Bakı, 18 yanvar, AZƏRTAC

Prezident, Müzəffər Ali Baş Komandan İlham Əliyevin qəhrəman əsgərlərimizin, Milli Ordumuzun qəhrəmanlığı sayəsində erməni işğalçılarından azad olunan Şuşaya səfəri, orada Azərbaycanın üçrəngli bayrağını ucaltması xalqımızın əhval-ruhiyyəsini bir qədər də yüksəldib. Bu səfər Prezident İlham Əliyevin söylədiyi hər bir fikir yaranmış suallara bir növ cavab idi. İlk növbədə, Füzuli-Şuşa yolunun, həmçinin Füzuli rayonunda hava limanının təməllərinin qoyulması strateji əhəmiyyət daşıyır. Bu, eyni zamanda, azad edilmiş rayonlarımızın inkişafı üçün çox önəmli layihədir. Müharibənin bitməsindən iki ay keçməsinə baxmayaraq, artıq bərpa və quruculuq işlərinə start verilib. Bütün imkanlar səfərbər olunub ki, işğaldan azad edilmiş ərazilərimizdə həyat yenidən canlansın, vətəndaşlarımız öz doğma torpaqlarında qurub-yaratsınlar. Dövlətimizin başçısının bununla bağlı çoxsaylı sərəncamlarını və onların icrası çərçivəsində görülən tədbirləri xüsusi vurğulamaq lazımdır.

AZƏRTAC xəbər verir ki, bunu Milli Məclisin ailə, qadın və uşaq məsələləri komitəsinin sədri, professor Hicran Hüseynova bildirib.

Komitə sədri deyib: “Azərbaycan Prezidenti hərbçilər qarşısında çıxış edərkən dedi: “Mən Şuşaya son dəfə 39 il bundan əvvəl gəlmişəm. 39 il bundan əvvəl iki dəfə gəlmişəm və birinci dəfə yanvarın 14-də gəlmişəm”. Ancaq bu səfərlərin mahiyyəti fərqlidir. O zaman Prezident İlham Əliyev dövlət rəhbərinin övladı, bir vətəndaş kimi gəlmişdisə, bu dəfə isə müzəffər, qalib Azərbaycan Ordusunun Ali Baş Komandanı kimi səfər edir. Eyni zamanda, Şuşadan bütün Azərbaycana və dünyaya bəyan edir ki, bu torpaqlar tarixən də bizim olub, hər zaman da bizim olacaq. “Burada müqəddəs bayrağın altında, qəhrəman hərbçilərin önündə deyirəm ki, biz bu torpaqlarda əbədi yaşayacağıq!” bəyanatı çox təsiredici, həm də məsuliyyətlidir. Ancaq Müzəffər Ali Baş Komandan bu müqəddəs işi, şərəf borcunu bizim qəhrəman hərbçilərimizə, cəsur, igid döyüşçülərimizə, övladlarımıza tapşırdı. Bir məsələni unutmayaq ki, bu müharibənin əsas iştirakçıları gənc nəslin nümayəndələri, heç vaxt Qarabağı görməyən, yalnız adını eşidən gənclər idi. Bir çoxları, beynəlxalq təşkilatların nümayəndələri, siyasətçilər deyirdilər ki, artıq yeni nəsil yetişib, onlar Qarabağı görməyiblər, bu, reallıqdır, siz bununla barışmalısınız. Ancaq Azərbaycan gəncliyi, yeni nəsil özü yeni reallıq yaratdı və tarixi torpaqlarımızı erməni işğalçılarından azad etdi. Məşhur şeirdə deyildiyi kimi: “Orada bir kənd var uzaqda, o kənd bizim kəndimizdir. Getməsək də, qalmasaq da, o kənd bizim kəndimizdir!!!” Bəli, yaşından, etnik, milli, dini və siyasi mənsubiyyətindən asılı olmayaraq, hər bir vətəndaşımız bu möhtəşəm Qələbə üçün öz səylərini birləşdirdi. Bu birlik, bu “dəmir yumruq” nəticəsində qısa müddətdə Vətən, yurd həsrətinə son qoyuldu.

