SON MƏNZİLƏ
Avqustun 23-də respublikamızın ictimaiyyəti müasir Azərbaycan təsviri sənətinin görkəmli nümayəndəsi, xalq rəssamı, Azərbaycan Dövlət mükafatı laureatı, professor Mikayıl Hüseyn oğlu Abdullayevi son mənzilə yola salmışdır.
Mərhumun cənazəsi Rəşid Behbudov adına Dövlət Mahnı Teatrının matəmsayağı bəzədilmiş səhnəsində postament üzərində qoyulmuşdu. Postamentin ətrafına Azərbaycan Respublikasının Prezidenti Heydər Əliyevin adından, habelə Rəssamlar İttifaqının, müxtəlif nazirlik və idarələrin adından əklillər düzülmüşdü.
Salonda həzin matəm musiqisi səslənirdi. Respublikanın görkəmli elm, mədəniyyət və incəsənət xadimləri, mərhumun sənətinin pərəstişkarları cənazənin yanında fəxri qaravulda dayandılar, Azərbaycan təsviri sənətinin unudulmaz nümayəndəsinə öz ehtiramlarını bildirdilər.
Matəm mərasimini baş nazirin müavini Elçin Əfəndiyev açdı.
Rəssamlar İttifaqının sədri Fərhad Xəlilov, mədəniyyət naziri Polad Bülbüloğlu, Azərbaycan MEA-nın prezidenti, akademik Mahmud Kərimov, xalq rəssamı Kamil Əliyev və Dövlət Rəssamlıq Akademiyasının rektoru, xalq rəssamı Ömər Eldarov matəm mərasimində çıxış etdilər.
Natiqlər vurğuladılar ki, Mikayıl Abdullayevin müxtəlif janr və mövzularda yaratdığı boyakarlıq və qrafika əsərləri rəssamlıq tariximizə əbədi daxil olmuşdur. Azərbaycan torpağının gözəllikləri, vətən övladlarının qəhrəmanlığı, doğma yurda, əməyə və sənətə bağlılıq mahir fırça ustasının ilham mənbəyinə çevrilmiş və yaradıcılığının başlıca qayəsini təşkil etmişdir. Onun yurdumuzun əsrarəngiz təbiətini əks etdirən tabloları nikbin ruhu ilə seçilən gözəl sənət əsərlərindəndir. Ədəbiyyatımızın incilərinə çəkdiyi illüstrasiyalar Mikayıl Abdullayevin klassik irsə hörmət və sevgisinin, ona dərindən bələd olmasının parlaq nümunəsidir. Sənətkarın fırçasından çıxmış, personajlarının daxili aləmi, xarakteri, mənəvi zənginlikləri ustalıqla açılmış portretlər qalereyası və lirik lövhələr insana məhəbbət, vətən eşqi və böyük emosional təsir qüvvəsi ilə aşılanmış, öz milli koloriti, tərbiyəvi əhəmiyyəti ilə səciyyələnərək, neçə-neçə nəslin estetik zövqünün formalaşmasında müstəsna rol oynamışdır.
Azərbaycan incəsənətinə dünya şöhrəti gətirmiş rəssamın çəkdiyi tablolar XX əsr boyakarlıq və qrafika sənətimizin qiymətli nümunələri kimi xarici ölkələrdə uğurla nümayiş etdirilmiş, çoxsaylı sənətsevərlərin dərin rəğbətini qazanmış, onu fitri istedad sahibi kimi daha da məşhurlaşdırmışdır. Uzun illər pedaqoji sahədə fəaliyyət göstərərək, öz zəngin təcrübəsini və bacarığını gənc rəssamlar nəslinin yetişdirilməsinə sərf etmiş məşhur fırça ustasının müstəqil respublikamızın ən ali mükafatına - “İstiqlal” ordeninə layiq görülməsi onun sənətinə və şəxsiyyətinə ehtiramın parlaq nümunəsidir.
Görkəmli rəssamın oğlu Cəmil Abdullayev mərasimdə çıxış edərək, atasının yaradıcılığına verdiyi yüksək qiymətə, xatirəsinə göstərdiyi hörmət və ehtirama görə Azərbaycan Prezidenti Heydər Əliyevə mərhumun ailəsi adından dərin minnətdarlığını bildirdi, vida mərasiminə toplaşanlara təşəkkür etdi.
Vida mərasimində Prezidentin İcra Aparatının humanitar siyasət şöbəsinin müdiri Fatma Abdullazadə və digər rəsmi şəxslər iştirak edirdilər.
X X X
Matəm mərasimi başa çatdıqdan sonra mərhumun cənazəsi Rəşid Behbudov adına Dövlət Mahnı Teatrından qaldırılaraq Fəxri xiyabana gətirildi. Burada mərhumun ruhuna dua oxundu. Böyük sənətkar, əsl ziyalı və qayğıkeş insan kimi işıqlı xatirəsi xalqımızın qəlbində daim yaşayacaq Mikayıl Abdullayevin cənazəsi doğma torpağa tapşırıldı. Məzarın üzərinə əklillər, gül dəstələri düzüldü.
Allah rəhmət eləsin, qəbri nurla dolsun!
Bölmənin digər xəbərləri
