SUPERKOMPYUTERƏ SƏRT DİSK LAZIM DEYİLDİR
Bakı, 5 sentyabr (AZƏRTAC). ABŞ-da sərt disklə təchiz olunmayan ilk superkompyuter istifadəyə verilmişdir. Məlumatların uzunmüddətli saxlanılma funksiyasını burada daha müasir SSD-toplayıcılar yerinə yetirir. SSD-toplayıcılar əsasən noutbuklarda, bəzən isə serverlərdə quraşdırılır.
Yeni superkompyuterin hazırlandığı Kaliforniya Universitetində qeyd edirlər ki, SSD-toplayıcıların tətbiq edilməsinin əsas səbəbi məlumatları daha yüksək sürətlə oxunmaq imkanları ilə bağlıdır. Superkompyuter ilkin verilənləri təhlil üçün daha tez qəbul edir. Digər tərəfdən, bu cür toplayıcıdan istifadə nəticəsində superkompyuterin qiyməti xeyli artmışdır.
Maqnit lövhəli sərt disklərdən fərqli olaraq, SSD-toplayıcılar hərəkət edən hissələri olmayan və yüklənmiş məlumatlara az qala 10 dəfə daha sürətli çıxış imkanı olan fleş-modullar bazasında yığılır. Bundan əlavə SSD-lər zədələnməyə qarşı davamlı və enerji sərfiyyatı baxımından daha sərfəlidir. Bütün bu üstünlüklərlə yanaşı çatişmayan cəhətlər də vardır: SSD-toplayıcıların həcmi kiçik, superkompyuterin qiyməti isə bahadır.
Bölmənin digər xəbərləri