Digər mühüm bəyanat isə Ermənistanda revanş haqqında düşünənlərə və onların havadarlarına idi. Biz son zamanlar bəzi təxribatçı halları müşahidə edirik, dezinformasiyalar yayılır ki, ermənilər güc toplayır. Ancaq onlar dəmir yumruğu yaddan çıxarmamalıdırlar. Prezident İlham Əliyev dediyi kimi, “bu dəmir yumruq onların belini qırdı, onların başını əzdi. Əgər bizə qarşı hər hansı bir təxribat törədilərsə, cavabımız çox sərt olacaq, çox peşman olacaqlar və yenə də acı məğlubiyyətlə üzləşəcəklər”.

Şuşaya səfər zaman Saatlı, Aşağı Gövhərağa, Yuxarı Gövhərağa məscidləri və Qazançı kilsəsini ziyarət edən Prezident İlham Əliyev, Birinci vitse-prezident Mehriban Əliyeva və Heydər Əliyev Fondunun vitse-prezidenti Leyla Əliyeva vəziyyətlə yerində tanış oldular. Düşmən işğal dövründə dini abidələrimizi məhv edib, 67 məscidi dağıdıb, yaxud da ki, yararsız vəziyyətə salıb. Şuşa işğaldan azad olunandan sonra bizim vətəndaşlar əl gəzdirib, məscidi təmizləyib və müəyyən təmir işlərini görüblər. Ancaq, əlbəttə ki, məscidin əsaslı təmiri bundan sonra aparılacaq, bütün müvafiq göstərişlər verilib, Heydər Əliyev Fondu bu missiyanı öz üzərinə götürüb. Fondun sədri, Respublikanın Birinci vitse-prezidenti Mehriban xanım bu barədə açıqlama verib və biz bütün tarixi-dini abidələrimizi bərpa edəcəyik. Azərbaycanda hər zaman bütün dinlərin məbədləri qorunur. Hətta Bakının mərkəzində yerləşən erməni kilsəsi dövlət tərəfindən qorunur və təmir olunub. Ancaq ermənilərin nə etdiklərini də görürük. Bizim bütün dini, tarixi, mədəni abidələrimizi dağıdıblar, yararsız hala salıblar, onları təhqir ediblər. Ermənistan rəhbərliyinin və onun havadarlarının yalan məlumatlarına əsaslanan Beynəlxalq təşkilatlar Azərbaycana qarşı qərəzli hesabatlar hazırlayırlar. Məhz cənab Prezidentin beynəlxalq təşkilatlara müraciətindən sonra onlar ölkəmizə səfər edərək, əsl həqiqəti öz gözləri ilə gördülər. Bu günlərdə Azərbaycanda səfərdə olan ICESCO-nun Baş direktoru Salim bin Məhəmməd əl-Malikin rəhbərlik etdiyi nümayəndə heyəti işğaldan azad edilmiş ərazilərə səfər etdi. Baş direktor səfərlə bağlı bunları dedi: “Əvvəllər heç vaxt görmədiyimiz faciəni gördük. Tamamilə dağıdılmış, yerlə-yeksan edilmiş şəhər, bu, tamamilə qeyri-insani əməldir və heç bir ölçüyə sığmır. Bu, bəşəriyyət əleyhinə cinayətdir. Biz çox istəyirik ki, beynəlxalq təşkilatlar öz hesabatlarında ikili standartlara yol verməsinlər, həqiqəti yazsınlar”.

