Bakı, 26 aprel (AZƏRTAC). Suraxanı Rayon İcra Hakimiyyətində 2013-cü ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunmuş iclas keçirilmişdir. 

İclasda məruzə ilə çıxış edən rayon icra hakimiyyətinin başçısı İlqar Abbasov demişdir ki, Prezident İlham Əliyevin diqqət və qayğısı sayəsində Suraxanı rayonunda da ötən dövr ərzində dövlət və yerli proqramlarının yerinə yetirilməsi işləri uğurla davam etdirilmişdir.

Cari ilin 1-ci rübündə rayonun sənaye müəssisələri tərəfindən 75,9 milyon, tikintidə 9,1 milyon manat, nəqliyyatda 3,2 milyon manat həcmində iş görülmüş, əsas kapitala 5,1 milyon manat investisiya yönəldilmiş, pərakəndə ticarət dövriyyəsi 61,7 milyon manat təşkil etmişdir. Ötən dövr ərzində 683 yeni iş yeri yaradılmış, orta aylıq əmək haqqı 561 manata çatdırılmış, rayon əhalisi 207,6 min nəfər təşkil etmiş, 2012-ci ilin müvafiq dövrünə nisbətən artım 1,5 faiz olmuşdur.

Azərbaycan Respublikası Prezidentinin Sərəncamı ilə təsdiq edilmiş “2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı”nda rayon üzrə nəzərdə tutulmuş 102 tədbirin 34-ü tam icra olunmuş, 50-nin icrasına başlanılmışdır. İcrasına başlanılan və başa çatdırılan tədbirlər proqramın 83,3 faizini təşkil etmişdir. Həmin Proqramın “Əlavə Tədbirlər Planı”nda nəzərdə tutulmuş 48 tədbirin 7-nin icrasına başlanılmış və onlar proqramın 14,6 faizini təşkil edir.

Azərbaycan Respublikası Hökuməti və Dünya Bankı tərəfindən birgə icra edilən “Bərk Məişət Tullantılarının Vahid İdarəçiliyi Layihəsi” çərçivəsində Zığ və Bülbülə qəsəbələrində, Yeni Günəşli yaşayış sahəsində əvvəllər mövcud olmuş məişət tullantıxanaları təmizlənmişdir.

Xüsusi vurğulanmışdır ki, Heydər Əliyev Fondunun dəstəyi ilə “Atəşgah məbədi” Dövlət Tarix Memarlıq Qoruğunun ətraf əraziləri abadlaşdırılmış, yardımçı binalar tikilmişdir. Prezident İlham Əliyev burada aparılan bərpa və yenidənqurma işləri ilə tanış olmuş, müvafiq tapşırıqlarını vermişdir.

Bildirilmişdir ki, vətəndaşların sosial müdafiəsinin gücləndirilməsi işi daim diqqət mərkəzində saxlanılmış, ilin 1-ci rübündə rayon əhalinin sosial müdafiəsi mərkəzi tərəfindən 174 ailəyə sosial müavinət, 668 ailəyə ünvanlı sosial yardım, yeni doğulmuş 424 uşağa 33,1 min manat birdəfəlik müavinət təyin edilmişdir.

Dövlət Sosial Müdafiə Fondunun rayon şöbəsi tərəfindən rüb ərzində fərdi sahibkarlıq fəaliyyəti ilə məşğul olan fiziki şəxslərdən 344,5 min manat vəsait toplanmış, artım 63,0 faiz təşkil etmiş, 271 nəfərə pensiya təyin olunmuşdur. Orta aylıq pensiyanın məbləği 162 manata çatdırılmış, artım 9,4 faiz təşkil etmişdir.

Rayon Məşğulluq Mərkəzinə müraciət etmiş 286 nəfərin 160-ı, o cümlədən kvota üzrə 5 nəfər işlə təmin olunmuşdur.

Məruzə ətrafında çıxışlar olmuşdur.

Yığıncağa yekun vuran İlqar Abbasov bildirmişdir ki, Suraxanı rayonunun sosial-iqtisadi inkişafı, əhalinin həyat səviyyəsinin yaxşılaşdırılması işləri davam etdiriləcək, dövlətimizin başçısı İlham Əliyevin Nazirlər Kabinetinin məlum iclasında qarşıya qoyduğu vəzifələrin icrası naminə bütün imkanlar səfərbər olunacaqdır.

Hesabat yığıncağında Milli Məclisin deputatları Ağacan Abıyev və Fərəc Quliyev iştirak etmişlər.