SON MƏNZİLƏ
Martın 12-də ölkəmizin ictimaiyyəti milli teatr sənətimizin görkəmli nümayəndəsi, Dövlət mükafatı laureatı, Azərbaycan Respublikası Prezidentinin fərdi təqaüdçüsü, xalq artisti Nəsibə Cahangir qızı Zeynalovanı son mənzilə yola salmışdır. Mərhumun cənazəsi Azərbaycan Dövlət Musiqili Komediya Teatrının matəmsayağı bəzədilmiş səhnəsində postament üzərinə qoyulmuşdu. Postamentin qarşısına ölməz səhnə ustasının yaradıcılığı dövründə aldığı orden və medallar, ətrafına isə Azərbaycan Prezidenti İlham Əliyevin adından, dövlət və hökumət təşkilatları, o cümlədən Mədəniyyət Nazirliyi, Teatr Xadimləri İttifaqı, Musiqili Komediya Teatrı, digər teatrların kollektivləri adından əklillər düzülmüşdü. Səhnəmizin korifeylərindən olan Nəsibə xanımın həmkarları, dostları, tanışları, tanınmış mədəniyyət və incəsənət, elm xadimləri, mərhumun sənətinin pərəstişkarları axın-axın teatrın binasına gəlir, görkəmli sənətkara və gözəl insana - Azərbaycan anasına son borclarını verirdilər. Salonda həzin matəm musiqisi səslənirdi. Milli Məclisin deputatları, dövlət və hökumət nümayəndələri, eləcə də elm, incəsənət və mədəniyyət xadimləri cənazənin yanında fəxri qarovulda dayanırdılar. X X X Azərbaycan Respublikasının Prezidenti İlham Əliyev səhnəmizin əvəzolunmaz simalarından biri Nəsibə xanım Zeynalova ilə vidalaşma mərasimində iştirak etmək üçün teatra gəldi. Azərbaycan Prezidenti İlham Əliyev, Milli Məclisin sədri Murtuz Ələsgərov, Baş nazir Artur Rasizadə, Prezidentin İcra Aparatının rəhbəri Ramiz Mehdiyev mərhumun cənazəsi yanında fəxri qarovulda dayandılar. Sonra ölkəmizin rəhbəri mərhumun ailə üzvlərinə, qohum-əqrəbasına dərin hüznlə başsağlığı verdi. Matəm mitinqini Baş nazirin müavini Elçin Əfəndiyev açaraq, mərhumun həyat və yaradıcılığından, ölkəmizdə teatr və kinonun inkişafında Nəsibə Zeynalovanın əvəzsiz xidmətlərindən, yaratdığı parlaq və dolğun obrazlarla teatr sənətimizi zənginləşdirməsindən söhbət açdı. O, ümummilli liderimiz Heydər Əliyevin vaxtilə bütün sənətkarlara göstərdiyi diqqət və qayğısından danışaraq, onun Nəsibə xanım ilə görüşlərini, sənətkara dərin hörmət və ehtiram bəslədiyini xatırlatdı. Mədəniyyət naziri Polad Bülbüloğlu, Teatr Xadimləri İttifaqının sədri, xalq artisti Azər Paşa Neymətov, Dövlət Musiqili Komediya Teatrının direktoru, xalq artisti Hacıbaba Bağırov, xalq artisti, bəstəkar Azər Rzayev, xalq artisti Səyavuş Aslan zəngin obrazlar yaratmış sənətkara Allah-təaladan rəhmət diləyərək bildirdilər ki, Nəsibə Zeynalova Azərbaycan milli teatr sənətimizin zəngin ənənələrini layiqincə davam etdirərək, 60 illik səhnə fəaliyyəti dövründə yaratdığı parlaq obrazlarla tamaşaçıların dərin rəğbətini qazanmışdır. Natiqlər xüsusi vurğuladılar ki, mərhum sənətkar canlandırdığı obrazların yüksək dərəcədə təbiiliyi, milliliyi və müasirliyi ilə səciyyələnmiş, Azərbaycan mədəniyyət tarixinə böyük hadisə kimi daxil olmuşdur. Milli teatr tariximizin yetirdiyi böyük sənətkarlar nəslinin yaradıcılıq ənənələrinə sadiq qalan aktrisa yüksək peşəkarlığı, öz müasirlərinin mənəvi aləminə dərindən nüfuz eimək və zamanın ruhunu gözəl əks etdirmək bacarığı ilə seçilirdi. Onun böyük istedadla yaratdığı qadın obrazları özlərinin danışıq və davranış tərzləri ilə yadda qalmış, onların hər sözü el arasında dillər əzbəri olmuşdur. Matəm mərasimində çıxış edənlər Nəsibə xanımın yüksək insani keyfiyyətlərindən, kino aktyoru kimi fəaliyyətindən də danışdılar. Bildirildi ki, bədii filmlərdə yaratdığı maraqlı və yaddaqalan surətlər aktrisanın aktyor həyatının bir hissəsini təşkil edərək, onun fitri istedadını və sənətkarlıq bacarığını bariz şəkildə göstərmişdir. Var qüvvəsini milli teatr və kino sənətimizin tərəqqisinə sərf etmiş müqtədir aktyorumuzun xidmətləri həmişə yüksək qiymətləndirilmiş, müxtəlif dövlət mükafatları, orden və medallarla, o cümlədən ali mükafat - “Şöhrət” ordeni ilə təltif olunmuşdur. Teatr Xadimləri İttifaqının təsis etdiyi Fəxri medalın birincisi də vəfatından cəmi yarım saat əvvəl Nəsibə xanıma təqdim edilmişdir.Mərhumun oğlu Cahangir Novruzov matəm mərasimində çıxış edərək, teatr və kino sənətinin inkişafında anasının xidmətlərinə verdiyi yüksək qiymətə, xatirəsinə göstərdiyi hörmət və ehtirama görə Azərbaycan Prezidenti İlham Əliyevə dərin minnətdarlığını bildirdi. O, bütün Nəsibəsevərlərə və matəm mərasimində iştirak edənlərə də təşəkkür etdi. X X X Prezident İlham Əliyev mərhumun ailə üzvlərinə bir daha dərin hüznlə başsağlığı verdi. “Azərbaycan Mədəniyyətinin Dostları Fondu”nun prezidenti Mehriban xanım Əliyeva da Nəsibə xanımın yaxınları ilə səmimi görüşərək, onlara Allah-təaladan səbir dilədi.Nəsibə xanım Zeynalovanın ailə üzvləri, qohumları mərhumla vidalaşdılar. X X XXalq artisti Nəsibə Zeynalovanın cənazəsi teatrın binasından qaldırılaraq Fəxri xiyabana gətirildi. Burada mərhumun ruhuna dua oxundu. Əziz xatirəsi xalqımızın qəlbində əbədi yaşayacaq böyük sənətkar, əsl vətəndaş və qayğıkeş insan Nəsibə Cahangir qızı Zeynalovanın cənazəsi doğma torpağa tapşırıldı. Məzarın üzərinə əklillər, gül dəstələri düzüldü.Allah rəhmət eləsin, qəbri nurla dolsun!
Bölmənin digər xəbərləri
