SON MƏNZİLƏ
Dekabrın 2-də ölkəmizin ictimaiyyəti Azərbaycan ədəbiyyatının görkəmli nümayəndəsi, Dövlət mükafatı laureatı, xalq şairi Məmməd İnfil oğlu İbrahimovu (Məmməd Arazı) son mənzilə yola salmışdır.
Mərhumun cənazəsi Azərbaycan Dövlət Akademik Milli Dram Teatrının matəmsayağı bəzədilmiş səhnəsində postament üzərinə qoyulmuşdu. Postamentin ətrafına Azərbaycan Prezidenti İlham Əliyevin adından, habelə dövlət və hökumət təşkilatları, Yazıçılar Birliyi, müxtəlif kollektivlər adından əklillər düzülmüşdü.
Xalq şairi Məmməd Arazın həmkarları, dostları, tanışları, tanınmış mədəniyyət və incəsənət, elm xadimləri, mərhumun poeziyasının pərəstişkarları axın-axın teatrın binasına gəlir, görkəmli sənətkara və gözəl insana son borclarını verirdilər.
Salonda həzin matəm musiqisi səslənirdi. Milli Məclisin deputatları, dövlət və hökumət nümayəndələri, eləcə də elm, incəsənət və mədəniyyət xadimləri cənazənin yanında fəxri qarovulda dayanırdılar.
X X X
Azərbaycan Respublikasının Prezidenti İlham Əliyev ədəbiyyatımızın görkəmli simalarından biri olan Məmməd Araz ilə vidalaşma mərasimində iştirak etmək üçün teatra gəldi.
Prezident İlham Əliyev, Milli Məclisin sədri Murtuz Ələsgərov, Baş nazir Artur Rasizadə, Prezident Administrasiyasının rəhbəri Ramiz Mehdiyev mərhumun cənazəsi yanında fəxri qarovulda dayandılar.
Sonra dövlətimizin başçısı mərhumun ailə üzvlərinə, qohum-əqrəbasına dərin hüznlə başsağlığı verdi.
Matəm mitinqini Baş nazirin müavini Elçin Əfəndiyev açaraq, mərhum şairin həyat və yaradıcılığından danışdı və dedi ki, Azərbaycan milli bədii təfəkkürünün yetişdirdiyi böyük şəxsiyyətlərdən, nadir sənətkarlardan biri kimi Məmməd Arazın poeziyası hələ sağlığında xalqımızın milli sərvətinə çevrilmişdi. O, öz şeirlərində lirikanı, ən ülvi insani hissləri, ictimai-siyasi prosesləri birləşdirmiş və tərənnüm etmişdir.
Əsil vətəndaş, təvazökar şair bütün canı, qanı ilə Azərbaycanın müstəqilliyinə, istiqlalına bağlı olmuş, Vətənimizin, xalqımızın, torpağımızın təəssübünü çəkmişdir. Bütün bunlar onun poeziyasının ana xəttini təşkil etmişdir.
Şəxsiyyəti pak, təmiz olan mərhumun taleyinə uzun illər ağır xəstəlik yazılsa da, o, əslində, bu xəstəliyə qalib gəlmiş, yeni əsərlər yaratmaqla gənc nəslin vətənpərvərlik ruhunda böyüməsinə, milli şüurun inkişafına böyük təsir göstərmiş, ölkəmizin ərazi bütövlüyünün qorunması üçün insanları ruhlandırmış və gələcəyə səsləmişdir.
E.Əfəndiyev ümummilli liderimiz Heydər Əliyevin vaxtilə bütün sənət adamlarına, o cümlədən yazıçı və şairlərə göstərdiyi diqqət və qayğıdan danışaraq, onun Məmməd Arazla görüşlərini xatırlatdı və dedi ki, o, Məmməd Araz şəxsiyyətinə, yaradıcılığına daim böyük məhəbbətlə, hörmətlə yanaşmış, şeirlərini yüksək dəyərləndirmişdir.
