Somalidə 6 afrikalı sülhməramlı əsgər öldürülüb
Bakı, 29 iyul, AZƏRTAC
Somalinin paytaxtı Moqadişoda Burundidən olan 6 afrikalı sülhməramlı əsgər öldürülüb. AZƏRTAC BBC telekanalının saytına istinadla xəbər verir ki, hərbçilər Somalidəki Afrika Birləşmiş Kontingentində (AMISOM) xidmət edirmişlər.
Burundi ordusunun sözçüsü bildirib ki, əsgərlər paytaxt Moqadişonun Balad rayonunda “Əl-Şabaab” terrorçu qruplaşması tərəfindən qətlə yetiriliblər. Silahlı hücum nəticəsində yaralanan üç əsgər xəstəxanaya çatdırılıb, daha iki hərbçini isə terrorçular girov götürüblər.
“Əl-Şabaab” terrorçu qruplaşması iki gün əvvəl də bu ərazidə rayonun rəhbərlərini və daha 4 nəfəri qətlə yetirib. Həmin insident terrorçu kamikadzenin üzərindəki bombanı partlatması nəticəsində baş vermişdi.
Tərkibində 22 min hərbçi olan AMISOM bölgədə BMT və Afrika İttifaqının himayəsi altında yerləşdirilib. 2007-ci ildən fəaliyyət göstərən sülhməramlı hərbi kontingentin tərkibində Burundidən 5432, Uqandadan isə 6 000 əsgər xidmət edir.
Bölmənin digər xəbərləri
