəti tapşırıqların icrası üzrə tədbirlər görülüb. Həmçinin yerli özünüidarəetmə ilə bağlı normativ-hüquqi tənzimlənmənin təkmilləşdirilməsi, qanunvericilikdəki boşluqların aradan qaldırılması istiqamətində tədbirlər davam etdirilib.
“Azərbaycan Respublikası Milli Məclisinin Regional məsələlər komitəsinin və bələdiyyələrin milli assosiasiyalarının təşkilatçılığı və bələdiyyə nümayəndələrinin iştirakı ilə “Azərbaycanda yerli özünüidarəetmənin inkişaf perspektivləri: mövcud vəziyyət və qarşıdakı vəzifələr”, ümummilli lider Heydər Əliyevin anadan olmasının 98-ci ildönümü münasibətilə “Heydər Əliyev və qüdrətli Azərbaycan”, “Müstəqilliyimiz əbədidir, daimidir və dönməzdir” və Azərbaycan Prezidenti, Ali Baş Komandan İlham Əliyevin rəhbərliyi ilə qazanılmış Qələbənin ildönümünə həsr edilmiş “Azərbaycanın tarixi Zəfəri” mövzularında videokonfranslar keçirilib. Tədbirlərdə yerli özünüidarəetmə sisteminin yaradılmasında Ümummilli Liderin rolu və bələdiyyələrin inkişafına göstərilən dövlət qayğısı qeyd edilmiş, ölkəmizdə aparılan hərtərəfli quruculuq işlərində, o cümlədən sosial, iqtisadi, ekoloji və digər layihələrin reallaşmasında yerli özünüidarəetmə orqanlarının iştirakı vurğulanıb. Bələdiyyələrin səmərəli fəaliyyəti üçün Milli Məclisin Regional məsələlər komitəsi tərəfindən görülən işlər barədə ətraflı məlumat verilib”, - deyə S.Novruzov qeyd edib.
Komitə sədrinin sözlərinə görə, ümumilikdə 2021-ci il ərzində həyata keçirilən tədbirlər ölkəmizdə bələdiyyələrin fəaliyyətinin təkmilləşdirilməsinə, yerli özünüidarəetmə orqanı kimi nüfuzunun artırılmasına, o cümlədən bələdiyyələrin maliyyə vəziyyətinin yaxşılaşdırılmasına yönəlib.
“Bələdiyyələrin fəaliyyətinə inzibati nəzarətin həyata keçirilməsi, fəaliyyətin qanunauyğun təşkilinə kömək və onlara metodoloji yardım göstərilməsi sahəsində işin səmərəliliyinin artırılması üçün tədbirlər davam etdirilir. Bələdiyyələrin fəaliyyətinin müasir dövrün tələblərinə uyğunlaşdırılması, yerli əhali ilə münasibətlərdə daha effektiv bir quruma çevrilməsi üçün bu və ya digər problemlərin həlli məqsədilə səyləri birləşdirmək, zəruri tədbirlər görmək mühüm vəzifələrdəndir”, - deyə S.Novruzov fikirlərini yekunlaşdırıb.