İDMAN
Suaresin nənəsi nəvəsinin futboldan kənarlaşdırılmasını cahillik adlandırmışdır
Bakı, 28 iyun (AZƏRTAC). “Liverpul” komandasının və Uruqvay yığmasının hücumçusu Luis Suaresin nənəsi Lila Piris bildirmişdir ki, onun nəvəsinin dörd ay müddətinə futboldan kənarlaşdırılması cahillikdir. AZƏRTAC bu xəbəri xarici KİV-lərə istinadla yayır.
Lila Piris demişdir: “Luisin başına nə oyun gətirildiyini hamı bilir. Onlar istəyirdilər ki, Luis dünya çempionatını tərk etsin. Onlar istəklərinə çatdılar. Onu it kimi qovdular. Mənim fikrimcə, bunu qəsdən ediblər. Hesab edirəm ki, insanla bu cür rəftar etmək vəhşilikdir, axı, hamı hər şeyi gördü”.
Suaresin nənəsi daha sonra demişdir: “Mən nəvəmi çox sevirəm, xahiş edirəm məndən bu barədə daha heç nə soruşmayın”.
“Liverpul” klubu və Uruqvay Futbol Assosiasiyası Suaresin diskvalifikasiya edilməsindən birgə apellyasiya şikayəti verməyin mümkünlüyü məsələsini nəzərdən keçirirlər.
“Eurosport” Uruqvay Futbol Federasiyasının prezidenti Vilmar Valdesin bu sözlərini sitat gətirir: “Apellyasiya şikayəti hazırlamaq üçün bizim üç gün vaxtımız var. Bu haqsız qərarın qəbul edilməsi üçün əsaslı səbəb yox idi. Futbolda bundan qat-qat aqressiv hadisələr olur. Onların verdikt çıxarmaq üçün hansı arqumentlərdən istifadə etdiklərini bilmirəm, lakin qərar çox sərt olmuşdur. Belə təsəvvür yaranır ki, Uruqvay yığmasını dünya çempionatından sadəcə kənara atırlar”.
Luisin çıxış etdiyi klubda da futbolçunun dörd ay müddətində futbolla bağlı hər hansı fəaliyyətdən, o cümlədən komandanın matçlarından və məşqlərindən kənarlaşdırılması haqda qərarla əsla razılaşmırlar. Böyük qalmaqala baxmayaraq, “Liverpul” bu yayda öz forvardından ayrılmaq fikrində deyildir.
Uruqvay yığmasının gözdən salınmış liderinin vətənə qayıtması haqqında ziddiyyətli məlumatlar yayılmaqdadır. İTAR-TASS agentliyinin verdiyi məlumata görə, Suares artıq mundialdan getmiş, Montevideo aeroportunda isə onu çoxsaylı azarkeşləri qarşılamışlar. Bildirilir ki, futbolçunun mühafizəçilərlə əhatə olunmuş halda öz maşınına tərəf getdiyi keçidi təmizləmək üçün yerli polis hətta güc tətbiq etməyə məcbur olmuşdur.
Lakin bəzi KİV-lərin verdiyi məlumata görə, Suares Uruqvaya uçuşunu təxirə salmışdır və hələ Braziliyadadır. Onun vətənində isə hətta ölkənin prezidenti Xose Muxik də aeroporta, onu qarşılamağa gəlmiş, lakin azarkeşlər öz kumirlərini gözləyə-gözləyə qalmışlar.
Xatırladaq ki, Suares 2014-cü il dünya çempionatında İtaliya komandası ilə matç zamanı bu komandanın oyunçusu Corco Kellinini dişlədiyinə görə milli komandanın doqquz matçında iştirak etmək hüququndan məhrum edilmiş və dörd ay müddətinə futbolla bağlı hər hansı fəaliyyətdən kənarlaşdırılmışdır. Bundan əlavə, hücumçu 100 min İsveçrə frankı məbləğində cərimə ödəməli olacaqdır.
Diskvalifikasiya müddətində Suaresin hər hansı rəsmi matçlar zamanı futbol stadionlarında olması, eləcə də transfer fəaliyyətinə cəlb edilməsi, yəni başqa kluba keçməsi qadağan olunmuşdur.
Uruqvaylı futbolçu rəsmi oyunlarda üçüncü dəfədir ki, bu cür hərəkət etmişdir. 2010-cu ildə Hollandiyanın “Ayaks” klubunda çıxış edərkən Suares PSV klubunun müdafiəçisi Otman Bakkalı dişləmişdi. Bu hərəkətinə görə o, Niderland çempionatının yedi matçında iştirak etmək hüququndan məhrum olunmuşdur. 2013-cü ilin aprel ayında Uruqvaylı Forvard artıq “Liverpul” klubunun heyətində çıxış edərkən “Çelsi”nin müdafiəçisi Branislav İvanoviçin əlini dişləmişdir. İngiltərə Futbol Assosiasiyası bu dəfə Suaresi 10 matç müddətinə diskvalifikasiya etmişdi.