SON MƏNZİLƏ
AZƏRTAC xəbər verir ki, avqustun 8-də respublikamızın ictimaiyyəti görkəmli uroloq-alim və pedaqoq, Dövlət mükafatları laureatı, əməkdar elm xadimi, tibb elmləri doktoru, professor, Azərbaycan Milli Elmlər Akademiyasının həqiqi üzvü, Əziz Əliyev adına Azərbaycan Dövlət Həkimləri Təkmilləşdirmə İnstitutunun rektoru Mirməmməd Cavadzadəni son mənzilə yola salmışdır.
Mərhumun cənazəsi Azərbaycan Dövlət Həkimləri Təkmilləşdirmə İnstitutunun matəmsayağı bəzədilmiş böyük akt salonunda postament üzərində qoyulmuşdu. Postamentin ətrafına Azərbaycan Respublikasının Prezidenti İlham Əliyevin adından, habelə Səhiyyə Nazirliyi adından əklillər düzülmüşdü.
Salonda həzin matəm musiqisi səslənirdi. Respublikanın tanınmış alimləri, ziyalılar cənazənin yanında fəxri qarovulda dayanır, tibb sahəsinin tanınmış nümayəndəsinə öz ehtiramlarını bildirirdilər.
Matəm mərasimini səhiyyə naziri Oqtay Şirəliyev açdı.
AMEA-nın prezidenti, akademik Mahmud Kərimov, Azərbaycan Tibb Universitetinin rektoru, akademik Əhliman Əmiraslanov, Əziz Əliyev adına Azərbaycan Dövlət Həkimləri Təkmilləşdirmə İnstitutunun prorektoru Teymur Qafarov və başqaları matəm mərasimində çıxış etdilər.
Natiqlər vurğuladılar ki, M.Cavadzadə ömrünün 60 ildən artıq bir dövrünü tibb elminin, onun mühüm sahələrindən biri olan urologiyanın inkişafına sərf etmiş, Azərbaycanda urologiya - nefrologiya məktəbinin yaradıcısı olmuş, yüzlərlə tibb elmləri doktoru, tibb elmləri namizədi yetişdirmişdir.
Əmək fəaliyyətinə 1948-ci ildə Astara rayonunda cərrah kimi başlayan M.Cavadzadə sonralar Moskvada, Krımda müxtəlif vəzifələrdə çalışmış, əsl uroloq-alim kimi yetişmişdir. 1963-cü ildə vətənə qayıdaraq, Əziz Əliyev adına Azərbaycan Dövlət Həkimləri Təkmilləşdirmə İnstitutunda kafedra müdiri işləmiş, 1974-cü ildə həmin institutun rektoru təyin olunmuşdur. Ömrünün sonunadək bu instituta rəhbərlik edərək, tibb kadrlarının hazırlanması və təkmilləşdirilməsi işinə layiqli töhfəsini vermişdir. 1966-cı ildə məhz onun təşəbbüsü və iştirakı ilə Bakıda Respublika Klinik Uroloji Xəstəxana yaradılmışdır. Tezliklə urologiya sahəsində elmi və praktik fəaliyyətin mötəbər mərkəzinə çevrilən bu xəstəxana Azərbaycan səhiyyə sistemində xüsusi yer tutur. Mirməmməd Cavadzadə urologiya elminin inkişafındakı xidmətlərinə görə bir sıra orden və medallara layiq görülmüş, o cümlədən müstəqil Azərbaycan Respublikasının ali mükafatları - “Şöhrət” və “İstiqlal” ordenləri ilə təltif edilmişdir.
Alimin oğlu Samir Cavadzadə mərasimdə çıxış edərək, atasının xidmətlərinə verdiyi yüksək qiymətə, xatirəsinə göstərdiyi hörmət və ehtirama görə Prezident İlham Əliyevə mərhumun ailəsi adından dərin minnətdarlığını bildirdi, vida mərasiminə toplaşanlara təşəkkür etdi.
X X X
Matəm mərasimi başa çatdıqdan sonra mərhumun cənazəsi birinci Fəxri xiyabana gətirildi. Burada mərhumun ruhuna dua oxundu. Görkəmli alim, gözəl pedaqoq, qayğıkeş və səmimi insan kimi işıqlı xatirəsi qəlblərdə yaşayacaq Mirməmməd Cavadzadənin cənazəsi torpağa tapşırıldı. Məzarın üzərinə əklillər, gül dəstələri düzüldü.
Allah rəhmət eləsin!
######
Bölmənin digər xəbərləri