Yazıçılar Birliyinin sədri Anar, AMEA-nın Nizami adına Ədəbiyyat İnstitutunun direktoru, akademik Bəkir Nəbiyev, Yazıçılar Birliyinin katibi, xalq şairi Fikrət Qoca, əməkdar incəsənət xadimi, şair Nəriman Həsənzadə, Bakı Slavyan Universitetinin rektoru, professor Kamal Abdullayev, Naxçıvan Dövlət Universitetinin rektoru, akademik İsa Həbibbəyli mübariz şairə Allah-Təaladan rəhmət diləyərək söylədilər ki, yaratdığı milli vətənpərvərlik obrazları ilə oxucuların dərin rəğbətini qazanmış Məmməd Araz həm də uzun müddət Azərbaycanda çıxan müxtəlif jurnal və qəzetlərdə məsul katib, redaktor müavini və redaktor vəzifələrində çalışmış, 30 il “Azərbaycan təbiəti” jurnalının baş redaktoru olmuş, Yazıçılar Birliyinin poeziya bölməsinə rəhbərlik etmişdir.
Şairin yarıməsrlik ədəbi yaradıcılığı XX əsr Azərbaycan poeziyasının parlaq səhifələrindən birini təşkil edir. Xalqımızın əsrlərlə formalaşmış yüksək mənəvi dəyərlərini tərənnüm edən, xalqa bağlılığı, milli koloriti, rəvan dili ilə səciyyələnən əsərlərində vətəndaşlıq ruhu hökm sürür. Onun qələmindən çıxan hər bir poeziya nümunəsi özünəməxsusluğu, orijinallığı və bədii məziyyətləri ilə seçilir. Məmməd Arazın əsərləri ayrı-ayrı xalqların dillərinə tərcümə edilərək nəşr olunmuş, onun bədii tərcümələri sayəsində isə Azərbaycan oxucusu dünya ədəbiyyatının bir sıra nümunələri ilə tanış ola bilmişdir.
Matəm mərasimində çıxış edənlər Azərbaycanda istiqlal təfəkkürünün formalaşmasında və təkamülündə Məmməd Araz yaradıcılığının oynadığı xüsusi rolu vurğuladılar. Eyni zamanda bildirildi ki, öz əsərlərində ölkəmizin füsunkar təbiətinin gözəlliklərini poetik dillə tərənnüm edən şair bütün qəlbi ilə bağlı olduğu və sevdiyi doğma təbiətin qorunmasına vətənin qədirbilən övladı kimi köməyini əsirgəmir, yaradıcılığı ilə bu mühüm işə xidmət göstərirdi. Bir sözlə, Məmməd Arazın yaradıcılığı Azərbaycan ədəbiyyat tarixinə böyük hadisə kimi daxil olmuş, şeirləri dillər əzbərinə çevrilmişdir. Bütün bunlara görə, Məmməd Arazın xidmətləri həmişə yüksək qiymətləndirilmiş, o, fəxri adlara, Dövlət mükafatına layiq görülmüş, müstəqil dövlətimizin ən ali mükafatı olan “İstiqlal” ordeni ilə təltif edilmişdir.
X X X
Prezident İlham Əliyev mərhumun ailə üzvlərinə bir daha dərin hüznlə başsağlığı verdi.
Azərbaycan Mədəniyyətinin Dostları Fondunun prezidenti Mehriban xanım Əliyeva da Məmməd Arazın yaxınları ilə səmimi görüşərək, onlara Tanrıdan səbir dilədi.
Məmməd Arazın ailə üzvləri, qohumları mərhumla vidalaşdılar.
X X X
Xalq şairi Məmməd Arazın cənazəsi teatrın binasından qaldırılaraq Fəxri xiyabana gətirildi. Burada mərhumun ruhuna dua oxundu. Əziz xatirəsi xalqımızın qəlbində əbədi yaşayacaq görkəmli sənətkar, əsil vətəndaş və gözəl insan Məmməd İnfil oğlu İbrahimovun (Məmməd Arazın) cənazəsi doğma torpağa tapşırıldı. Məzarın üzərinə əklillər, gül dəstələri düzüldü.
Allah rəhmət eləsin, qəbri nurla dolsun!
Bölmənin digər xəbərləri
