SON MƏNZİLƏ
Avqustun 26-da tanınmış ədəbiyyatşünas alim, Azərbaycan Milli Elmlər Akademiyası Nizami adına Ədəbiyyat İnstitutunun direktoru, AMEA-nın müxbir üzvü, Azərbaycan Dövlət mükafatı laureatı, əməkdar elm xadimi, filologiya elmləri doktoru, professor Yaşar Vahid oğlu Qarayev ilə vida mərasimi keçirilmişdir.
Mərhumun cənazəsi Azərbaycan Milli Elmlər Akademiyasının dairəvi zalında postament üzərində qoyulmuşdu. Cənazənin ətrafına professor Yaşar Qarayevin xatirəsinə ehtiram əlaməti olaraq Azərbaycan Respublikasının Prezidenti Heydər Əliyevin adından, habelə Milli Elmlər Akademiyasının rəyasət heyəti və müxtəlif təşkilatlar adından əklillər düzülmüşdü.
Zalda həzin matəm musiqisi səslənirdi. Respublikamızın tanınmış alimləri, elmi ictimaiyyətin nümayəndələri, ziyalılar cənazənin yanında fəxri qarovulda dayanaraq, ədəbi tənqidin görkəmli nümayəndəsi olan alimə öz ehtiramlarını bildirdilər.
Azərbaycan Milli Elmlər Akademiyasının prezidenti, akademik Mahmud Kərimov vida mərasimini açdı, Yaşar Qarayevin keçdiyi zəngin, çoxistiqamətli yaradıcılıq yolundan, Azərbaycan tənqidinə gətirdiyi yeni təfəkkür tərzindən və orijinal üslubdan, müasir ədəbiyyatşünas və tənqidçilərin formalaşmasında oynadığı mühüm roldan danışdı.
AMEA-nın akademiki Bəkir Nəbiyev, Yazıçılar Birliyinin sədri, xalq yazıçısı Anar, Ədəbiyyat İnstitutunun şöbə müdiri, professor Şamil Salmanov, Atatürk Araşdırmalar Mərkəzinin direktoru, AMEA-nın müxbir üzvü, professor Nizami Cəfərov, Moskva Dövlət Universitetinin professoru Tofiq Məlikov, Naxçıvan Dövlət Universitetinin rektoru, AMEA-nın müxbir üzvü, professor İsa Həbibbəyli və Ədəbiyyat İnstitutunun direktor müavini, professor Məhərrəm Qasımlı çıxış edərək bildirdilər ki, professor Yaşar Qarayevin mütəxəssislər tərəfindən yüksək qiymətləndirilən və ədəbiyyatımıza fəlsəfi məzmun və intellektual vüsət qazandıran qiymətli tədqiqat əsərlərinin milli ədəbiyyatşünaslıqda xüsusi yeri vardır. Müasir milli bədii-estetik fikir tarixində, ədəbi düşüncə və tənqidin inkişafında diqqətəlayiq xidmətləri olan alimin bütün elmi fəaliyyəti azərbaycançılıq ideyalarına sədaqətlə xidmətin nümunəsidir.
Natiqlər vurğuladılar ki, bir sıra beynəlxalq konfrans və simpoziumlarda Azərbaycanı layiqincə təmsil edən alimin müasir ədəbi proseslərin, ədəbi əlaqələrin və ədəbiyyat tarixinin müxtəlif problemlərinə həsr olunmuş məruzələri özünün dərin ümumiləşdirmə gücü ilə ədəbiyyatşünasların böyük marağına səbəb olmuşdur. Tanınmış ədəbiyyatşünas alim səmərəli elmi fəaliyyətlə yanaşı, eyni zamanda yüksək ixtisaslı kadrlar hazırlanmasına, elmin təbliğinə də böyük qüvvə və bacarıq sərf etmişdir.
Mərhumun qardaşı Ənvər Qarayev vida mərasimində çıxış edərək, Yaşar Qarayevin elmi yaradıcılığına verdiyi yüksək qiymətə, xatirəsinə göstərdiyi hörmət və ehtirama görə Azərbaycan Prezidenti Heydər Əliyevə görkəmli alimin ailəsi adından dərin minnətdarlığını bildirdi, vida mərasiminə toplaşanlara təşəkkür etdi.
Vida mərasimində Milli Məclis sədrinin müavini Gövhər Baxşəliyeva, baş nazirin müavini Elçin Əfəndiyev, Dövlət müşaviri Hidayət Orucov, Prezidentin İcra Aparatının humanitar siyasət şöbəsinin müdiri Fatma Abdullazadə və ictimai-siyasi şöbəsinin müdiri Əli Həsənov, xarici işlər naziri Vilayət Quliyev, mədəniyyət naziri Polad Bülbüloğlu və digər rəsmi şəxslər iştirak edirdilər.
X x x
Vida mərasimi başa çatdıqdan sonra mərhumun cənazəsi Azərbaycan Milli Elmlər Akademiyasından qaldırılaraq Fəxri xiyabana gətirildi. Burada mərhumun ruhuna dua oxundu. Tanınmış alim, əsl ziyalı və qayğıkeş insan kimi əziz xatirəsi onu tanıyanların qəlbində həmişə yaşayacaq Yaşar Qarayevin cənazəsi doğma torpağa tapşırıldı. Məzarın üzərinə əklillər, gül dəstələri düzüldü.
Allah rəhmət eləsin, qəbri nurla dolsun!
Bölmənin digər xəbərləri
