SON MƏNZİLƏ
Martın 2-də ölkəmizin ictimaiyyəti Azərbaycan xalça rəssamlığı sənətinin görkəmli nümayəndəsi, Azərbaycan Respublikası Prezidentinin fərdi təqaüdçüsü, xalq rəssamı Kamil Müseyib oğlu Əliyevi son mənzilə yola salmışdır.
Mərhumun cənazəsi Şəhriyar adına Bakı Mədəniyyət Mərkəzinin matəmsayağı bəzədilmiş səhnəsində postament üzərinə qoyulmuşdu. Postamentin qarşısına mərhumun sağlığında təltif olunduğu orden və medallar, Azərbaycan Prezidenti İlham Əliyevin adından, habelə dövlət və hökumət təşkilatları, Rəssamlar İttifaqı, müxtəlif kollektivlər adından əklillər düzülmüşdü.
Xalq rəssamı Kamil Əliyevin həmkarları, dostları, tanışları, tanınmış mədəniyyət və incəsənət, elm xadimləri, mərhumun sənətinin pərəstişkarları axın-axın Mədəniyyət Mərkəzinin binasına gəlir, görkəmli sənətkara və gözəl insana, ağsaqqala son borclarını verirdilər.
Salonda həzin matəm musiqisi səslənirdi. Milli Məclisin deputatları, dövlət və hökumət nümayəndələri, incəsənət, mədəniyyət, elm xadimləri, eləcə də sənətsevərlər cənazənin yanında fəxri qarovulda dayanırdılar.
X X X
Azərbaycan Respublikasının Prezidenti İlham Əliyev Azərbaycan xalça rəssamlığı sənətinin görkəmli nümayəndələrindən biri olan Kamil Əliyev ilə vidalaşma mərasimində iştirak etmək üçün Mədəniyyət Mərkəzinə gəldi.
Prezident İlham Əliyev, Milli Məclisin sədri Murtuz Ələsgərov, Prezident Administrasiyasının rəhbəri Ramiz Mehdiyev, Bakı Şəhər İcra Hakimiyyətinin başçısı Hacıbala Abutalıbov mərhumun cənazəsi yanında fəxri qarovulda dayandılar.
Sonra dövlətimizin başçısı mərhumun ailə üzvlərinə, qohum-əqrəbasına dərin hüznlə başsağlığı verdi.
Matəm mitinqini Rəssamlar İttifaqının sədri Fərhad Xəlilov açaraq, mərhumun həyat və yaradıcılığından danışdı. O bildirdi ki, bütün ömrünü mədəniyyət tariximizdə mühüm yer tutan xalçaçılıq sənətinin qədim, zəngin ənənələrinin qorunub saxlanılmasına və inkişafına həsr etmiş və böyük rəssam kimi tanınmış Kamil Əliyevin xalqımızın qüdrətli söz dühalarına, eləcə də görkəmli dövlət xadimlərinə həsr etdiyi portret-xalçalar həqiqi sənət zirvəsinə yüksəlmiş, Azərbaycanın milli sərvəti kimi incəsənətimizin qızıl fonduna həmişəlik daxil olmuşdur. Bacarıqlı təşkilatçı kimi o, uzun illər rəhbəri olduğu “Azərxalça” Elm-İstehsalat Birliyini inkişaf etdirmiş, onun yaradıcılığı həmişə diqqət mərkəzində olmuş və yüksək qiymətləndirilmişdir. Böyük sənətkar, əsil ziyalı və qayğıkeş insan Kamil Müseyib oğlu Əliyevin işıqlı xatirəsi xalqımızın qəlbində daim yaşayacaqdır.
Matəm mərasimində çıxış edən mədəniyyət nazirinin müavini Ədalət Vəliyev, Rəssamlıq Akademiyasının rektoru, xalq rəssamı Ömər Eldarov, sənətşünas Kübra Əliyeva bildirdilər ki, mədəniyyətimizin ən qədim növlərindən olan xalçaçılıq sənətini XX əsrin sonlarında yüksək zirvəyə qaldırmış, ömrünün son illərini gənc xalçaçıların yetişməsinə həsr etmiş Kamil Əliyevin çeşniləri əsasında toxunmuş xalçalar respublikamız müstəqillik qazandıqdan sonra dünyanın bir çox ölkələrində uğurla nümayiş etdirilmişdir. Azərbaycan xalçasının şöhrətini daha da artıran bu qədim el sənətinin nümunələri ən mötəbər muzeylərdə, o cümlədən Londonun məşhur “Viktoriya Albert” muzeyində saxlanılır.
Natiqlər xüsusi vurğuladılar ki, İkinci Dünya müharibəsinin iştirakçısı olan, xalq rəssamı Lətif Kərimovdan sonra Azərbaycan xalçaçılıq sənətini yeni yüksək zirvələrə qaldıran və beynəlxalq aləmdə tanıdan, öz əsərlərində ölkəmizin füsunkar təbiətinin gözəlliklərini ilmələrlə tərənnüm edən sənətkarın yaradıcılığı Azərbaycan mədəniyyəti tarixinə böyük hadisə kimi daxil olmuşdur. Bütün bunlara görə Kamil Əliyevin xidmətləri həmişə yüksək qiymətləndirilmiş, o, fəxri adlara, Dövlət mükafatına layiq görülmüş, müstəqil dövlətimizin ən ali mükafatı olan “İstiqlal” ordeni ilə təltif edilmişdir.
Mərhumun oğlu Cavanşir Əliyev atasının xatirəsinə göstərilən ehtirama, yaradıcılığına verdikləri yüksək qiymətə görə Azərbaycan Prezidentinə və mərasim iştirakçılarına ailəsi adından dərin minnətdarlığını bildirdi.
X X X
Prezident İlham Əliyev mərhumun ailə üzvlərinə, yaxınlarına bir daha dərin hüznlə başsağlığı verdi, onlara Tanrıdan səbir dilədi.
Kamil Əliyevin ailə üzvləri, qohumları mərhumla vidalaşdılar.
X X X
Xalq rəssamı Kamil Əliyevin cənazəsi Mədəniyyət Mərkəzinin binasından qaldırılaraq Fəxri xiyabana gətirildi. Burada mərhumun ruhuna dua oxundu. İşıqlı xatirəsi xalqımızın qəlbində əbədi yaşayacaq böyük sənətkar, əsil ziyalı və qayğıkeş insan Kamil Müseyib oğlu Əliyevin cənazəsi doğma torpağa tapşırıldı. Məzarın üzərinə əklillər, gül dəstələri düzüldü.
Allah rəhmət eləsin, qəbri nurla dolsun!
Bölmənin digər xəbərləri
