TALLİNNDƏKİ XİLASKAR ƏSGƏR ABİDƏSİ SÖKÜLƏCƏK
AZƏRTAC İTAR-TASS-a istinadla xəbər verir ki, fevralın 15-də Estoniya parlamenti “Qadağan olunmuş qurğuların ləğv edilməsi haqqında” qanun qəbul etmişdir. Qanun Tallinni Hitler işğalından azad etmiş Xilaskar əsgərin paytaxtın mərkəzindəki abidəsini sökməyə icazə verir.
Hökumət abidənin sökülməsinə qanun qüvvəyə mindiyi andan 30 gün ərzində başlamalıdır. Estoniyada mövcud normalara görə, qanun respublika prezidenti tərəfindən bəyənilməlidir. O, dövlət hüquq aktları məcmuəsində dərc edildikdən sonra ertəsi gün qüvvəyə minəcəkdir.
RF dövlət Dumasının sədri Boris Qrızlov Estoniya parlamentinə xəbərdarlıq etmişdir ki, sovet abidələrinin uçurulmasına imkan verən qanunun qəbul olunması Estoniya ilə Rusiya arasında münasibətləri xeyli gərginləşdirəcəkdir.
Bundan əvvəl Dövlət Duması xüsusi bəyanat verərək, Estoniya deputatlarının hərəkətlərini kəskin tənqid etmişdir. RF Prezidenti Vladimir Putin Estoniyada belə qanun qəbul etmək cəhdlərini “qətiyyən uzaqgörməz, ifrat millətçi siyasət” adlandıraraq bildirmişdir ki, bu cür siyasət “nasizmlə mübarizə problemlərini, indiki reallıqları nəzərə almır”.
Xatırladaq ki, Estoniyanıın alman faşistlərindən azad edilməsi zamanı gedən döyüşlərdə 150 min sovet əsgəri həlak olmuşdur.
Bölmənin digər xəbərləri