Deputat qeyd edib ki, Ermənistanın Azərbaycan torpaqlarını, o cümlədən Şuşanı işğal etməsi nəticəsində tarixi, mədəni abidələrimiz dağıdılıb, ev muzeyləri qarət edilib. Onların arasında Xurşidbanu Natəvanın, Üzeyir Hacıbəylinin, Bülbülün Şuşadakı büstləri də var. Güllələnmiş bu büstlər erməni vandalizminin şahidləridir. Prezident İlham Əliyev çıxışlarının birində demişdi ki, ərazi bütövlüyümüz bərpa ediləndən sonra Bülbülün, Natəvanın, Üzeyir Hacıbəylinin büstləri yenə də Şuşada qoyulacaq. Dövlətimizin başçısının bu sözləri artıq reallığa çevrilib. Həmin dahi şəxsiyyətlərin güllələnmiş büstləri Şuşada yenidən əvvəlki yerlərinə qoyulub. Azərbaycan Prezidentinin bu büstlərin qarşısında qısa, lakin tarixi çıxışı zamanı bir daha ermənilərin insanlığa yaraşmayan hərəkətlərini, alçaq niyyətlərini ifşa etdi.

Dövlətimizin başçısının Molla Pənah Vaqifin dağıdılmış məqbərəsi qarşısında çıxışı isə mühüm siyasi hadisələrə tarixi ekskurs olmaqla yanaşı, həm də mühüm ismarışlar idi. Prezident İlham Əliyev bildirdi ki, bu məqbərənin yaradılması və açılışı bir tərəfdən Azərbaycan Respublikasının öz tarixinə, Azərbaycan xalqının öz dahi şəxsiyyətlərinə olan hörmətin əlaməti idisə, digər tərəfdən onun məhz burada ucaldılması bir daha təsdiq edirdi ki, Şuşa Azərbaycan şəhəridir.

Ermənilərin əsas məqsədi o vaxt yaradılan Dağlıq Qarabağ Muxtar Vilayətində azərbaycanlıların izini tədricən silmək, bu ərazini erməniləşdirmək idi. Bu məqsədin reallaşdırılmasının qarşısını isə Ulu Öndər kəsirdi. Onun səyləri, uzaqgörən siyasəti, o cümlədən Yevlaxdan, Ağdamdan Xankəndiyə dəmir yolunun çəkilməsi, Dağlıq Qarabağda müəssisələrin yaradılması və bu müəssisələrə Azərbaycanın müxtəlif yerlərindən mütəxəssislərin gəlməsi nəticəsində bölgənin milli tərkibi Azərbaycanın xeyrinə xeyli dəyişmişdi və 1982-ci ildə Dağlıq Qarabağ Muxtar Vilayətində əhalinin 25 faizini azərbaycanlılar təşkil edirdilər. Bu tarixi faktları misal göstərən İlham Əliyev qeyd etdi ki, əgər o vaxt Heydər Əliyev Azərbaycanda qalsaydı, növbəti 10 il ərzində Dağlıq Qarabağ Muxtar Vilayətində azərbaycanlılar əksəriyyət təşkil edəcəkdilər və beləliklə, heç vaxt burada hər hansı bir münaqişə, yaxud da ki, separatizm meydana çıxa bilməzdi, separatizm baş qaldıra bilməzdi. Bu, həqiqətən belədir.

Şuşaya səfər edən Prezident İlham Əliyevin dediyi bu səmimi sözlər hələ uzun müddət yaddaşlarda qalacaqdır: “Ürək ağrısı ilə deyə bilərəm ki, burada olan dağıntılar hər bir Azərbaycan vətəndaşının qəlbini incidir. Ancaq Şuşanı dağılmış, amma, eyni zamanda, əyilməmiş, əzəmətli görmək bizi hədsiz dərəcədə qürurlandırır. Şuşa ayaqdadır, Şuşa sınmayıb, Şuşa əyilməyib! Mənfur düşmən nə qədər çalışsa da, Şuşanın simasını dəyişdirə bilməyib. Biz Şuşanın bütün yaralarını sağaldacağıq. Şuşa dünyanın ən gözəl şəhərlərindən birinə çevriləcək. Biz buna tam əminliklə inanırıq! Qarabağ Azərbaycandır!”.