Sumqayıt, 1 may (AZƏRTAC). İqtisadi İnkişaf Nazirliyinin təşkilatçılığı və şəhər icra hakimiyyətinin dəstəyi ilə Sumqayıtda ümummilli lider Heydər Əliyevin 90 illik yubileyinə həsr olunmuş “Heydər Əliyev və Azərbaycan regionlarının inkişafı” mövzusunda konfrans keçirilmişdir.

AZƏRTAC xəbər verir ki, tədbir iştirakçıları əvvəlcə ümummilli lider Heydər Əliyevin Sumqayıt şəhərindəki abidəsini ziyarət edərək önünə gül dəstələri qoymuşlar.

Sonra şəhər sahibkarlarının və ictimaiyyət nümayəndələrinin iştirakı ilə keçirilən konfransda müasir Azərbaycan dövlətçiliyinin memarı Heydər Əliyevin həyat və fəaliyyətinə həsr olunmuş film nümayiş etdirilmişdir.

Sumqayıt Şəhər İcra Hakimiyyəti başçısının müavini Akif Quliyev Ulu Öndərin ölkədə ictimai-siyasi sabitliyin bərqərar olması, bütün sahələrdə köklü islahatların həyata keçirilməsi, iqtisadiyyatın, regionların və sahibkarlığın inkişafı sahəsində misilsiz xidmətlərini diqqətə çatdırmışdır. O, ümummilli lider Heydər Əliyevin Sumqayıta göstərdiyi diqqət və qayğını təcəssüm etdirən 16 səfəri haqqında müfəssəl məlumat vermişdir.

İqtisadi inkişaf nazirinin müavini Niyazi Səfərov çıxış edərək görkəmli dövlət və siyasi xadim, ən böyük azərbaycanlı Heydər Əliyevin ölkənin inkişafı üçün gördüyü mühüm işlərdən geniş bəhs etmiş, Ulu Öndərin yorulmaz fəaliyyəti nəticəsində respublikanın tərəqqisi, beynəlxalq aləmdə nüfuzunun artması, milli iqtisadiyyatın yaradılması, ölkənin iqtisadi potensialının artırılması istiqamətində qazanılmış tarixi nailiyyətlər barədə məlumat vermişdir.

Bildirilmişdir ki, dünya iqtisadiyyatına uğurla inteqrasiya, ölkə daxilində iqtisadi liberallaşma, kredit reytinqimizin artması, iqtisadiyyatımızın rəqabət qabiliyyətliliyinin yüksək mövqedə olması, büdcəmizin və valyuta ehtiyatlarımızın ildən-ilə çoxalması 1993-cü ildən etibarən ulu öndər Heydər Əliyev tərəfindən yeni prinsiplər əsasında qurulan iqtisadiyyatın sabitliyinin bariz nümunəsidir.

Vurğulanmışdır ki, Azərbaycan Prezidenti İlham Əliyevin əsası Ulu Öndər tərəfindən qoyulmuş strategiyanın son 10 il ərzində uğurla və ardıcıl surətdə həyata keçirməsi ölkəmizin dinamik inkişafını şərtləndirmişdir. Əgər 2003-cü ildə ölkədə ÜDM istehsalı 7,1 milyard manat təşkil edirdisə, 2012-ci ildə bu göstərici 54 milyard manata çatmış, iqtisadiyyatda real artım 3,4 dəfə olmuşdur.

Bildirilmişdir ki, Azərbaycanın bugünkü sürətli iqtisadi inkişafının təməlində də məhz ümummilli lider Heydər Əliyevin əsasını qoyduğu iqtisadi inkişaf modeli dayanır.

Tədbirdə İqtisadi İnkişaf Nazirliyinin əməkdaşları “Ulu Öndərin iqtisadi inkişaf strategiyası”, “Azərbaycanda sahibkarlığın və insan kapitalının inkişafında Ümummilli Liderin misilsiz xidmətləri” və digər mövzularda məruzələrlə çıxış etmişlər.