DÜNYA
SOÇİ İNDİ UZAQ DEYİL...
Azərbaycan Rus İcmasının təsis etdiyi “Vityaz” şirkəti Bakı-Soçi-Bakı marşurutu ilə avtobus reysləri açmışdır. Şirkətin direktor müavini Fuad Hüseynov AZƏRTAC-ın müxbirinə bildirmişdir ki, iki qonşu dövlətin müxtəlif regionlarını birləşdirən nəqliyyat reyslərinin açılması Azərbaycan ilə Rusiya arasında bağlanmış hökumətlərarası saziş nəticəsində mümkün olmuşdur. Hazırda 30-dan çox belə marşrut işləyir.
Məlum olduğu kimi, Şimali Qafqaz və Rusiyanın Qara dəniz sahillərinin kurortları Azərbaycan əhalisinin də çox sevdiyi istirahət yerləridir. İndiyədək rahat nəqilyyat marşrutlarının olmaması vətəndaşlarımızın bu yerlərdə dincəlməsi üçün çətinlik yaradırdı.
Yeni marşrut “Mersedes” markalı rahat avtobuslarla 35 saata birbaşa Soçiyə çatmağa imkan verəcəkdir. Marşrutun rahatlığı bir də ondadır ki, Mineralnıye Vodı, Tuapse, Maykop kimi məşhur kurort şəhərləri bu yolun üstündədir. Bir tərəfə biletin qiyməti çox əlverişli - 170 min manatdır.
Qış mövsümündə reyslər həftədə bir dəfə, yayda isə hər gün həyata keçiriləcəkdir.